කොටි සාමාජිකයන් බාර නොගත් බව අවුරුදු 10 කට පසු හමුදාව කියයි

0

තම සමීපතමයන්ගේ ඉරණම හෙළි කරගැනීම සඳහා අඛණ්ඩ අරගලයක නිරත වී සිටින උතුරු නැගෙනහිර අම්මාවරුන්ට වේදනාකාරී පහරක් එල්ල කරමින් ශ්‍රී ලංකා යුද හමුදාව පවසා ඇත්තේ කිසිම කොටි සාමාජිකයකු තමන්ට බාර වුනේ නැති බවයි.

“අවසාන යුධ කාලවකවානුවේදී එල්ටීටීඊ සාමාජිකයන් ශ්‍රී ලංකා යුද්ධ හමුදාව වෙත භාරවී නොමැති අතර, ශ්‍රී ලංකා රජය වෙත භාරවී ඇත,” යි තොරතුරු නිලධාරී වශයෙන් කටයුතු කරන යුද හමුදා මාධ්‍ය ප්‍රකාශක බ්‍රිගේඩියර් සුමිත් අතපත්තු ටැමිල් මිරර් මාධ්‍යවේදී පී නිරෝෂ් කුමාර් තෙරතුරු දැනගැනීමේ අයිතිය යටතේ කරන ලද විමසුමකට පිළිතුරු ලෙස දැනුම් දී ඇත.

ප්‍රසිද්ධියේ කරන ලද නිවේදනයකට අවනත වෙමින් දූ දරුවන් ඇතුළු තම නෑසියන් 2009 මැයි මාසයේදී මුලතිව්හි වට්ටුවාහල් පාලම ඇතුළු ස්ථානවලදී ආරක්ෂක හමුදා අත් අඩංගුවට දුන් ආකාරය දින 900 කට ආසන්න කාලයක් උතුරේ වීදිවල විරෝධතා පවත්වන අතුරුදහන් වූවන්ගේ ගිය ආණ්ඩුවෙත් මේ ආණ්ඩුවේත් කොමිසම් ඇතුළු විවිධාකාරයේ බලධාරීන්ට කිහිප වතාවක්ම තොරතුරු ලබා දී තිබේ.

“භාර වූ එල්ටීටීඊ සාමාජිකයන් සබැඳිව ක්‍රියාකිරීමට බලයලත් ආයතනය වන්නේ පුනරුත්ථාපන කොමසාරිස් ජෙනරාල් කාර්යංශය (Bureau of the Commissioner General of Rehabilitation) බැවින් අපේක්ෂිත තොරතුරු එම ස්ථානයෙන් ලබාගන්නා ලෙස කාරුණිකව දන්වා සිටිමි,” යි ශ්‍රී ලංකා යුද හමුදාව එවා ඇති එම ලිපියේ සඳහන් වේ.

අවුරුදු දහයකට පෙර යුද්ධය අවසන් වීමෙන් පසු මුල්ම වතාවට ශ්‍රී ලංකා යුද හමුදාව එවැනි ප්‍රකාශයක් කර ඇත්තේ කොටි සංවිධානයේ දහස් ගණනක් රජයේ ආරක්ෂක අංශ විසින් අත් අඩංගුවට ගෙන පසුව පුනරුත්ථාපනය කරන ලද බව යුද සමයේ ආරක්ෂක ලේකම් ඇතුළු ඉහළ බලධාරීන් කිහිප වාරයක් කියා තිබියදීය.

LTTE සාමාජිකයන් 11, 800 ක පමණ පිරිසක් ආරක්ෂක හමුදා වෙත බාර වූ බව ආරක්ෂක ලේකම් ගෝඨාභය රාජපක්ෂ 2013 දී කොළඹදී මාධ්‍යවේදීන්ට පවසා තිබුනි.

ජනාධිපති මෛත්‍රිපාල සිරිසේන විසින් පත් කරන ලද අතුරුදහන් වූවන් පිළිබඳ කාර්යාලය (OMP) ද පිළිගන්නේ යුද හමුදාවට බාරවූ විශාල ජනකායක් අතුරුදහන් වී ඇති බවයි.

හමුදා අත් අඩංගුවේදී අතුරුදහන් වුවන් සොයා ගැනීම තම කාර්යාලය ප්‍රමුඛතාවයෙහි ලා සලකන බව පවසන OMP සභාපති සාලිය පීරිස් බාරවුවන්ගේ ලැයිස්තු බලධාරීන්ගෙන් ඉල්ලා ඇති බව කියා තිබුණ ද එය ලැබුණ වගක් දැනගන්නට නැත.

රාජපක්ෂ පාලනය විසින් පිහිටුවන ලද උගත් පාඩම් හා ප්‍රතිසන්ධාන කොමිසම (LLRC) විසින් 2011 දී වාර්තා කළ පරිදි යුද්ධයේ අවසාන දවස්වලදී යුද හමුදාවට බාරවී අතුරුදහන් වූ LTTE භට සංඛ්‍යාව 53 කි.

OMP කාර්යාලය ගණන් බලා ඇති පරිදි උතුරු නැගෙනහිරින් අතුරුදහන් වූ සංඛ්‍යාව විසි එක් දාහකි.

Facebook Comments

wedding people