උතුරු යුද්ධයේ අවසන් සමයේදී ශ්‍රී ලංකා යුද හමුදාවට බාර දීමෙන් හෝ බාර වීමෙන් පසු අතුරුදහන් වුවන් පිළිබඳව එම සේනාංක බාරව සිටි හමුදා නායකයන්ගෙන් ප්‍රශ්න කරන බවට අතුරුදහන් වුවන් පිළිබඳ කාර්යාලය (OMP)ප්‍රධානියා පවසා තිබේ.
යුද හමුදා අත් අඩංගුවට පත්වූවන් භාරගත් නිලධාරීන් පිළිබඳව ඥාතීන් විසින් ලබා දෙන තොරතුරු විශ්ලේෂණය කිරීමෙන් අනතුරුව එම විභාග කිරීම් අනිවාර්යයෙන්ම සිදු කරන බව OMP ප්‍රධානියා ප්‍රකාශ කරයි.
භාරගත් අයට අත්වූ ඉරණම හෙළිකර ගැනීම සඳහා එවක වන්නි ආඥාපති ජනරාල් ජගත් ජයසූරිය සහ අත් අඩංගුවට ගැනීම අධීක්ෂණය කළ බව ඥාතීන් පවසන 58 වැනි සේනාංකාධිපති මේජර් ජෙනරාල් ශවේන්ද්‍ර සිල්වා ඇතුලු එකල සිටි හමුදා නායකයන්ගෙන් ප්‍රශ්න කිරීමට OMP කාර්යාලයට සිදු වනු ඇත.
ඔවුන්ගෙන් ප්‍රශ්න කරන ලෙස යැස්මින් සූකා ගේ ප්‍රධානත්වයෙන් යුත් ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) OMP කාර්යාලයෙන් මැයි මාසයේ ලිඛිත ඉල්ලීමක් ද කර තිබුණි.
“ITJP සංවිධානය අහලා තියෙනවා අපෙන් ජෙනරාල් අහවල්, අහවල් අයව කැඳවලා සාක්ෂි ගන්නේ නැද්ද කියලා,” යි OMP සභාපති සාලිය පීරිස් කියා සිටියේය.
ශ්‍රී ලංකාවට නැගෙන චෝදනා වලින් නිදහස් වීමට නම් වගකිව යුතු පුද්ගලයන්ට එරෙහිව පියවර ගැනීම අත්‍යාවශ්‍ය බව කොළඹ පැවති මාධ්‍ය හමුවක දී ඔහු අවධාරණය කළේය.
රජයේ හමුදාවන්ට බාර දීමෙන් සහ පැහැරගෙන යන ලද්දවුන් අතුරුදහන් වුවන් හෝ ආගිය අතක් නැත්තවුන් ලෙස හැඳින්වීමට දැඩි විරෝධයක් දක්වන උතුරේ ඥාතීන් ඔවුන් බලහත්කාරයෙන් අතුරුදහන් වූවන් වග අවධාරණය කරන බව OMP ප්‍රධානියා මාධ්‍යවේදීන්ට පැහැදිලි කර දුනි.
“උතුරු නැගෙනහිර බොහෝ අය කියන්නේ මරණ සහතික ගැන කතා කරන්න එපා කියලා. 2009 බාර වෙච්ච අය විශ්වාස කරනවා ඒ අය තාමත් කොහේ හරි කඳවුරක ඉන්නවා කියලා.”
ලෝකයේ කිසිදු ශිෂ්ඨ සම්පන්න රටක් අතුරුදහන් වීම් අනුමත කරන්නේ නැතැයි අවධාරණය කළ OMP ප්‍රධානී සාලිය පීරිස් ඉතිහාසයේ එවැනි අපරාධ සිදුවූ බව ශ්‍රී ලාංකිකයන් විසින් පිළිගත යුතුව ඇතැයි වැඩිදුරටත් කියා සිටියේය.
Facebook Comments
