පිරිසිදු, අවංක සහ සමාජශීලි දේශපාලන ව්‍යාපාරයක් සඳහා දේශපාලන ක්ෂේත‍්‍රය තුළ කාන්තා සහභාගිත්වය ඉහළ නැංවීම හෙට දවසේ ඉතා වැදගත් සාධකයක් වනු ඇති බව ජනාධිපතිවරයා පවසයි.
පිරිසිදු දේශපාලන ව්‍යාපාරයක් තුළ පිරිසිදු දේශපාලන චරිත අද රටට අවශ්‍ය වී ඇති බව පවසන ජනාධිපති මෛත්‍රීපාල සිරිසේන ජනතාව වෙනුවෙන් පිරිසිදු හා අවංක සේවාවක් ඉටු කිරීමට මව්වරුන්ට සහ දියණිවරුන්ට ශක්තිය තිබෙන බවත් එම ශක්තිය හඳුනා ගනිමින් ඉදිරි මැතිවරණවලදී කාන්තා නියෝජනය වෙනුවෙන් නීත්‍යානුකූල පසුබිම සකස් කිරීමට වත්මන් රජය කටයුතු කර තිබෙන බවට කියා සිටියේ කාන්තා දිනය වෙනුවෙන් ශ්‍රී ලංකා නිදහස් පක්ෂ කාන්තා පෙරමුණ සංවිධානය කළ විශේෂ සැමරුම් උත්සවයකට එක්වෙමිනි.
රටේ ජනතාව අපේක්ෂා කරන්නේ වංචාවෙන්, දූෂණයෙන්, අක‍්‍රමිකතාවයෙන් සහ රාජ්‍ය සම්පත් අනිසි ලෙස භාවිතා කිරීමෙන් තොර මෙන්ම පුහු ඝෝෂාවලින් තොර අවංක, පිරිසිදු දේශපාලන ව්‍යාපාරයක් බව පැවසූ ජනාධිපතිවරයා ජනතාවගේ එම දේශපාලන අපේක්ෂාවන් ඉටුකිරීමට ශ්‍රී ලංකා නිදහස් පක්ෂය කැපවිය යුතු බවටද අවධාරණය කළේය.
ශ්‍රී ලංකා නිදහස් පක්ෂයේ කටයුතුවලදී මෙන්ම දේශපාලනයෙන් තොර රජයේ අනුග‍්‍රහහයෙන් සිදුවන අනෙකුත් කටයුතුවලදී ද කාන්තා නියෝජනය සහ ඔවුන්ට පැවරෙන වගකීම් ඉහළ නැංවීමට රාජ්‍ය ප‍්‍රතිපත්තිය අනුවම කටයුතු කරන බව ද ජනාධිපති මෛත්‍රීපාල සිරිසේන වැඩිදුරටත් සඳහන් කළේය.
Facebook Comments
