අධ්‍යාපනය හමුදාකරණයට විරෝධය පෑම ඇතුළු ඉල්ලීම් කිහිපයක් මුල්කරගනිමින් දිවයිනේ ප්‍රමුඛතම ගුරු සංගම් දෙකක් යාපනයේ ස්ථාන දෙකකදී විරෝධතා දියත් කර තිබේ.
අගෝස්තු 09 සදුදා ලංකා ගුරු සංගමය යාපනය නගරයේ විරෝධතා දක්වද්දි ලංකා ගුරු සේවා සංගමය විරෝධතාවය දියත් කර ඇත්තේ පේදුරුතුඩුවේදිය.
ගුරු වැටුප් විෂමතා සදහා වහාම විසදුම් ලබා දෙන ලෙස බලකරමින් ලංකා ගුරු සංගමය යාපනය වීරසිංහම් ශාලාව ඉදිරිපිටින් ආරම්භ කළ විරෝධතා රථ පෙලපාලිය යාපනය දිස්ත්‍රික් ලේකම් කාර්යාලය දක්වා ගමන් කළ බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් සදහන් කරයි.
පළාත් බද වාර්තාකරුවන් පවසන්නේ වීරසිංහම් ශාලාව ඉදිරිපිටින් ආරම්භ කළ විරෝධතා රථ පෙළපාලියට අවස්ථා කිහිපයකදීම පොලීසිය විසින් බාධා පැමිණ වු බවයි.
යාපනය ඇතුළු උතුරු පලාතේ ගුරු හා විදුහල්පතිවරුන් විශාල පිරිසක් විරෝධතාවය සදහා එක්ව සිටි බව ඔවුහු වැඩි දුරටත් පවසති.
පේදුරුතුඩුව නගරයෙන් ආරම්භ කළ ලංකා ගුරු සේවා සංගමයේ විරෝධතා පෙළපාලිය පේදුරුතුඩුව බස්නැවතුම්පොළ දක්වා පැමිණ එහිදී විරෝධතාවය දියත් කර තිබේ.
එම විරෝධතාවය සදහාද ගුරු හා විදුහල්පතිවරුන් විශාල පිරිසක් එක්ව සිටි බව පළාත් බද වාර්තාකරුවෝ වැඩි දුරටත් පවසති.
මේ අත‌ර පොලිස්පතිවරයා වෙත ලිපියක් යොමු කරමින් ගුරු විදුහල්පති වෘත්තිය සමිති සන්ධානය අද ඉල්ලා තිබුනේ ගුරු විදුහල්පතිවරුන්ට පවතින වැටුප් විශමතාවයට විසදුම් ලබා දෙන ලෙස බලකරමින් දිවයින පුරා දියත් කරන විරෝධතා වල නිරතව සිටින සිය සාමාජිකයන් අත්තනෝමතික ලෙස අත්අඩංගුවට ගැනීම නතර කරන ලෙසයි.
Facebook Comments
