මාධ්‍යවේදී ප්‍රගීත් එක්නැලිගොඩ අතුරුදහන් කරවීමට තම පුද්ගලික ලේකම්වරයා සම්බන්ධ දැයි සොයා බලන ලෙස මුදල් හා ජනමාධ්‍ය අමාත්‍ය මංගල සමරවීර මහතා අපරාධ පරීක්ෂණ දෙපාර්තමේන්තුවෙන් ඉල්ලිමක් කර තිබේ.
“ප්‍රගීත් එක්නැලිගොඩ ඝාතනයට වෙබ් මාෆියාකරු රුවන් සම්බන්ධයි” යන සිරස්තලයෙන් ලංකා ඊ නිවුස් වෙබ් අඩවිය පල කර ඇති පුවත සම්බන්ධයෙන් පරීක්ෂණයක් පවත්වන ලෙසට අමාත්‍යවරයාගේ පුද්ගලික ලේකම් රුවන් ප්‍රදිනාන්දිස් කරන ලද ඉල්ලීමකට අනුව ඇමැතිවරයා රහස් පොලිසියෙන් මෙම ඉල්ලීම කර ඇත.
රහස් පොලිස් විමර්ශනයේ අපක්ෂපාතීත්වය සලකා අදාල විමර්ශන අවසන් වන තෙක් සිය ධූරයෙන් තාවකාලිකව ඉවත් වන බවද ලේකම්වරයා මංගල සමරවීර ඇමැතිවරයා හට ලිපියක් මඟින් දැනුම් දී ඇත.
මාධ්‍යවේදී ප්‍රගීත් එක්නැලිගොඩ කොළඹට තදාසන්න ප්‍රදේශයකදි පැහැර ගෙන ගොස් අතුරුදහන් කරනු ලැබුවේ 2010 ජනවාරි මස 24 වැනි දිනයි.
ඔහුගේ පැහැරගැනීමට සැක පිට අත්අඩංගුවට පත් යුද හමුදා නිලධාරීන් යලි සේවයේ පිහිටුවා ඇත්තේ ජනමාධ්‍යයට එරෙහිව භීෂණය මුදා හළ පුද්ගලයන්ට එරෙහිව දඩුවම් ලබා දෙන බවට මැතිවරණ පොරොන්දු ලබා දෙමින් බලයට පත් ජනාධිපති මෛත්‍රීපාල සිරිසේන බවට දිවයිනේ ප්‍රමුඛතම ජනමාධ්‍ය සංගමයක් චෝදනා කර තිබුණි.
Facebook Comments
