ආණ්ඩුව ගෙන ඒමට සැරසෙන කම්කරු නීති සංශෝධන පනතට මහජන මත විමසුමක් පැවැත්වීම සඳහා ඉල්ලීමක් ඉදිරිපත්ව තිබේ.
ජාතික කම්කරු උපදේශක සභාව නියෝජනය කරන වෘත්තීය සමිති හා කම්කරු ඇමතිවරයා විසින් පසුගිය ද ඉන් ඉවත් කෙරුණු වෘත්තීය සමිති වල නියෝජිතයන්ගේ ද සහභාගිත්වයෙන් ඊයේ [ 26 ] කොළඹ පැවැති හමුවේදී මෙවැනි තීරණයකට එළඹ ඇත.
කම්කරු නීති සංශෝධන කෙටුම් පත ජාතික කම්කරු උපදේශක සභාවට ලබා දීමෙන් අනතුරුව ප්‍රසිද්ධියට පත් කළ යුතු බවට වෘත්තීය සමිති විසින් කම්කරු ඇමැති මනුෂ නානායක්කාරට දැනුම් දීමට නියමිතය. ඊට අමතරව කම්කරු උපදේශක සභාව නියෝජනය කරන හා ඉන් ඉවත් කෙරුණු සමිති නියෝජිතයන් පවසන්නේ ජනතා අදහස් හා යෝජනා ලබා ගැනීමට ස්වාධීන හා පුර්ණ විනිවිද බැවින් යුත් කොමිසන් සභාවක් පිහිටුවිය යුතු බවයි.
කම්කරු පංති ව්‍යාපාරය විනාශය කරා ඇද ගෙන යාමට ආණ්ඩුව දියත් කරමින් සිටින සැලසුම් පරාජය කිරීමට නම් මත බේද හා වෙනස් කම් නොතකා වෘත්තීය සමිති ඒකාබද්ධ විය යුතු බවට මෙහිදී තීරණය විය.
මෙම එකතුවේ කැඳවුම්කරු ලෙස නිදහස් වෙළෙඳ කලාප හා පොදු සේවා සේවක සංගමයේ සම ලේකම් ඇන්ටන් මාක්ස් ඒකමතිකව පත් කරගෙන තිබේ.
වැඩපොළ තුල කාර්මික සාමය පවත්වා ගෙන යාමේ අරමුණින් ආණ්ඩුව, හාම්පුතුන් හා වෘත්තීය සමිති එක්ව පවත්වා ගෙන යන ත්‍රෛපාර්ශ්වික එකතුව ලෙස සැලකෙන ජාතික කම්කරු උපදේශක සභාවෙන් ප්‍රධාන පෙලේ වෘත්තීය සමිති හතරක් ඉවත් කිරීමට කම්කරු ඇමැති වරයා පියවර ගෙන තිබුණි.
වාර්ෂික සමුළු, ශාඛා සමිති හා වාර්ෂික හා මාසික වාර්තා ආදිය නිසිලෙස නඩත්තු නොකරන හා සාමාජිකත්වය දහස සපුරා නොමැති වෘත්තීය සමිති උපදේශක සභාවෙන් ඉවත් කළ බවයි කම්කරු අමාත්‍යංශය ප්‍රකාශ කරන්නේ.
පෞද්ගලික අංශයේ කම්කරුවන් නියෝජනය කරන ස්වාධීන වෘත්තීය සමිති හතරක් වූ ලංකා වෙළඳ, කර්මාන්ත හා පොදු ක් සේවක සංගමය, නිදහස් වෙළඳ කලාප හා පොදු සේවා සේවක සංගමය, ලංකා වතු කාර්ය මණ්ඩල සේවක සංගමය සහ නව සමසමාජ පක්ෂයට අනුබද්ධව පැවති එක්සත් කම්කරු සමේලනය කම්කරු ඇමැතිගේ නිර්දේශයෙන් ඉවත් කර ඇත.
නිදහස් වෙළෙඳ කලාප හා පොදු සේවා සේවක සංගමය විසින් කම්කරු ඇමතිවරයා ප්‍රධාන වග උත්තරකරු කරමින් අභියාචනාධිකරණයේ ගොනු කළ පෙත්සමෙන් ඉල්ලා සිටින්නේ ඇමැති තීරණය අහෝසි කරන ලෙසයි.
Facebook Comments
