ඉතිහාසයේ පෙර නොවු අයුරීන් දීර්ඝ බැංකු නිවාඩුවක් ලබා දී සිදු කිරීමට යන දේශීය ණය ප්‍රතිව්‍යුහගතකරණය සම්බන්ධයෙන් ජනතාව තුළ ඇති වී තිබෙන ව්‍යාකූලත්වය නැති කිරීමට ආණ්ඩුව ක්‍රියා කළ යුතු බවට දිවයිනේ බැංකු කාර්ය මණ්ඩල නියෝජනය කරන ප්‍රධානතම වෘත්තීය සමිතිය අවධාරණය කරයි.
ජූනි මස 30 වැනිදා බැංකු නිවාඩු දිනයක් ලෙස අග්‍රාමාත්‍ය සහ රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍ය දිනේෂ් ගුණවර්ධන විසින් අති විශේෂ ගැසට් පත්‍රයක් මගින් ප්‍රකාශයට පත් කර තිබේ.
මහ බැංකු අධිපති ආචාර්ය නන්දලාල් වීරසිංහ ප්‍රකාශ කොට තිබුණේ දේශීය ණය ප්‍රශස්තකරණය (Domestic Debt Optimization) යනුවෙන් නම්කොට ඇති වැඩපිලිවෙලකට කල් ලබා ගැනීම සඳහා රජය සහ මුදල් අමාත්‍යාංශය සාකච්ඡා කොට එම නිවාඩුව පනවන ලද බවයි. ඒ සමගම කතානායකවරයා සති අන්තයේ හදිසි පාර්ලිමේන්තුව රැස්වීමක් කැඳවා තිබේ.
පස්දින බැංකු නිවාඩුව නිමවී දින දෙකක් ගතවෙත්ම රුපියල් මිලියන 140,000 ක් වටිනා
භාණ්ඩාගාර බිල්පත් වෙන්දේසි කිරීමට තීන්දු කර ඇතැයි ශ්‍රී ලංකා මහ බැංකුවේ රාජ්‍ය ණය දෙපාර්තමේන්තුව නිවේදනය කර අත.
මේ දින පහේ නිවාඩුව තුළ පාර්ලිමේන්තුව තුළ කරන්න යන්නේ කුමක්දැයි ලංකා බැංකු සේවක සංගමය ප්‍රශ්න කරයි.
“ඒ තුලින් බැංකුවලට ඒ වගේම බැංකු තැන්පතුකරුවන්ට, ඒ වගේම බැංකුවල ගනුදෙනුකරුවන්ට, මේ අයට කිසිදු හානියක් සිදුවෙන්නේ නැහැ. මේ තුලින් රටේ දේශිය ණය ප්‍රසස්තකරණය මෙන්න මේ ආකාරයටයි සිද්ධ කරන්නේ කියන එක පිළිබදව පැහැදිලි කිරීමක් කරන්න අවශ්‍යයි කියන එක අපි අවධාරණය කරනවා,” යි
ලංකා බැංකු සේවක සංගමයේ ප්‍රධාන ලේකම් රන්ජන් සේනානායක කොළඹ දී මාධ්‍ය හමුවක් පවත්වමින් කියා සිටියේය.
දේශිය ණය ප්‍රශස්තකරණයක් සිදු කළ හැකි ක්‍රම ගණනාවක් පවතින බව පෙන්වා දෙන සංගම් නායකයාතව දුරටත් අවධාරණය කළේ ඒ සඳහා ඒ ණය හිමියන් වෙනුවෙන් අනුගමනය කරන්නේ කුමන ක්‍රමවේදයක්ද යන්න ආණ්ඩුව ප්‍රකාශ කළ යුතු බවයි.
ජූනි මස 30ද වැනිදා බැංකු නිවාඩු දිනයක් ලෙස අග්‍රාමාත්‍ය සහ රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍ය දිනේෂ් ගුණවර්ධන විසින් අති විශේෂ ගැසට් පත්‍රයක් මගින් ප්‍රකාශයට පත් කර තිබේ.
ලංකා බැංකු සේවක සංගමයේ ප්‍රධාන ලේකම් රන්ජන් සේනානායක පවසන්නේ ණය ප්‍රතිව්‍යුහගතකරණයේ යම් යුක්තිසහගත බවක් පවතින්නේනම්, එක දිගට දින පහක බැංකු නිවාඩුව ලබාදීම හරහා රට කිසියම් ව්‍යාකූලත්වයක් නිර්මාණය කිරීම ආණ්ඩුව විසින්ම එම යුක්ති සහගත බව සැකයක් බවට හරවා ඇති බවයි.
රජය ණය සපයාගන්නා ආකාර වනුයේ භාණ්ඩාගාර බැදුම්කර, භාණ්ඩාගාර බිල්පත්, සංවර්ධන බැදුම්කර හා රජයේ ඇප මත රාජ්‍ය ආයතන වෙත ලබා දෙන ණය ආදී වශයෙනි.
දේශීය ණය ප්‍රතිව්‍යුහගතකරණයේදී සලකා බැලීමට නියමිතව ඇත්තේ භාණ්ඩාගාර බැදුම්කර යටතේ රජය ලබා ගත් ණය බව ආර්ථික විශේෂඥයෝ පෙන්වා දෙති.
IMF කොන්දේසියක් නොවේ
ලංකා බැංකු සේවක සංගමයේ සභාපති චන්න දිසානායක මාධ්‍ය හමුවේදී පෙන්වා දුන්නේ ආණ්ඩුව විසින් දේශිය වශයෙන් ලබා ගෙන ඇති ණය ප්‍රමාණය ඇමරිකන් ඩොලර් බිලියන 42 ක් වැනි විශාල මුදලක් බවයි.
දේශිය ණය ප්‍රතිව්‍යුහගතකරණය කිරීම ජාත්‍යන්තර මුල්‍ය අරමුදලේ නිර්දේශයක් නොවන බව පවසන චන්න දිසානායක අවධාරණය කරන්නේ ආණ්ඩුව ප්‍රතිව්‍යුහගතකරණය යන වචනය පැත්තකින් තබා ප්‍රසස්තකරණය යනුවෙන් නව වචනයක් මේ වන විට භාවිතයට ගන්නා බවයි.
ලංකා බැංකු සේවක සංගමයේ සභාපති චන්න දිසානායක පවසන පරිදි භාණ්ඩාගාර බිල්පත් ප්‍රසස්තකරණය කළ හැකි ආකාර තුනකි.
” එකක් තමයි ඒ සුරැකුම්පත්වල මුහුනත වටිනාකම, යම් කිසි ප්‍රමාණයක් අඩු කිරීමේ හැකියාව තියනවා,…. ඒ වගේම රජයේ සුරැකුම්පත් කල් පිරෙන දවසක් තියනවා. මෙන්න මේ කල් පිරෙන දවස ආණ්ඩුව, ඒ වගේම මහ බැංකුවට පුළුවන් කල් පිරෙන දවස තව දුරටත් කල් දාන්න, තුන් වැනි ආකාරය තමයි මේ භාණ්ඩාගාර බිල්පත් ගනුදෙනුකරුවන්, ආයතන ගත්තට පස්සේ මහ බැංකුව විසින් මේවට කිසියක් පොලියක් ගෙවනවා. මෙන්න මේ පොලියේ යම්කිසි ප්‍රමාණයක් කප්පාදු කිරීමේ හැකියාව තියනවා. ”
ණය ප්‍රතිව්‍යුහගතකරණයේදී භාවිත කළ හැක්කේ මෙම ක්‍රම තුන පමණක් බව පෙන්වා දෙන ලංකා බැංකු සේවක සංගමයේ සභාපති චන්න දිසානායක අවධාරණය කරන්නේ ණය ප්‍රතිව්‍යුහගතකරණය කරන බව ආණ්ඩුව දිගින් දිගටම පැවසුවත් එම ක්‍රමය කුමක්දැයි මේතාක් නිල වශයෙන් ප්‍රකාශයක් සිදු කර නොමැති බවයි.
එවැනි තත්වයක් තුළ ආණ්ඩුව සිදු කිරීමට යන්නේ කුමක්දැයි බැංකු සේවකයන් මෙන්ම මහජනතාවද නොදන්නා බව චන්න දිසානායක වැඩි දුරටත් සදහන් කළේය.
දේශිය ණය ප්‍රතිව්‍යුහගතකරණයට ලංකා බැංකු සේවක සංගමයේ එකඟතාවක් නොමැති බව පවසන සභාපතිවරයා කිසිදු පදනමකින් තොරව දීර්ඝ බැංකු නිවාඩු ලබා දීම ජාත්‍යන්තර ගනුදෙනු වලදී බරපතල ගැටළුවක් වන බවයි.
කොටස් වෙළෙඳ පොලද වසා දමමින් ආණ්ඩුව සිදු කිරීමට යන්නේ කුමක්දැයි සියළු පාර්ශවවල සැකයට භාජනය වී ඇති බව පවසන චන්න දිසානායක රටේ රාජ්‍ය හා පෞද්ගලික බැංකු කිසිදු ගැටළුවකින් තොරව පවත්වාගෙන යන බවටත් ගනුදෙනුකරුවන්ට සහතික විය.
“අපි මේ රටේ සියළුම ගනුදෙනුකරුවන්ට කියන්න කැමතියි, මේ රටේ සියලුම රාජ්‍ය හා පෞද්ගලික බැංකු කිසිදු අර්බුදයක් ගැටළුවක් නෑ. ශක්තිමත්ව පවත්වාගෙන යනවා. ඒ නිසා මේ රටේ ගනුදෙනුකාර ප්‍රජාව කිසිදු භීතියක් ඇතිකරගත යුතු නෑ. හැබැයි අපි ආණ්ඩුවට කියනවා ඒ ගනුදෙනුකරුවන් විසින් මේ ජීවිත කාලය මුළුල්ලේම එකතුකරගෙන තියන එ මුදල තමයි ඔය රජයේ සුරැකුම්පත්වල ආයෝජනය කරලා තියෙන්නේ, ආණ්ඩුව රජය ගැන ලොකු විශ්වාසයක් තියලා. ඒ ගනුදෙනුකරුවන්ට කිසියම් හානියක් පාඩුවක් සිද්ධවෙනවානං ආණ්ඩුව ඒ හානිය පියවන්නේ කොහොමද කියන එක ගැන සහතිකය අනිවාරයෙන්ම මේ ප්‍රසස්තකරණයට පෙර ආණ්ඩුව නිල වශයෙන් ප්‍රකාශයට පත් කළ යුතුයි.”
පසුගියදා ජනාධිපතිවරයා පවසා තිබුනේ දේශීය ණය ප්‍රතිව්‍යුහගත කිරීම මඟින් සේවක අර්ථ සාධක අරමුදල ඇතුළු කිසිඳු මහජන අරමුදල්වල සාමාජික ශේෂයට බලපෑමක් එල්ල නොවන අතර , අතීතයේ ගෙවා ඇති සුපිරි විශ්‍රාම අරමුදල් ප්‍රතිලාභ අනුපාතයට ද කිසිඳු ආකාරයකට බලපෑමක් නැති බවයි.
එසේම දේශීය ණය ප්‍රතිව්‍යුහගත කිරීම මඟින් මෙරට බැංකු පද්ධතියේ ස්ථායීතාවයට හෝ කිසිඳු රාජ්‍ය හෝ පෞද්ගලික බැංකුවක ස්ථායීතාවයට බලපෑමක් එල්ල නොවක් බවත් ඔහු ගම්පහ දිස්ත්‍රික් ලේකම් පරිපාලන සංකීර්ණය ‘ලක්සියනෑ මන්දිරය’ ජනතා අයිතියට පවරා දෙමින් ජුනි 27 වැනිදා පවසා තිබුණි.
රටේ මිලියන 50කට අධික බැංකු තැන්පත්කරුවන්ගේ කිසිඳු තැන්පතුවකට ද මෙහි බලපෑමක් නොමැති අතර දැනට ගෙවනු ලබන බැංකු තැන්පතු සඳහා වන කිසිදු පොලියකට බලපෑමක් එල්ල නොවන බවත් ජනාධිපතිවරයා සඳහන් කළ බව ජනාධිපති මාධ්‍ය ඒ්කකය නිවේදනය කර තිබේ.
Facebook Comments
