මතබේදයට තුඩුදී ඇති කුරුන්තූර් කන්ද බලන්න උසාවිය සැරසේ

දෙමළ ජනතාවගේ පුජා භුමියක අලුත් ඉදි කිරීම් තහනම් කරමින් නව මාසයකට ඉහත දී ලබා දුන් උසාවි නියෝගයක් නොතකා කටයුතු කර තිබේදැයි විභාග කිරීම සඳහා ස්ථානීය නිරීක්ෂණයක් පැවත්වීමට අධිකරණය තීරණය කර තිබේ.

මුලතිව්, තන්නිමුරිප්පු, කුරුන්තූර්මලෙයි ශිව දේවාලය පිහිටා තිබු ස්ථානයේ නව ඉදිකිරීම් සිදු නොකරන ලෙස අධිකරණය ලබා දුන් තීන්දුව නොතකා හරිමින් නව ඉදිකිරීම් සිදු කර නොමැති බවට පුරා විද්‍යා දෙපාර්තමේන්තුව වෙනුවෙන් පෙනී සිටි රජයේ නීතිඥයා අප්‍රේල් 27 වැනිදා මුලතිව් මහේස්ත්‍රාත් ටී. සරවනරාජාට දැන්වීම නිසා විනිසුරුවරයා එම තීරණයට එළඹි බවයි පළාත් බද වාර්තාකරුවන් පවසන්නේ.

කුරුන්තූර්මලෙයි ශිව දේවාලය පිහිටා තිබු ස්ථානයේ නව ඉදිකිරීම් සිදු නොකරන ලෙස අධිකරණය ලබා දුන් තීන්දුවට පිටුපා යමින් යුද හමුදාවේ පුර්ණ අනුග්‍රහයෙන් චෛත්‍යයක් ඉදිකිරීම සම්බන්ධයෙන් මාර්තු 30 වැනිදා අධිකරණයට වාර්තාවක් ඉදිරිපත් කරන ලෙස මාර්තු 2 වැනිදා මහේස්ත්‍රාත් වරයා විසින් පොලිස් හා පුරා විද්‍යා දෙපාර්තමේන්තුවේ නිලධාරීන්ට දැනුම් දී තිබුනි.

මාර්තු 30 වැනිදා නඩුව කැදවු අවස්ථාවේ පුරාවිද්‍යා දෙපාර්තමේන්තුවේ අධ්‍යක්ෂ ජනරාල් මහාචාර්ය අනුර මනතුංග, එම දෙපාර්තමේන්තුවේ පිරිසක් සහ පොලිස් නිලධාරීන් පැමිණ සිටියත් ඔවුන් වෙනුවෙන් පෙනී සිටින නීතිඥයන් අධිකරණයට පැමිණ නොසිටි බැවින් විනිසුරුවරයා ඉල්ලා සිටි වාර්තා ඉදිරිපත් කිරීමට තව දුරටත් කාලය ලබා දෙන ලෙස රාජ්‍ය නිලධාරීන් සිදු කළ ඉල්ලීම හමුවේ විනිසුරුවරයා නඩුව අප්‍රේල් 27 වැනිදාට කල් දමන ලදි.

නව ඉදිකිරීම් සිදු නොකරන ලෙසට අධිකරණය ලබා දුන් තීන්දුව නොසලකා හරිමින් කටයුතු කර නොමැති බවට පුරා විද්‍යා දෙපාර්තමේන්තුවේ නිලධාරීන් වෙනුවෙන් පෙනී සිටි නීතිඥයා අප්‍රේල් 27 වැනිදා අධිකරණයට කරුණු වාර්තා කළ අවස්ථාවේ, අධිකරණ තීන්දුව නොතකා ඉදිකිරීම් සිදු කර තිබෙන ආකාරය ඡායාරූප මගින් තමන් විනිසුරුවරයාට පැහැදිලි කළ බවයි පැමිනිලි පාර්ශවයේ නීතිඥ වී.එස් ධනංජයන් පවසන්නේ.

කරුණු විමසා බැලු විනිසුරුවරයා යළිත් වරක් ස්ථානීය නිරීක්ෂණයක් සිදු කිරීමට තීරණය කළ අතර මීලග නඩු වාරය ජුලි 04 වැනිදාට කල් තැබු බව නීතිඥ වී.එස් ධනංජයන් පළාත් බද මාධ්‍යවේදීන් සමග වැඩි දුරටත් පවසා තිබේ.

කුරුන්තූර්මලෙයි ශිව දේවාලය පිහිටා තිබු ස්ථානයේ නව ඉදිකිරීම් සිදු කර ඇති ආකාරය දැක බලා ගැනීම සදහා එම ප්‍රදේශයේ යළිත් වරක් නිරීක්ෂණ චාර්කාවකට එක් වන ලෙස පැමිනිලි පාර්ශවයේ නීතිඥ වී.එස් ධනංජයන් මුලතිව් මහේස්ත්‍රාත් ටී. සරවනරාජාගෙන් මාර්තු 2 වැනිදා ද ඉල්ලීම් කර තිබුනි.

හමුදා අනුග්‍රහයෙන් ඉදිකිරීම්

මුලතිව්, තන්නිමුරිප්පු, කුරුන්තූර්මලෙයි ශිව දේවාලය පිහිටා තිබු ස්ථානයේ අලුතින් ඉදිකිරීම් තහනම් කර ඇති පුරාවිද්‍යා භුමියේ උසාවි අනුදැනීමකින් තොරව යුද හමුදාවේ පුර්ණ අනුග්‍රහයෙන් චෛත්‍යයක් ඉදිකිරීම සම්බන්ධයෙන් 2022 වසරේ අධිකරණයේ නඩුවක් ගොනු කර තිබුනි.

ප්‍රදේශවාසි ජනතාව වෙනුවෙන් එම නඩුව ගොනු කර තිබුනේ උතුරු පළාත් සභාවේ හිටපු කෘෂිකර්ම අමාත්‍ය කාන්දයියා සිවනේෂන්, හිටපු පළාත් සභා මන්ත්‍රී තුරෛරාජා රවිහරන් සහ සමාජ ක්‍රියාකාරික ජී. ජුඩ් ප්‍රසාන්ත් විසිනි.

එම නඩුව 2022 ජුලි 21 වැනිදා දෙවැනි වරට කැඳවු අවස්ථාවේදී අධිකරණයේ විනිසුරු ඇතුළු පිරිසක් ඉදිකිරීම් කරන ස්ථානයේ නිරීක්ෂණ චාරිකාවකට එක්වීමෙන් පසුව නියෝග කර තිබුනේ එහි අලුතින් ඉදිකිරීම් වහාම නවත්වන ලෙසයි.

2022 වසරේ නොවැම්බර් 24 වැනිදා එම නඩුව යළි කැදවු අවස්ථාවේදී ප්‍රදේශවාසී ජනතාව වෙනුවෙන් නීතිඥ වී.එස් ධනංජයන් අධිකරණයට කරුණු වාර්තා කර තිබුනේ අධිකරණ නියෝග නොතකමින් එහි ඉදිකිරීම් තව දුරටත් සිදු වන බවයි.එම ඉදිකිරීම් නතර කරන ලෙසට විනිසුරුවරයා එදින යළිත් වරක් පුරා විද්‍යා දෙපාර්තමේන්තුවට, පොලිසියට සහ විහාරාධිපති හිමියන්ට නියෝග කර තිබුනි.

නීතිඥ වී.එස් ධනංජයන් 2023 මාර්තු 2 වැනි බදාදා මුලතිව්, තන්නිමුරිප්පු, කුරුන්තූර්මලෙයි ශිව දේවාලය පිහිටා තිබු ස්ථානයේ යුද හමුදාවේ පුර්ණ අනුග්‍රහයෙන් ඉදිවන චෛත්‍යයේ නවතම ඡායාරූප මුලතිව් මහේස්ත්‍රාත් ටී. සරවනරාජා වෙත ඉදිරිපත් කරමින් අවධාරණය කර තිබුනේ විනිසුරුවරයා විසින් දෙවරක්ම ලබා දී ඇති නියෝග කඩකරමින් එම චෛත්‍යයේ ඉදිකිරීම් දිගටම කෙරීගෙන යන බවයි.