උතුරේ කැඳ මුට්ටිවලට පයින් ගසා දකුණේ අයිස්ක්‍රීම් දන්සල් දෙන පොලිසියට විරෝධය

යුද්ධාවසානයේ යුද හමුදාවට භාර දුන් සිය සමීපතමයට අත්වු ඉරණම හෙලි කර ගැනීම වෙනුවෙන් දෙමළ මව්වරුන් දශක එකහමාරක් තිස්සේ මහපාරේ සිදු කරන අරගලය සම්බන්ධයෙන් කිසිදු තැකීමක් නැති ඇතැම් දෙමළ දේශපාලකයන් වත්මන් ජනාධිපතිවරයාගේ උතුරේ මැතිවරණ ප්‍රචාරයට සහාය දක්වන බවට යුද පීඩිතයන්ගේ දෝෂ දර්ශනයට ලක්වී සිටී.

යුද්ධයෙන් මරා දැමුණු දෙමළ නෑසියන් සමරා කැඳ බෙදීමට එරෙහිව ප්‍රචණ්ඩත්වය යෙදාවූ පොලිසිය වෙසක් දන්සල් වලට අනුග්‍රහ දැක්වීමට ද එහිදී විරෝධය පලවී තිබේ.

“2009 වසරේ ඉදන් මේ අතුරුදන් වූ පවුල් වල ඥාතීන් තම ඥාතීන් කොහේදැයි අසමින් අයාලේ යන බල්ලන් වගේ පාරේ සැරිසරනවා. ඒ අය මේ රටේ මිනීමැරුම් කරපු අයට උදව් කරලා අද සංවර්ධන සැලැස්මට අත දීලා තියෙනවා. ඉතින් මේ ජනාධිපතිතුමා ඊළඟ මැතිවරණයට තමන්ගේ හොර නාඩගම නටනවා. ජනවරම නැතිව ධූරයට පැමිණි ජනාධිපතිවරයා මේ ආකාරයට කටයුතු කරන්නේ ජනවරම ලබා ගන්න තමයි. අපේ දේශපාලකයෝ, ඇමැතිවරු ඒකට සහයෝගය දෙනවා.”

බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ වව්නියාව දිස්ත්‍රික් සභාපති සිවානන්දන් ජෙනීටා මාතාව මහත් ආවේගශීලීව එම චෝදනාව එල්ල කළේ තෙදින සංචාරයකට උතුරට ගිය ජනාධිපතිවරයා වව්නියාව දිස්ත්‍රික් ලේකම් කාර්යාලය තුළ සාකච්ඡාවක නිරතව සිටියදී එම ලේකම් කාර්යාලය ඉදිරිපිටදී දෙමළ මව්වරුන් පිරිසක් සමග කළු කොඩියක් අතැතිව විරෝධය පළ කරමිනි.

ජනාධිපති රනිල් වික්‍රමසිංහ මැයි මස 24, 25 සහ 26 දිනවල උතුරේ සංචාරයක යෙදි සිටියේ උතුරු පළාතේ සංවර්ධන ක්‍රියාදාමයන් පිළිබදව සොයා බැලීම සදහා යැයි ආණ්ඩුව විසින් ප්‍රකාශයට පත් කර තිබේ.

යුද්ධාවසානයේ යුද හමුදාවට භාර දුන් සිය සමීපතමයන් වෙනුවෙන් යුක්තිය ඉටු කිරීමට දශක එකහමාරක් තිස්සේ අපොහොසත් වු ශ්‍රී ලංකාවේ රාජ්‍ය නායකයන් සමග තවදුරටත් සාකච්ඡා පැවැත්වීමට ඇති දැඩි අකමැත්ත අතුරුදහන් කරනු ලැබුවන්ගේ ඥාතීන් ජනාධිපතිවරයාගේ සංචාරයට පෙරම පළ කර තිබුනි.

බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ වව්නියාව දිස්ත්‍රික් සභාපති සිවානන්දන් ජෙනීටා මාතාව ආණ්ඩුවට සහාය දක්වන දෙමළ දේශපාලනඥයන් හඳුන්වා දුන්නේ ‘විසි කරන මස් කටුව උස්සාගෙන යන්නවුන්’ ලෙසයි.

“එයාලා සැපට ජීවත්වෙන්න, දෙමළ ජනතාවගේ දුක් කන්දරාව නොදැන ඔවුන් පීඩාවට පත්වන ආකාරය දෙස බලාගෙන ජනාධිපතිතුමා සමඟ අත්වැල් බැඳගෙන ඉන්නවා. ප්‍රජාතන්ත්‍රවාදීව වීදියට බැහැලා සටන් කරන්න බැරිව, අපිට යුක්තිය ඉල්ලන්න බැරුව අපිව යටපත් කරලා පීඩාවට පත් කරලා, හිරේ දානවා. ඒක අහන්නේ නැති දෙමළුන් තමයි දේශපාලකයනුයි, ඇමැතියෝයි වෙලා ඉන්නේ.”

ඒකීය රාජ්‍යයක් තුළ රටේ බහුතර ජන වර්ගය වෙනුවෙන් පමණක් රාජ්‍ය නායකයා කටයුතු කරන බව පෙන්වා දෙන, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ගේ නායකත්වය හා පාර්ලිමේන්තු මන්ත්‍රී සෙල්වරාජා ගජේන්ද්‍රන්ගේ ලේකම් ධුරය යටතේ ක්‍රියාත්මක වන, දෙමළ ජාතික ජනතා පෙරමුණ (TNPF) පසුගියදා උතුරු නැගෙනහිර දෙමළ ජනයාගෙන් ඉල්ලා තිබුනේ ඉදිරි ජනාධිපතිවරණ වර්ජනය කරන ලෙසයි.

මර්දනයට බියෙන් දෙමළ ජනතාව කිසිවිටෙකත් තම අයිතිවාසිකම් අත්නොහරින බව සන්නිවේදනය කිරීමේ එකම මාර්ගය ලෙසද දෙමළ ජාතික ජනතා පෙරමුණ පෙන්වා දී තිබුනේ ජනාධිපතිවරණය වර්ජනය කිරීමයි.

එක රටක් – නීති දෙකක්

යුද්ධයේ අවසාන දිනවලදී මුහුදුබඩ බිම් තීරුවකට කොටුවී ෂෙල් වෙඩි, ගුවන් ප්‍රහාර සහ කාලතුවක්කු ප්‍රහාර වලට මැදිවී රෝගාබාධ සඳහා බෙහෙත් නොලැබ සිටි දෙමළ ජනතාවගෙන් සමහරකට නොමැරී දිවි ගලවාගන්නට පිහිටවු මුල්ලිවයික්කාල් කන්ජි නමින් ඉතිහාසගතවූ කැඳ දෙමළ වර්ග සංහාර සමරු සතිය නිමිත්තෙන් බෙදා දෙන අවස්ථාවේ දෙමළ ජනතාවට එරෙහිව ක්‍රියාත්මක කළ නීතිය වෙසක් සතියේ ක්‍රියාත්මන නොවීම සම්බන්ධයෙන්ද සිවානන්දන් ජෙනීටා මාතාව වව්නියාව දිස්ත්‍රික් ලේකම් කාර්යාලය ඉදිරිපිට දී ප්‍රශ්න කළාය.

“මුල්ලිවයිකාල් කැඳ පිසින විට තාඩන පීඩනවලට ලක්කර, සෞඛ්‍යාරක්ෂිත නැතැයි කියමින් ඒ කැද නවත්තලා, කැඳ හට්ටි වලට පයින් ගහලා එයාලව අත්අඩංගුවට ගත්තා. වෙසක් නිවාඩුවට මේ පොලිස් ස්ථානවල, පාරේ අයිනේ, කෑම බීම, අයිස්ක්‍රීම් සමඟ සැමරුම් කරනකොට එයාලාට කිසිදු නියාමනයක් හෝ සනීපාරක්ෂිත ක්‍රියාමාර්ග මුකුත් නැහැ. ඒ නිසා මෙතන බලනකොට සිංහල අයට එක නීතියක් දෙමළ අයට එක නීතියක්.”

යුද්ධාවසානයේ දෙමළ මව්වරුන් විසින් සියතින්ම රජයට බාර දුන් සමීපතමයන්ට අත් වු ඉරණම නොදන්නා බව පවසන ජනාධිපති රනිල් වික්‍රමසිංහගෙන් උතුරට සංවර්ධනය ඉල්ලමින් ඔහු පසුපස යෑමට ලැජ්ජාවක් නැතිදැයි සිවානන්දන් ජෙනීටා මාතාව එහිදී උතුරේ දෙමළ ජනතා නියෝජිතයන්ගෙන් ප්‍රශ්න කළාය.

“ඒ නිසා මම මේ දේශපාලනඥයන්ගෙන් සහ ඇමැතිවරුන්ගෙන් අහනවා. ඔයාලට ලැජ්ජ නැද්ද? දෙමළුන්ට යුක්තිය ඉල්ලන්නද යන්නේ? ඔහෙලා අද යුක්තිය ඉල්ලනවානම් පාරේ සැරිසරන ජනතාව ගැන පොඩ්ඩක් සිතන්න. එයාලාගේ අතට භාර දීපු ඥාතීන්ව නෑ කියපු ජනාධිපතිගෙන්, පොංගල් උත්සවයකට ඇවිල්ලා, නෑ කියපු ජනාධිපතිගෙන් ඔයාලා සංවර්ධනය ඉල්ලන්න යනවා. ඊලගට මොකක්ද කරන්න යන්නේ කියලා අහන්න යනවා.”

මැයි 24, 25 සහ 26

උතුරේ සංචාරයේ යෙදි සිටි ජනාධිපති රනිල් වික්‍රමසිංහ මැයි 24 වැනිදා යාපනය විශ්වවිද්‍යාලයේ වෛද්‍ය පීඨයේ ඉදිකළ සායනික පුහුණු සහ පර්යේෂණ අංශ ගොඩනැගිල්ල විවෘත කිරීමට මෙන්ම යාපනය තන්දෙයි සෙල්වා ශ්‍රවණාගාරයේ දී “උරුමය ” වැඩසටහන යටතේ යාපනය දිස්ත්‍රික්කයේ ජනතාවට ඉඩම් ඔප්පු ප්‍රදානය කිරීමට එක් විය.

මැයි 25 වැනිදා නෙදර්ලන්ත රජයේ අරමුදලින් රුපියල් මිලියන 5,320ක වියදමින් කිලිනොච්චි දිස්ත්‍රික් මහ රෝහලේ ඉදිකරන ලද කාන්තා සෞඛ්‍ය සේවා සඳහා වන විශිෂ්ටතා මධ්‍යස්ථානය විවෘත කිරීම, ඉරණමඩු නෙළුම් පියස ශාලාවේ දී “උරුමය” ඉඩම් ඔප්පු ලබාදීමේ කිලිනොච්චි දිස්ත්‍රික් වැඩසටහනට හා යාපනය තන්දෙයි සෙල්වා ශ්‍රවණාගාරයේ පැවති යාපනය දිස්ත්‍රික් ගුරු පත්වීම් ප්‍රදානෝත්සවයට ද එක්ව සිටියේය.

ජනාධිපති මාධ්‍ය ඒකකය පවසන්නේ දැනට රෝගාතුරව පසුවන උතුරු පලාත් සභාවේ හිටපු ප්‍රධාන අමාත්‍ය, පාර්ලිමේන්තු මන්ත්‍රී සී.වී. විග්නේෂ්වරන්ගේ සුව දුක් විමසීමට ජනාධිපති රනිල් වික්‍රමසිංහ 25 වැනිදා රාත්‍රියේ යාපනයේ පිහිටි ඔහුගේ නිවසට ගිය බවයි.

26 වැනිදා පුදුකුඩියිරිප්පු මධ්‍ය මහා විද්‍යාලයේ පැවති “උරුමය” ඉඩම් ඔප්පු ලබාදීමේ වව්නියා දිස්ත්‍රික් වැඩසටහනට, වවුනියාව දිස්ත්‍රික්කයේ ප්‍රාදේශීය ලේකම් කොට්ඨාස 04ක් හා මන්නාරම දිස්ත්‍රික්කයේ ප්‍රාදේශීය ලේකම් කොට්ඨාස 05 ක් ආවරණය වන පරිදි වවුනියාව මෝජෝ උත්සව ශාලාවේ දී සින්නක්කර ඉඩම් ඔප්පු 700ක් ලබාදීම, නෙදර්ලන්ත රජයේ සහයෝගය මත රුපියල් මිලියන 3329ක වියදමින් වව්නියාව දිස්ත්‍රික් මහ රෝහලේ ඉදිකළ හෘද රෝග හා වකුගඩු රෝග ඒකකය විවෘත කිරීම ද ජනාධිපතිවරයා විසින් සිදුකර තිබේ.

මෙම උත්සව සදහා හිටපු රාජ්‍ය ඇමැතිණි විජයකලා මහේෂ්වරන්, අමාත්‍ය ඩග්ලස් දේවානන්දා, පාර්ලිමේන්තු මන්ත්‍රීවරුන් වන ධර්මලිංගම් සිද්ධාර්ථන්, එම්.ඒ.සුමන්තිරන්, චාර්ල්ස් නිර්මලනාදන්, කුලසිංහම් දිලීපන්, එස් නෝගරාදලිංගම්, සෙල්වම් අඩෙක්කලනාදන්, හා උතුරු පළාත් සභාවේ සභාපති සී.වී.කේ.සිවඥානම් ද එක්වු බව ජනාධිපති මාධ්‍ය ඒකකය වැඩි දුරටත් නිවේදනය කර තිබේ.