වන්නි සමූහ මිනීවලේ ඉදිරි වැඩට ඉල්ලූ මුදලින් ලක්ෂ හතළිහක් කප්පාදු කරලා

යුද්ධයෙන් වැඩිම පීඩාවට පත් වන්නියෙන් එකොලොස් මසකට පෙර සොයා ගත් සමූහ මිනීවලේ නවතා ඇති කැනීම් යළි ආරම්භ කිරීම සඳහා ඉල්ලන ලද ප්‍රතිපාදන ලක්ෂ හතළිහකින් කප්පාදු කිරීමෙන් අනතුරුව ඒ සඳහා රජයේ අනුමැතිය ලැබී තිබේ.

ඒ බව හෙලිවුයේ කොක්කුතොඩුවායි සමූහ සුසානයේ කැනිම් සඳහා අධිකරණ අමාත්‍යාංශය විසින් මුල්‍ය පහසුකම් ලබා දෙනු ඇති බව මුලතිව් දිස්ත්‍රික් ලේකම් කාර්යාලය අධිකරණයට කළ දැනුම් දීමකිනි.

ඒ අනුව, මාස පහක් තිස්සේ අත්හිටුවා තිබූ විමර්ශන කටයුතු ආරම්භ කිරීම සම්බන්ධ ඊළඟ අධිකරණ විභාගය තවත් මාස එකහමාරකින් මිනීවල අසලදී පැවැත්වීමට මුලතිව් මහේස්ත්‍රාත් ධර්මලිංගම් ප්‍රදීපන් මැයි 16 වැනිදා විසින් නියම කරන ලද බව නීතිඥ ශාන්තිප්‍රගාසම් නිරංජන් ප්‍රදේශබද මාධ්‍යවේදීන් හා කියා සිටියේය.

“මුලතිව් ලේකම් කාර්යාලයේ ගණකාධිකාරීවරයා කිව්වා මුල්‍ය පහසුකම් ලබා දෙනවා කියලා. ඒ සමගම අතුරුදන්වූවන්ගේ කාර්යාලයෙන් මේ කාරණය තහවුරු කිරීම මත කොක්කුතොඩුවායි පාර හරහා හමුවූ ඉතිරි මිනිස් ඇටසැකිලි කොටස් කැණීම සඳහා නඩුව ජුලි මාසයේ 4 වැනි දිනට නියම කළා.”

දැනට සම්පූර්ණ ඇටසැකිලි 40ක් ගොඩගෙන ඇති කොක්කුතුඩුවායි සමූහ මිනීවලේ නවතා ඇති කැනීම් යළි ආරම්භ කිරීම දින නියමයක් නොමැතිව කල් යමින් පැවැතියේ විශේෂඥ මණ්ඩලයක් විසින් ඉල්ලා තිබු මුල්‍ය ප්‍රතිපාදන අධිකරණ අමාත්‍යාංශය විසින් අනුමත නොකිරීම නිසාය.

ඉදිරි කටයුතු සඳහා රුපියල් එක්කෝටි තිස්හත් ලක්ෂයක් අවශ්‍ය වෙතැයි පසුගිය අප්‍රේල් මාසයේ දී ගණන් බලා තිබුණි. එම ප්‍රමාණය නැවත සමාලෝචනය කරන ලෙස අධිකරණ අමාත්‍යාංශය විසින් කරන ලද ඉල්ලීම පරිදි සංශෝධනය කොට ඉල්ලන ලද ලක්ෂ 97ක මුදල ලිඛිතව අනුමත කොට ඇති බව මුලතිව් දිස්ත්‍රික් ලේකම් කාර්යාලයේ ප්‍රධාන ගණකාධිකාරී මයිල්වානගම් සෙල්වරත්නම් ප්‍රාදේශීය මාධ්‍යවේදීන්ට පවසා තිබේ.

ඉකුත් නොවැම්බරයේ කැනීම් නැවැත්වීමෙන් අනතුරුව කරන ලද භුගත ස්කෑන් පරීක්ෂණයකින් අනාවරණය වූ පරිදි මිනීවල යාබද මුලතිව් – කෝකිලායි මහාමාර්ගය යටින්ද විහිදෙයි.

නීතිඥ ශාන්තිප්‍රගාසම් නිරංජන් පවසන්නේ ඉදිරි කැනීම් කටයුතු සදහා අවශ්‍ය සහාය ලබා දෙන ලෙස අධිකරණය කොක්කුලායි පොලිසියට සහ මාර්ග සංවර්ධන අධිකාරියටද දැනුම් දුන් බවයි.

“මීට සමගාමීව විකල්ප මාර්ග ඉදිකිරීමට සහ කැණීම් කටයුතු සඳහා සහය වන ලෙස කොක්කුලායි පොලිසියට සහ මාර්ග සංවර්ධන අධිකාරියට දැනුම් දුන්නා.”

මුල්‍ය සම්පාදනයට පොරොන්දු දුන් OMP කාර්යාලයේ නියෝජිතයන් ද මෙදින අධිකරණයට පැමිණ සිටි බව පළාත්බද වාර්තාකරුවෝ පවසති.

කොක්කුතොඩුවායි සමූහ සුසානයෙන් මෙතෙක් ගොඩගෙන තිබෙන මිනිස් සිරුරු සම්බන්ධයෙන් ඉදිරි වෝහාරික පරීක්ෂණ සඳහා අවශ්‍ය මුදල් ලැබෙන්නේදැයි යන්න සම්බන්ධයෙන් පැහැදිලි තොරතුරක් නොමැත.

ජාත්‍යන්තර ප්‍රමිතිවලට අනුකුලව ශ්‍රී ලංකාවේ සමූහ මිනී වලවල් නිසියාකාර හඳුනාගෙන, ආරක්ෂා කොට, සංරක්ෂණය කර, විමර්ශන පවත්වන මෙන් එජා මානව හිමිකම් මහකොමසාරිස් කාර්යාලය විසින් පසුගිය සතියේ එළිදක්වන ලද බලහත්කාර අතුරුදහන් කිරීම් පිළිබඳ අලුත්ම වාර්තාවෙන් රජයට නිර්දේශ කර තිබේ.

කොක්කුතොඩුවායි විමර්ශනයට පුරෝගාමී වී සිටින වෝහාරික පුරාවිද්‍යාඥ මහාචාර්ය රාජ් සෝමදේව විසින් මාර්තු මාසයේ අධිකරණයට දැනුම් දී තිබුනේ සමූහ මිනීවලෙන් ගොඩගන්නා ලද අස්ථි කොටස් අනූව දශකය මැද භාගයේ අවිධිමත් ලෙස වල දමන ලද විමුක්ති කොටි සාමාජිකයන්ගේ බවයි.

ඔවුන් නිසැකයෙන්ම වෙඩි පහරින් මියගොස් ඇති බව ඔහුගේ පිළිගැනීමයි.

මහාචාර්යවරයා විසින් මුලතිව් අධිකරණයට බාර දෙන ලද පිටු 35 ක අතුරු වාර්තාවෙන් නිගමනය කර ඇත්තේ, කොක්කුතොඩුවායි සමූහ සුසානයෙන් ගොඩගන්නා ලද සිරුරු වල දමා ඇත්තේ චන්ද්‍රිකා බණ්ඩාරනායක කුමාරතුංග රාජ්‍ය පාලනයේ නියුතු 1994-1996 අතර කාලයේය.

වාර්තාව මගින් දක්වා තිබෙන කාල සීමාව තුළ සමූහ මිනීවළ හමුවී ඇති ප්‍රදේශය, මියගිය එවකට බ්‍රිගේඩියර් ජානක පෙරේරාගේ ආඥාපතිත්වයෙන් ක්‍රියාත්මක ශ්‍රී ලංකා යුද හමුදාවේ හයවැනි ‘වැලිඔය’ බලසේනාව යටතේ පැවති බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් අනාවරණය කර තිබේ.

“ඉහත සඳහන් කාල සීමාවේ මිනීවළ පිහිටා ඇති භූමියට යාබද කොක්කුතොඩුවායි යුද හමුදා කඳවුර, ක්‍රියාන්විත රාජකාරියේදී පසුව මියගිය ලුතිනන් කර්නල් රෝහිත වික්‍රමතිලක යටතේ ස්ථානගත කර තිබූ 4 වැනි ගැමුණු හේවා බලඇණිය යටතේ පැවතුණි. 1995 පෙබරවාරි සිට 1996 නොවැම්බර් දක්වා බලඇණි අණදෙන්නා වශයෙන් ක්‍රියාකරන ලද්දේ ලුතිනන් කර්නල් වික්‍රමතිලක ය,” යි JDS මාධ්‍ය වාර්තාවක දැක්වේ.

2023 සැප්තැම්බර් හා නොවැම්බර් අතර දින 21 ක් තුල මුලතිව් අධිකරණ වෛද්‍ය නිලධාරි කනගසබාපති වාසුදේවගේ ද සහභාගිත්වයෙන් අදියර දෙකක කැනීම්වලින් අනතුරුව ගොඩගන්නා ලද ස්ත්‍රී සහ පුරුෂ ඇටසැකිලි 40ක් ආශ්‍රිතව එළැඹ ඇති ප්‍රධාන නිගමන අනුව වලදැමූ අගලේ වැතිර සිටින මළවුන් දෙමළ ඊළාම් විමුක්ති කොටි (LTTE) සංවිධානයේ සටන්කරුවන් වන අතර එම සිරුරු වලදමා ඇත්තේ රහසිගතවය.

කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් 2023 ජුනි අගදී මිනිස් සිරුරු කොටස් සහ ඇඳුම් කැබලි අහම්බයෙන් හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.