දින හතරක් තුළ දෙවතාවක්ම පොලිසිය විසින් දෙමළ මාධ්‍ය ආයතනකට පැමිණිම හමුවේ නැවත වරක් දෙමළ මාධ්‍යවේදී මර්දනයක් ආරම්භ කර ඇතැයි මාධ්‍ය ක්‍රියාකාරීහු සැක පල කරති.
තමන් වැල්ලවත්ත පොලිස් ස්ථානයෙන් බැව් හඳුන්වා දෙමින් පැමිණි පොලිස් නිලධාරීන් කොළඹ පිහිටි අයි .බී.සී තමිල් කාර්යාලයට පැමිණ එහි සේවකයන්ගේ පුද්ගලික තොරතුරු ලබා දෙන ලෙස ඉල්ලා ඇත.
එම පොලිස් නිලධාරියා පැමිණි දිනයේම “වැල්ලවත්තේ සිට ක්‍රීයාත්මක කොටි ඩයස්පෝරා ටීවි සහ රේඩියෝවක්” නමින් පුවතක් කීර්ති වර්ණකුලසුරිය විසින් දිවයින පුවත්පතට ලියා තිබු අතර එම නාළිකව විසින් රජයේ හමුදාවන්ට සහ රජයට විරුද්ධව පුවත් ජත්‍යන්තරයේ පල කරන බවට චෝදනා කර තිබුණි.
සිවිල් ඇඳුමින් සැරසුන පොලිස් නිලධාරින් දෙදෙනකු පැමිණ තමන් පොලිස් මුලාස්ථානයෙන් බව හඳුන්වා දෙමින් 17 සඳුදා නැවත වැල්ලවත්තේ පිහිටි අයි .බී.සී තමිල් කාර්යාලයට පැමිණ ඇති අතර ඔවුන්ද එම කාර්යාලයේ සේවකයන්ගේ පුද්ගලික තොරතුරු ලේඛණයක් ඉල්ලා තිබේ.
කොටි නාළිකාව
තම නාලිකාව පිළිබඳව පැමිණිල්ලක් හෝ විමර්ශනයක් සිදුවන්නේ දැයි එම නාළිකාවේ මාධ්‍යවේදීන් ප්‍රශ්න කර සිටි අවස්ථාවේදී තමන් මනෝ නැමැති දෙමළ නාළිකාවක රැකියාවේ නිරත පුද්ගලයකු සම්බන්ධව සොයන බව එම පොලිස් නිලධාරින් පැවසු විට තම කාර්යාලයේ එවැන්නෙක් සේවයේ යෙදී නොමති බවට අයි .බී.සී තමිල් මාධ්‍ය සේවකයන් ඔවුන්ට දන්වා ඇත.
තම මාධ්‍ය ආයතනය මාධ්‍ය අමාත්‍යංශයේ ලියාපදිංචි ආයතනයක් බව පවසා ඇති අයි .බී.සී තමිල් සේවකයින් අවශ්‍ය තොරතුරුක් වෙතොත් එම අමාත්‍යංශයෙන් ලබා ගන්නා ලෙසට පොලිස් නිලධාරින්ට ප්‍රකාශ කර තිබේ.
දෙවන වතාවේ පොලිස් නිලධාරින් පැමිණිමට පෙර දින කීර්ති වර්ණකුලසුරිය විසින් “අයි .බී.සී තමිල් සේවය දෙමළ කොටි ඩයස්පොරා රූපවාහිනියක්” ලෙස හුවා දක්වමින් එහි ශ්‍රී ලංකාව පිළිබඳව අසත්‍ය තෙරතුරු පල කරන බවට ලිපියක් ලියා තිබුණි.
මෙම ආයතනයේ මාධ්‍යවේදීන් සිංහල සංවිධානයක් විසින් පැවැත්වු මාධ්‍ය හමුවකට සහභාගි වු බව සහ මාධ්‍ය හමුවෙන් පසු පැවැත්වු විඩියෝ ප්‍රදර්ශනයට සහභාගි වීම භයානක නොවේදැයි කිර්ති වර්ණකුලසුරිය සිය ලිපිය මඟින් ප්‍රශ්න කර සිටියි.
මර්දන ප්‍රයත්නයක්ද?
දෙමළ මාධ්‍ය ආයතනය මුහුණ දී ඇති සිදුවීම සම්බන්ධව නිවේදනයක් නිකුත් කරන ශ්‍රී ලංකාවේ ප්‍රජාතන්ත්‍රවාදය සඳහා වන මාධ්‍යවේදීන්ගේ සංවිධානය (JDS) දෙමළ ජනයාට එරෙහිව තවමත් සිදුවන සිදුවීම් වාර්තා කරන මාධ්‍ය ආයතන සිංහල මාධ්‍ය වල සහාය ඇතිව ආරක්ෂක අංශ විසින් නැවතත් මර්දනය කිරීමට උත්සාහ දරන්නේ දැයි සැක මතුවන බව පවසයි.
මෙවැනි උසි ගැන්වීම් මගින් සිංහල බහුතරයක් නියෝජනය කරන කොළඹ පිහිටි අයි .බී.සී තමිල් කාර්යාලයට එරෙහිව සිංහල දැඩි මතධාරින් විසින් යම් ප්‍රචන්ඩ ක්‍රීයාවක් සිදු කිරීමේ අවදානමක් ඇති බවට ජේඩීඑස් අනතුරු අඟවයි
Facebook Comments
