ඉස්කෝල උපකරණ සඳහා බදු අඩු නොකර සිසු දීමනා දෙන ප්‍රමාණය වැඩි කරයි

පාසැල් උපකරණ මත පනවා ඇති අධික බදු බර අඩු කර සියළු අධ්‍යාපන ප්‍රතිලාභින්ට සහන සලසන ලෙස රටේ ප්‍රමුඛතම ගුරු සංගමයක් රජයෙන් දැඩිව ඉල්ලා තිබියදී, පාසල් ළමුන්ට ලිපි ද්‍රව්‍ය ලබා ගැනීම සදහා රජයෙන් මුල්‍ය ආධාර ලබා දෙන ප්‍රතිලාභීන්ගේ සංඛ්‍යාව පමණක් ඉහළ දැමීමට රජය තීරණය කර තිබේ.

පාසල් දරුවන්ට අවශ්‍ය දෑ මිලදී ගැනීම වෙනුවෙන් අස්වැසුම ප්‍රතිලාභීන්ට පමණක් රුපියල් 6000 ක් බැගින් 2025 වසරේ ආරම්භයේදීම ලබා දීමට පසුගිය වසරේ රජය තීරණය කළ මොහොතේ ඊට විරෝධය පළ කරමින් ලංකා ගුරු සංගමය පෙන්වා දී තිබුනේ රජයේ මෙම තීරණය හේතුවෙන් අත්‍යවශ්‍ය දරුවන්ට පවා එම සහනය නොලැබී වන බවයි.

“අපි දන්නවා. ලංකාවේ පාසල් ශිෂ්‍යයෝ ගත්තොත් හතලිස් තුන් ලක්ෂයක් ඉන්නවා. මේ අයගෙන් අස්වැසුම ලාභින් ඉන්නේ ඉතාම සීමිත පිරිසක්. එතකොට අස්වැසුම ප්‍රතිලාභින්ට විතරක් මේක ලබා දුන්නොත් සමහර විට අත්‍යවශ්‍ය දරුවන්ට මේක මග හැරෙනවා. දිගින් දිගටම පාසල් උපකරණ සම්බන්ධයෙන් තිබිච්ච ඉල්ලීම තමයි මේ බද්ද අඩු කරන්න කියලා.”

2025 ජනවාරි 6 වැනිදා ජනාධිපති අනුර කුමාර දිසානායකගේ ප්‍රධානත්වයෙන් රැස් වු අමාත්‍ය මණ්ඩල රැස්වීමේදී අනුමැතිය දී ඇත්තේ පාසල් ළමුන්ට ලිපි ද්‍රව්‍ය ලබා දීමේ වැඩ සටහන යටතේ අස්වැසුම නොලබන අනෙකුත් සුදුසුකම් ලබන පවුල් වල ළමුන් සදහා ද රුපියල් හය දහසක දීමනාව ලබා දීමටයි.

“අස්වැසුම ප්‍රතිලාභි පවුල් වලට අයත් නොවන දෙමාපියන් අහිමි ළමුන්, මව හෝ පියා ආබාධිත පවුල් වල ළමුන්, ළමා නිවාසගත පාසල් වයසේ සිටින සියළුම ළමුන් සහ විශේෂ හේතු මත අසරණ භාවයට පත්ව ඇති කාණ්ඩවලට අයත් ළමුන් සදහා එම දීමනාව ලබා දීම අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය වෙත පවරනු ලැබ ඇත. ”

එම කාණ්ඩයන්ට අයත් පවුල් වල ළමුන් තෝරා ගැනීම සදහා නිවැරදි දත්ත පද්ධතියක් දැනට නොමැති බව අධ්‍යාපන අමාත්‍ය හරිණි අමරසූරිය අග්‍රාමාත්‍යවරිය පාර්ලිමේන්තුවට දැනුම් දුන්නාය .

එම හේතුව සහ යෝජිත ලිපි ද්‍රව්‍ය 2025 නව පාසල් වාරය ආරම්භයේදීම ලබා දීමේ අවශ්‍යතාව සැලකිල්ලට ගනිමින් දිවයින පුරා පිහිටි මුළු පාසල් 10096 අතුරින් ළමුන් සංඛ්‍යාව 300 ට අඩු පාසල් 6576 ක අස්වැසුම ප්‍රතිලා‍භි නොවන පවුල් වල සියළුම ළමුන්ට ළමා සංවර්ධන මධ්‍යස්ථානවල සිට පාසල් වෙත පැමිණෙන ළමුන්ට සහ පිරිවෙන්වල ඉගෙනුම ලබන ගිහි පැවැදි සිසුන්ට රුපියල් 6000 ක් බැගින් වු ලිපි ද්‍රව්‍ය දීමනාව ලබා දීමටත්, ඒකී දිමනාව වව්චර් පත්‍රයක් මගින් ලබා දීමටත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය වශයෙන් අග්‍රාමාත්‍යතුමිය විසින් ඉදිරිපත් කරන ලද යෝජනාව සදහා අමාත්‍ය මණ්ඩලයේ අනුමැතිය ලබා දුන් බව රජයේ නිවේදනයේ වැඩි දුරටත් සදහන්ව තිබේ.

ලංකා ගුරු සංගමයේ ප්‍රධාන ලේකම් ජෝසප් ස්ටාලින් පසුගිය වසර අවසානයේ රජයට පෙන්වා දී තිබුනේ පාසල් උපකරණ මත පවතින අධික බදු බර ඉවත් කිරීම තුලින් සරසවි සිසුන්ටද විශාල සහනයක් අත් වන බවයි.

” පාසල් උපකරණ මත තිබෙන බද්ධ අඩු කරොත් විශාල සහනයක් ලැබෙනවා. මොකද විශේෂයෙන්ම මේක පාසල් දරුවන්ට පමණක් නෙමෙයි. විශ්ව විද්‍යාල ශිෂ්‍යයෝ ඉන්නවා. ඔවුන්ට අදාලවත් ඉගෙනුම් උපකරණ තියනවා. මේ සියළු දේවල් වල බරපතල ආකාරයෙන් මිල ඉහළ ගිහිල්ලා තියෙන්නේ. එතකොට මේ අධ්‍යාපනයේ ප්‍රතිලාභින්ට මේක බරපතල ප්‍රශ්නයක් බවට පත් වෙනවා. මේක සහනයක් වෙන්නේ ඒ සදහා අධ්‍යාපන උපකරණ සම්බන්ධයෙන් විශේෂ අවධානයක් යොමු කිරීම තමයි. ඒක නිසා අපි පැහැදිලිවම රජයෙන් ඉල්ලීමක් කරන්නේ වහාම ඒ සම්බන්ධයෙන් අවධානය යොමු කරලා ඒ කටයුත්ත කරන්න කියන කාරණාව.”

පාසල් පොත් සහ උපකරණ සඳහා පනවා ඇති වැට් බද්ද ජාතික ජන බලවේගය සිය මැතිවරණ ප්‍රකාශනයෙන් පොරොන්දු වූ පරිදි ඉවත් කරන ලෙස බලකරමින් අන්තර් විශ්ව විද්‍යාල ශිෂ්‍ය බල මණ්ඩලය උද්ඝෝෂණයක්ද පවත්වා තිබේ.

අධ්‍යාපනයට 6%ක් වෙන්කරනු, 2025 අයවැයෙන් 3% ක් කරනු! යන්න තේමා කරගනිමින් අන්තර් විශ්ව විද්‍යාල ශිෂ්‍ය සංගමය ජනවාරි 8 වැනි බදාදා කොටුව දුම්රියපොළ ඉදිරිපිටදී දියත් කළ විරෝධතාවයේ මුලික ඉල්ලීමක්ද වී තිබුනේ දුන් පොරොන්දු ඉටු කරනු, VAT ඉවත් කර පාසැල් උපකරණ, නිළ ඇඳුම්, පොත්පත් මිල අඩු කරනු! යන්නයි.