ලොකුම දෙමළ මහවිරු සුසානයෙන් ‘යුද හමුදාව ඉවත් කරන්න’

දශක එක හමාරකට වැඩි කාලයක් තිස්සේ යුද හමුදාව විසින් බලහත්කාරයෙන් අත්පත්කරගෙන සිටින වන්නියේ පිහිටි විශාලතම මහවිරු සුසාන භුමිය සම්පුර්ණයෙන්ම නිදහස් කරන ලෙස ජනාධිපතිවරයාගෙන් ඉල්ලන සංදේශයකට අත්සන් ලබා ගැනීමේ ව්‍යාපාරයක් ආරම්භ කර තිබේ.

මුලතිව්, විශ්වමඩු පිහිටි තේරාවිල් මහවිරු සුසාන භුමි අනුස්මරණ කමිටුව විසින් ජනවාරි 8 වැනි බදාදා තේරාවිල් මහවිරු සුසාන භුමිය ඉදිරිපිටදී අත්සන් ලබා ගැනීම සිදු කළ බවයි පළාත් බද වාර්තාකරුවන් පවසන්නේ.

තේරාවිල් මහවිරු සුසාන භුමි අනුස්මරණ කමිටුවේ සාමාජිකයකු මාධ්‍යවේදීන් හමුවේ කියා සිටියේ සිය සමීපතමයන් සැතපී සිටින භුමිය බලහත්කාරයෙන් අත්පත්කරගෙන සිටින යුද හමුදාව එම භුමියේ වානිජ ව්‍යාපාරද සිදු කරන බවයි.

“මහවිරුවන් මිහිදන් කළ බොහෝ තැන්වල හමුදාව තවමත් වාඩිලාගෙන ඉන්නවා. තේරාවිල් මහවිරු සුසාන භුමියේත් අද වන තුරුත් හමුදාව රැදී සිටිනවා. මෙහි රැඳී සිටින්නේ හමුදාවේ කීහිප දෙනෙක් පමණයි. රා මැදලා එතන වෙළෙඳ ව්‍යාපාර කරනවා. අනුර කුමාර දිසානායක ප්‍රමුඛ රජය හමුදාව මෙතනින් ඉවත් කර දෙමාපියන්ට නිදහසේ අනුස්මරණ පැවැත්වීමට හැකි වන පරිදි මේ ස්ථානය ලබාදිය යුතුයි.”

තේරාවිල් මහවිරු සුසාන භුමි නිදහස් කරන ලෙස ඉල්ලා ප්‍රදේශවාසීන්ගෙන් ලබා ගන්නා අත්සන් උතුරු පළාත් ආණ්ඩුකාරවරයා හරහා ජනාධිපතිට යොමු කිරීම ඔවුන්ගේ අපේක්ෂාවයි.

ප්‍රදේශවාසීන් චෝදනා කරන්නේ ඝාතනයට ලක්වු හිටපු එල්.ටී.ටී.ඊ සාමාජිකයන් 7000 ක් පමණ සැතපී සිටින තේරාවිල් සුසාන භුමියෙන් සියයට හැත්තෑපහකට වැඩි භුමි ප්‍රමාණයක් යුද හමුදාව අත්පත්කරගෙන සිටින බවටයි.

මිය ගිය එල්.ටී.ටී.ඊ සාමාජිකයන් මිහිදන් කර තිබෙන භුමිය මත යුද හමුදාව ක්‍රිකට් සහ පාපන්දු ක්‍රීඩා කරන බවට චෝදනා කරන ඥාතීන් පසුගිය වසර කිහිපය තුලදී දිගින් දිගටම ඉල්ලා තිබුනේ තේරාවිල් සුසාන භුමිය සමීපයේ ස්ථාපිත කර තිබෙන යුද හමුදා කඳවුර වහාම එම ස්ථානයෙන් ඉවත් කරන ලෙසයි.

මහවිරුවන් ලෙස දෙමළ ජනයාගේ ගෞරවයට පාත්‍ර වන දසදහස් ගණනක් මිහිදන් කොට ඇති ‘තුයිලම් ඉල්ලම්’යනුවෙන් හැඳින්වෙන සුසාන භූමි ගණනාවක්ම රජයේ හමුදා විසින් විනාශ කොට යුද අවසානයෙන් පසු කඳවුරු ඉදිකොට තිබුනි.

එල්.ටී.ටී.ඊ. පාලනය යටතේ පැවති දෙමළ ජනතාවගේ භූමි ප්‍රදේශ හමුදාව විසින් අත්පත් කර ගැනීමත් සමඟ, උතුරු සහ නැඟෙනහිර ප්‍රදේශවල මියගිය දෙමළ සටන්කාමීන්ගේ සොහොන් 20,400 ක් පමණ තිබූ සුසාන භූමි 25 කට ආසන්න ප්‍රමාණයක් ශ්‍රී ලංකා යුද හමුදාව විසින් ඩෝසර් කර සමරු පලක කඩා බිඳ දමා තිබේ.

හින්දු සංස්කෘතියේ කොටසක් වන මළවුන්ට ගෞරව දැක්වීම එක්සත් ජාතීන්ගේ සංවිධානය විසින් මූලික අයිතිවාසිකමක් ලෙස ද ප්‍රකාශයට පත් කර ඇත. එම අයිතිය පිළිගන්නා බවට ජනාධිපති අනුර කුමාර දිසානායකද සහතික වී තිබේ.