උතුරේත් කඳුකරයේත් මලයහ දෙමළ විරු දින සමරු

කඳුරට දෙමළ ජනතාවගේ උරුමය වෙනුවෙන් සටන් වැදී දිවි දුන් විරුවන්ගේ දිනය උතුරේ දී සහ කඳුකරයේ දී අනුස්මරණය කර තිබේ.

2025 ජනවාරි 10 වැනි සිකුරාදා එම අනුස්මරණ යාපනය විශ්වවිද්‍යාලයේ දී සහ කොටගල කොමර්ෂල් ලේක් ප්‍රදේශයේදී සිදු කළ බවයි පළාත් බද වාර්තාකරුවන් පවසන්නේ.

වතු කම්කරුවන්ගේ වැටුප් අරගලය වෙනුවෙන් සටන් වැද සිටියදී පොලිස් සැරයන් සුරවීරගේ රයිෆල් උණ්ඩය 1940 ජනවාරි 10 දින හේවාහැට මුල්ඔය වතුයායේ ගෝවින්දන්ගේ ජීවිතය බිලිගෙන තිබුනි.

බ්‍රිතාන්‍ය අධිරාජ්‍යවාදීන්ට එරෙහි අරගලයක දිවිදුන් මුල්ම මලයහ දෙමළ විරුවා ලෙස සැලකෙන්නේ මුල්ඔය ගෝවින්දන් ය.

කම්කරු නායක ගෝවින්දන්ට උපහාර පිනිස සෑම වසරකම ජනවාරි 10 වැනි දින කඳුකර දිවි පිදූවන්ගේ දිනය ලෙස අනුස්මරණය කිරීමට 2019 දෙසැම්බර් 15 වැනි දින මලෛයග උරිමෛකුරල් සහ පිඩිතලරාතේ යන සංවිධාන දෙකේ සංවිධානත්වයෙන් පැවති වතු කම්කරු සමරු උත්සවයකදී යෝජනාවක් සම්මත කරගෙන තිබේ.

මෙවර කොටගල කොමර්ෂල් ලේක් ප්‍රදේශයේදී සිදු කළ අනුස්මරණය සිවිධානය කර ඇත්තේ පිඩි තලරාඩේ සංවිධානය විසිනි.

යාපනය විශ්වවිද්‍යාලයීය ශිෂ්‍ය සංගමයේ සංවිධානත්වයෙන් ජනවාරි 10 වැනි දා යාපනය විශ්වවිද්‍යාලය තුලදී සිසුන් රැසකගේ සහභාගීත්වයෙන් කඳුකර ජනතාවගේ උරුමය වෙනුවෙන් සටන් වැදී දිවි දුන් විරුවන්ගේ දිනය අනුස්මරණය කළ බව උතුරේ වාර්තාකරුවෝ පවසති.