පොලිස් වෙඩිල්ලෙන් මළ කම්කරු නායකයාට යුක්තිය ඉටුවී නෑ

දස අවුරුද්දකට ඉහත දී තරුණ කම්කරු නායකයකුගේ ජිවිතය බිලි ගනිමින් තවත් කම්කරුවන් දහස් ගණනක් පීඩාවට පත් කරමින් දියත් කරන ලද පොලිස් ප්‍රහාරයෙන් පීඩාවට පත්වූ කිසිම කම්කරුවෙකුට මේ වන තෙක් යුක්තිය ඉටුවී නොමැති බවට වෘත්තීය සමිති නායකයෝ චෝදනා කරති.

නිදහස් වෙළෙඳ කලාප සහයෝගීතාවය චෝදනා කරන්නේ ඔවුන් කිසිවකුටත් මේ දක්වා සාධාරණයක් ඉටුවී නොමැති බවයි.

“එහෙත් වින්දිතභාවයට පත්වූ මෙම කිසිම කම්කරුවෙකුට මේ වන තෙක් රජයෙන් සාධාරණයක් ඉටුවී නැත. සිද්ධිය පිළිබදව විමර්ශණය කිරීමට පත් කළ මහානාම තිලකරත්න ඒක පුද්ගල කොමිසම විසින් නිර්දේශ ඉදිරිපත් කළද එම නිර්දේශ බලාත්මක කිරීමට අදාළ බලධාරීන් අසමත් විය.”

සේවක අර්ථ සාධක අරමුදල ආරක්ෂා කර ගැනීම උදෙසා කටුනායක නිදහස් වෙළඳ කලාපයේ කම්කරුවන් විසින් දැවැන්ත අරගලයක් දියත් කළේ 2011 මැයි 30 දාය.

එම උද්ඝෝෂණයට පොලීසිය විසින් වෙඩි තැබීමෙන් පසුදා 22 හැවිරිදි රොෂේන් ශානක කම්කරුවා ඝාතනයට ලක්වූ අතර වෙඩි වැදුණු තවත් කම්කරුවන් හත් දෙනකු සදාකාලික ආබාධිතයන් බවට පත්විය.

උද්ඝෝෂණයට එල්ල කළ ප්‍රහාරවලින් කම්කරුවන් 400ක් පමණ රෝහල් ගතකළ අතර තවත් කම්කරුවන් 3000ක් පමණ ශාරීරික පීඩාවට පත්විය.

රොෂේන් ශානකගේ ඝාතනයට විරුද්ධව පැවරූ නඩුවද තවමත් මීගමුව මහාධිකරණයේ විභාග වෙමින් පවතී.

මෙම නඩු විභාගයට අදාළව සාක්ෂි විභාග කිරීම තවමත් අවසන් වී නැති තත්වයක් තුළ නඩුවේ තීන්දුව දෙස තව කොපමණ කලක් බලාසිටීමට සිදුවේදැයි යන්න අවිනිශ්චිත බවයි නිදහස් වෙළෙඳ කලාප සහයෝගීතාවය පවසන්නේ.

එම සහයෝගීතාවය නිකුත් කළ නිවේදනයක් මගින් පෙන්වා දී ඇත්තේ සේවක අර්ථසාධක අරගලය ජයග්‍රහණයෙන් අවසන් කිරීමට හැකි වූයේ විශේෂයෙන්ම වෙළඳ කලාප කම්කරුවන්ගේ දැඩි කැපකිරීම් මත බවයි.

පහරකෑමට ලක්වූ කම්කරුවන් විසින් ගොනු කරන ලද මූලික අයිතිවාසිකම් පෙත්සම සලකා බැලු ශ්‍රේෂ්ඨාධිකරණයේ තීන්දුව වූයේ මෙම උද්ඝෝෂණය විසුරුවා හැරීමේදී පොලීසිය විසින් බලය අත්තනෝමතික ලෙස භාවිත කර ඇති බවයි.

ප්‍රහාරයේ වගකීම භාරගෙන ධුරයෙන් ඉල්ලා අස්වූ එවක පොලිස්පති මහින්ද බාලසූරිය බ්‍රසීලයේ තානාපති තනතුරට පත්කර යැවූ හිටපු ජනාධිපති මහින්ද රාජපක්ෂ ඉන් අනතුරුව ඔහු නීතිය සහ සාමය පිළිබඳ අමාත්‍යාංශයේ ලේකම්වරයා වශයෙන් පත්කරන ලදී.

නිදහස් වෙළෙඳ කලාප සහයෝගීතාවය සිය නිවේදනය මගින් පෙන්වා දෙන්නේ අයිතිවාසිකම් කඩවූ කම්කරුවන්ට ලැබිය යුතු වන්දි මුදල් මේ වන තෙක් ලැබී නොමැති බවයි.

දහසය දෙනෙකුට වන්දි

කම්කරු නායකයකුගේ ජිවිතය බිලි ගනිමින් දියත් කරන ලද පොලිස් ප්‍රහාරයෙන් තුවල ලද දහසය දෙනකුට වන්දි ගෙවන ලෙසට රටේ ඉහලම අධිකරණය 2019 වසරේ අප්‍රේල් මස රජයට නියෝග කර තිුනි.

පොලිසියේ පහර කෑමට ලක්වු කටුනායක වෙළඳ කලාපයේ සේවකයන් විසින් ගොනු කරන ලද පෙත්සමේ තීන්දුව ප්‍රකාශයට පත් කරමින් විනිසුරු විජිත් මලල්ගොඩ කියා කියා තිබුනේ එම 16 දෙනාගේ අදහස් ප්‍රකාශනයේ අයිතිය ඇතුළු මූලික අයිතිවාසිකම් උල්ලංඝනය වී ඇති බවයි.

තුවාල වී දිවි ගලවාගත්තවුන්ට රුපියල් පනස් දහසේ සිට ලක්ෂ දෙකහමාරක් දක්වා වන්දි ගෙවීමට ශ්‍රේෂ්ඨාධිකරණය විසින් 2019 වසරේ ආණ්ඩුවට නියම කර තිබුනි.

කලාපයේ අලූත් පරම්පරාව

සේවක අර්ථ සාධක අරමුදල ආරක්ෂා කර ගැනීම උදෙසා ජීවිත පරිත්‍යාගයෙන් දස වසරකට පෙර සිදු කළ අරගලය සම්බන්ධයෙන් කලාපයේ අලුත් පරම්පරාවේ අවධානයක් නැතිවීම සම්බන්ධයෙන්ද නිදහස් වෙළෙඳ කලාප සහයෝගීතාවයට ඇත්තේ කනස්සල්ලකි.

“අර්ථසාධකයට හිමිකම් කියන බොහෝ අයට අද මෙය අමතකව ඇති අතර කලාපයේ අලූත් පරම්පරාව තුළ මෙම ජයග්‍රාහී අරගලය හා ඉන් වින්දිතභාවයට පත්වූවන් පිළිබදව ඇත්තේ සුලූ අවධානයකි. මේ සැම මුහුණ දිය හැකි අභියෝගය නම් 2011දී පරාජය කළ විශ්‍රාම වැටුප් පනත් කෙටුම්පත නැවත වරක් වෙනත් මුහුණුවරකින් ඉදිරිපත් වීමට තිඛෙන ඉඩකඩයි. මන්දයත් ඒ පිළිබදව වත්මන් ආණ්ඩුව විවිධ අවස්ථාවලදී ඉඟි පළ කරමින් සිටී.”

වෘත්තීය සමිති පිහිටුවා ගැනීම කම්කරුවන්ගේ අයිතිවාසිකමක් වන නමුත් ලංකාවේ කලින් කලට ආණ්ඩු බලය හෙබවූ පාලක පක්ෂය එම නීතිමය කොන්දේසි නොතකා හරිමින් කටයුතු කරන ආකාරය ඉතා සෝචනීය බවත් සිය නිවේදනය මගින් නිදහස් වෙළෙඳ කලාප සහයෝගීතාවය පෙන්වා දී තිබේ.

“කලාපය තුළ වෘත්තීය සමිති පිහිටුවීමට තිඛෙන නෛතික ඉඩකඩ පවා අහුරා දැමීමට පාලකයන් යුහුසුලූ වී සිටී. එය කලාපය තුළ කම්කරුවන්ගේ සමාගමයේ නිදහස සහ අයිතිය අහුරා දැමීමකි.

එමෙන්ම කොවිඩ් 19 වසංගතයේ සීඝ්‍ර ව්‍යාප්තිය හේතුවෙන් කලාපයේ කම්කරුවන්ගේ රැකියා අහිමි වෙමින් තිබේ. මෙවැනි වඩාත් අභියෝගාත්මක තත්ත්වයක් තුළ කළ යුත්තේ කුමක්දැයි මීට වඩා බරපතල ලෙස කල්පනා කිරීමට කම්කරුවන් ඇතුළු සියලූම අය බලකරමින් සිටී.”

වසංගතය හා රැකියාවේ සුරක්ෂිතබව

එබැවින් කොඩිඩ් 19 වසංගතය තුළ පීඩාවට පත්ව සිටින ප්‍රජාවන් අතර ආයෝජන කලාපවල සේවයේ නියුතු කම්කරු ප්‍රජාවගේ සෞඛ්‍ය තත්ත්වය සමග රැකියාවේ සුරක්ෂිතභාවය පිළිබදව අවධානය යොමු කළ යුතු බව පෙන්වා දෙන නිදහස් වෙළෙඳ කලාප සහයෝගීතාවය ප්‍රමුඛතාවය දිය යුතු මුලික කරුණු හතරක් ඉස්මතු කර දී තිබේ.

•කොවිඩ් 19 එන්නත්කරණ වැඩපිළිවෙල තුළ නිදහස් වෙළෙඳ කලාපවල සේවයේ නියුතු කම්කරුවන්ට ප්‍රමුඛතාව ලබා දිය යුතු අතර PCR පරීක්ෂණ කඩිනම් කිරීම වැදගත්ය.

•එමෙන්ම කර්මාන්ත ශාලා තුළ සනීපාරක්ෂක ක්‍රමවේද වැඩි දියුණු කළ යුතු සේම හදුනාගත් ආසාදිතයන් අදාළ කර්මාන්ත ශාලාවේ ප්‍රතිපාදන යටතේ නිරෝධායන ක්‍රියාවලියට යොමු කළ යුතු වන්නේ සුවය ලැබූ පසු ඔවුන්ව කඩිනමින් සේවය සදහා සම්බන්ධ කර ගැනීම සදහාය.

•යම් කර්මාන්ත ශාලාවක් කෝවිඩ් 19 වෛරසයට නිරාවරණය වීම මත වසා දැමීමට සිදුවුව හොත් එහි කම්කරුවන් හට මාසික වැටුප ලබා දිය යුතු අතර කර්මාන්ත ශාලාව වසා නොදමන තත්ත්වයක් යටතේ නිරෝධානයට යොමු කළ කම්කරුවන්ට නිරෝධායන කාල සීමාව තුළ වැටුප් සහිත නිවාඩු ලබා දීමට එහි පාලනාධිකාරිය විසින් කටයුතු කළ යුතුය.

•මෑන්පවර් සහ ස්ථීර නොවන කම්කරුවන්ද ඇතුළත් වන පරිදි රුපියල් 5000ක සහන සලාකයක් මාසිකව ලබා දිය යුතුය.

මෙම ඉල්ලීම් සාධාරණ පදනමක සිට ඉදිරිපත් කරනුයේ විශේෂයෙන්ම 2020 මාර්තු සහ 2021 පෙබරවාරි මාසයට සාපේක්ෂව මේ වන විට අපනයනය මෙන්ම ආනයනයද සැලකිය යුතු මට්ටමේ ඉහළ ප්‍රතිශතයක පවතින තත්වය යටතේ බව නිදහස් වෙළෙඳ කලාප සහයෝගීතාවය අවධාරණය කරයි.