යුරෝපා සංගමයේ නියෝජිත කණ්ඩායමක් ලංකාවට පැමිණීමට සතියක් තිබිය දී යුරෝපයේ ප්‍රධාන නගරයකට රැස්වූ ලාංකිකයන් පිරිසක් ශ්‍රී ලංකාවේ ආණ්ඩුව විරුද්ධවාදීන්ට එරෙහිව කරගෙන යන මර්දනයට එරෙහිව උද්ඝෝෂණයක් පවත්වා තිබේ.
සමගි ජන බලවේගයේ, ජනතා විමුක්ති පෙරමුණේ, පෙරටුගාමී සමාජවාදී පක්ෂයේ, සහ එක්සත් ජාතික පක්ෂයේ ප්‍රංශ ශාඛා එක්ව ප්‍රජාතන්ත්‍රවාදය සදහා ලාංකිකයෝ නමින් විරෝධතාව ප්‍රංශයේ පැරිස් අගනුවර රිපබ්ලික් චතුරශ්‍රයේදී 18 වැනිදා පවත්වන ලදී.
ප්‍රංශයට අමතරව ස්විට්සර්ලන්තය වැනි ආසන්න රටවලින් ද පැමිණි සිංහල ඩයස්පෝරා කණ්ඩායම් ද ඇතුළුව 75 කට වැඩි පිරිසක් සහභාගිවූ මෙහිදී ලංකාවේ ආණ්ඩුව විසින් සිය විරුද්ධවාදීන්ට එරෙහිව ගෙන යන මර්දනයට එරෙහිව සටන් පාඨ හා විරෝධතා පුවරු ප්‍රදර්ශනය කරනු දක්නට ලැබිණි.
උද්ඝෝෂකයන්
මෙහිදී කියා සිටියේ අත් අඩංගුවට ගත් අන්තර් විශ්ව විද්‍යාල ශිෂ්‍ය බල මණ්ඩලයේ හා පෙරටුගාමී සමාජවාදී පක්ෂයේ ක්‍රියාධරයන් දිගින් දිගටම සිර කර තබා ගැනීමත්, එසේ රඳවා ගෙන සිටීමේදී කොවිඩ් රෝගය වැළඳීමත් නිසා ඔවුන් ජිවිත අවදානමක සිටින බවය.
අන්තර් විශ්ව විද්‍යාල ශිෂ්‍ය බල මණ්ඩලයේ හා පෙරටුගාමී සමාජවාදී පක්ෂ ක්‍රියාධරයන් පොලිසිය මගින් අත් අඩංගුවට ගෙන සිරගත කරනු ලැබුයේ අධ්‍යාපන මිලිටරිකරණයට හා පෞද්ගලීකරණයට යටත් කෙරෙන කොතලාවල පනතට එරෙහිව විරෝධතා දැක්වීම හේතුවෙනි.
ලංකාවේ ආණ්ඩුවට විරෝධය දක්වා සිංහල ඩයස්පෝරාවේ උද්ඝෝෂණයක් ඉකුත් 12 වැනිදා ඉතාලියේ බොලොඤ්ඤා නුවර දී පැවැත්විනී.
පාස්කු ප්‍රහාරයේ මහ මොලකරු හෙළි කරන ලෙස විරෝධතා කරුවන් ඉල්ලා සිටියේ අගමැති මහින්ද රාජපක්‍ෂ සහභාගි වූ සර්ව ආගමික සමුළුවක් ඉදිරිපිටයි.
Facebook Comments
