ජාතික සමගිය සහ සංහිඳියාව ගොඩනැගීමේදී දහම් අධ්‍යාපනය වෙත පුළුල් වගකීමක් පැවරෙන බව ජනාධිපතිවරයා අවධාරණය කර සිටී.
ජාතික ඒකාබද්ධතාවය හා ප‍්‍රතිසන්ධානය පිළිබඳ සංකල්පය සර්වාගමික නායකවරු සහ සර්වාගමික දහම් පාසල් ගුරුභවතුන් හරහා දහම් පාසල් අධ්‍යාපනය තුළ ආයතන ගත කිරීමේ අරමුණින් ජාතික ඒකාබද්ධතා හා ප‍්‍රතිසන්ධාන අමාත්‍යාංශය විසින් සංවිධානය කල සර්ව ආගමික දහම් පාසල් කතිකාවට එක් වෙමින් ජනාධිපති මෛත්‍රීපාල සිරිසේන මේ බව පැවසීය.
කුමන ජාතියකට හෝ ආගමකට අයත් වුවත් දරුවන් අතර අන්‍යොන්‍ය විශ්වාසය සහ සහෝදරත්වය ගොඩනැගීමට දහම් අධ්‍යාපනය තුළින් කටයුතු කළ යුතු බව පෙන්වා දෙන ජනාධිපතිවරයා පරාජිත මානසිකත්වයෙන් මිදුණු ධනාත්මක ආකල්ප සහිත යහපත් අනාගත පරපුරක් ගොඩනැගීමට දහම් අධ්‍යාපනය පිටුවහලක් විය යුතු බවටද කියා සිටියේය.
ජාතික ඒකාබද්ධතා හා ප‍්‍රතිසන්ධාන සතිය සිහිපත් කරමින් සමරු මුද්දරයක් සහ මුල්දින කවරයක් නිකුත් කිරීම ද මෙහිදී සිදු කෙරුණු අතර තැපැල් අමාත්‍ය එච්.එම්. අබ්දුල් හලීම් විසින් එය ජනාධිපති මෛත්‍රීපාල සිරිසේන වෙත පිළිගැන්වීය.
Facebook Comments
