යහපාලන රජය විසින් වාර්ගික සංහිඳියාව සහ ජාතික සමඟිය ඇති කිරීම වෙනුවෙන් ගෙන යනු ලබන වැඩපිළිවෙල ජාතික හා අන්තර්ජාතික වශයෙන් ප්‍රශංසාවට ලක්වී ඇති බවත් ඒ සදහා කැප වන ලෙසත් ජනාධිපතිවරයා රට වැසියන්ගෙන් ඉල්ලා සිටී.
සංහිඳියාව සම්බන්ධයෙන් ආණ්ඩුව ගෙන යන වැඩපිළිවෙල පිලිබඳ සතුට පල කරමින් ආර්ථික නිදහස වෙනුවෙන් කැපවෙන ලෙසට ජනාධිපති මෛත්‍රීපාල සිරිසේන ජනතාවගෙන් ඉල්ලා සිටියේ රාජ්‍ය නිදහස් දින උළෙල අමතමින්ය.
රට තුළ වාර්ගික සංහිඳියාව සහ ජාතික සමඟිය ඇති කිරීම සඳහා රජයක් ලෙස විශාල කැපවීමක් කරන මොහොතක එය කඩාකප්පල් කිරීමට උත්සාහ කරන බලවේග “මාතෘ භූමියට එරෙහි බලවේග” ලෙසයි ජනාධිපතිවරයා හඳුන්වන්නේ.
සියවසට ගැළපෙන රාජ්‍යයක් ගොඩනැඟීමේදී දේශපාලන ස්ථාවරභාවය මෙන්ම සමාජ සංවර්ධනය ඉතා අවශ්‍ය බව පෙන්වා දුන් ජනාධිපතිවරයා එම සාධක ඉටුකර ගැනීම සඳහා රට තුළ වාර්ගික සංහිඳියාව සහ ආගමික සහජීවනය ශක්තිමත්වීම අත්‍යාවශ්‍ය බව ද අවධාරණය කළේය.
යුද්ධයෙන් ලක්ෂයකට අධික ජනතාවක් මියගිය බව සිහිපත් කල ජනාධිපතිවරයා ශ්‍රී ලංකාවාසීන්ගෙන් විමසා සිටියේ එයින් ගැලවුනු සියලු දෙනා ජයග්‍රාහකයන්ද යන්නයි.
එම ඛේදවාචකයෙන් මියනොගොස් ජීවත්වන සියලුදෙනාම ඉන් උගතයුතු පාඩම මෙනෙහි කිරීම ඉතා අත්‍යාවශ්‍ය බවටයි ජනපති මෛත්‍රීපාල සිරිසේන විශ්වාසය පල කර සිටියේ.
ප්‍රශංසාව සහ ප්‍රතික්ෂේප කිරීම
මේ අතර පසුගියදා අගමැති රනිල් වික්‍රමසිංහගේ ඩාවොස් සංචාරයේදී හමුවු ජගත් මානව හිමිකම් ප්‍රධානි සෙයිඩ් රාද් අල් හුසේන් මානව හිමිකම් සම්බන්ධයෙන් ආණ්ඩුවේ හෙමින් ගමන දෝෂ දර්ශනයට ලක් කර තිබු අතරම යුද අපරාධ සම්බන්ධයෙන් යුක්තිය පසිඳලීම සඳහා පිහිටුවන අනාගත අධිකරණ යාන්ත්‍රණයක් සඳහා විදේශීය විනිශ්චයකාරවරුන් නිර්දේශ කළ ආචාර්ය මනෝරි මුත්තෙට්ටුවේගමගේ ප්‍රධානත්වයෙන් යුත් කමිටු වාර්තාව ප්‍රශංසාවට ලක් කර තිබුණි.
මහ කොමසාරිස් සෙයිඩ් ගේ ප්‍රශංසාවට ලක් වුනු සංහිඳියාව උදෙසා වන ප්‍රවිචාරණ කාර්ය සාධක බලකායේ වාර්තාවේ නිර්දේශ කෙරෙන විදේශීය විනිශ්චයකරුවන්ගෙන් සමන්විත යාන්ත්‍රණය අධිකරණ ඇමැති ඇතුළු රජයේ අමාත්‍යවරුන් කිහිප දෙනකු විසින් පමණක් නොව ජාතික සංහිඳියාව හා සමගිය කාර්යාංශය භාරව සිටින හිටපු ජනාධිපතිනි චන්ද්‍රිකා බණ්ඩාරනායක කුමාරතුංග විසින්ද ප්‍රතික්ෂේප කොට තිබේ.
Facebook Comments
