කොරෝනා ව්‍යාධියට EPF සල්ලි යෙදවීම ගැන ආණ්ඩුවේ ගැටුම දිග්ගැසේ

0
1140
Ivory Agency Sri Lanka
HailHost
wedding people

සේවක අර්ථසාධක අරමුදලින් කෝටි ගණනක් ආපසු ලබා ගැනීම සඳහා කරන ලද යෝජනාවකට රජය තුලින් මතුවූ විරෝධයට ප්‍රතිඋත්තර දෙන අග්‍රාමාත්‍යවරයාගේ ප්‍රධානම ආර්ථික උපදේශකයෙක් “සාම්ප්‍රදායික රාමුවට පිටතින්” නොසිතුවොත් රට බරපතල ආර්ථික පීඩාවකට ලක්වන බවට අනතුරු අඟවා තිබේ.

නව වසංගත ව්‍යප්තිය හමුවේ රටේ ආර්ථිකය ගොඩ ගැනීම වෙනුවෙන් සේවක අර්ථසාධක අරමුදලේ (EPF) සාමාජිකයන්ගේ රුපියල් බිලියන 2,500 ක් පමණ වන වර්තමාන අරමුදල් ශේෂයෙන් 20% ක් පමණ එම සාමාජිකයන්ට කොන්දේසි විරහිතව සෘජුව ආපසු ලබා දීම කොවිඩ් 19 වසංගතයෙන් අනතුරුව රට ගොඩගැනීමේ විසඳුමක් ලෙස හිටපු මහබැංකු අධිපති අජිත් නිවාඩ් කබ්රාල් ආණ්ඩුවට යෝජනා කර තිබුනි.

ඊට විරුද්ධව යමින් විදේශ සබඳතා, නිපුනතා සංවර්ධන, රැකී රක්ෂා හා කම්කරු සබඳතා අමාත්‍ය දිනේෂ් ගුණවර්ධන සදහන් කර තිබුනේ සේවක අර්ථසාධක අරමුදලට අත තැබීමට රජය කිසිසේත් සූදානම් නොමැති බවයි.

“විශේෂඥයකු ලෙසින්” තමන් විසින් ඉදිරිපත් කොට ඇති “තාක්ෂණික සහ වෘත්තිමය අදහස් වලට” සමහර දේශපාලනඥයන් සහ ඔවුන්ගේ සහකරුවන් දේශපාලන කෝණයකින් විවේචනය කිරීම හේතුවෙන්, තමා කිසිසේත් අමනාප හෝ අධෛර්ය නොවන බවයි අග්‍රාමාත්‍ය ජ්‍යෙෂ්ඨ ආර්ථික උපදේශක අජිත් නිවාඩ් කබ්රාල් පවසන්නේ.

“ඒ සමගම, මා ඔවුනට තවදුරටත් කියන්නේ මේ නව ගෝලීය අර්බුදය ඉදිරියේ, සාම්ප්‍රදායික රාමුවට පිටතින් සිතා ශ්‍රී ලංකාවේ ආර්ථිකය රැක ගැනීමට අප කටයුතු නොකළහොත්, අප සියලු දෙනාටම ඉතා විශාල පීඩනයකට ලක් වන්නට සිදුවන බව ය,” යි සිය මුහුණු පොතේ සටහනක් තබමින් අජිත් නිවාඩ් කබ්රාල් ඒ බව සදහන් කර තිබේ.

සේවක අර්ථසාධක අරමුදලේ මුදල් එලියට ඇදීමෙන් රුපියල් බිලියන 500 ක් පමණ මෙරට ආර්ථිකයට අලුතින් එක් කළ හැකි බවට විශ්වාසය පල කරන ඔහු “ඊට වඩා හොඳ අදහස්” ඇතියවුන්ට අභියෝගයක්ද කරයි.

“එහෙත්, වෙනත් පුද්ගලයකු හට ඊට වඩා හොඳ අදහස් හා උපාය මාර්ග තිබිය හැකි බවද මා නිහතමානීව පිළිගනිමි. එවැනි අදහස් සහ උපාය මාර්ග තිබේ නම්, එවැනි ප්‍රතිපත්ති හෝ උපාය මාර්ග ක්‍රියාත්මක කරන ලෙසත් මා ඔවුන්ගෙන් සාදරයෙන් ඉල්ලා සිටීමට කැමැත්තෙමි” යි හිටපු මහ බැංකු අධිපතිවරයා වැඩි දුරටත් සදහන් කර තිබේ.

Facebook Comments

HailHost