අලුත් ව්‍යවස්ථාවෙන් බෙදුම්වාදයට තිත

0

යෝජිත නව ආණ්ඩුක්‍රමය ව්‍යවස්ථාව සම්මත කර ගැනිමෙන් පසු රට තුල බෙදුම්වාදයට කිසිඳු ඉඩක් නොමැති බව අගමැතිවරයා අවධාරණය කරයි.

නව ආණ්ඩුක්‍රම ව්‍යවස්ථා කෙටුම්පතක් සම්පාදනය කිරීම සඳහා පත් කළ මෙහෙයුම් කමිටුව අවුරුද්දකට වැඩි කාලයක් තිස්සේ රැස්වී නිම කළ අතුරු වාර්තාව පාර්ලිමේන්තුවේ සභාගත කරමින් 21 බ්‍රහස්පතින්දා අගමැති රනිල් වික්‍රමසිංහ පාර්ලිමේන්තුවට දැනුම් දුන් පරිදි ශ්‍රී ලංකාව ඒකීය රාජ්‍යයක් ලෙස පවත්වාගෙන යාමට නිර්දේශ කර ඇති අතුරු කමිටු වාර්තාවේ බලය බෙදීමේ මූලධර්ම ද ඇතුළත් වේ.

“අතීතයේ තිබුණු බෙදුම්වාදී භයානක ස්වරූපයෙන් ඈත්ව අනාගතය කෙරෙහි යොමු වූ නව දිශාවකට ගමන් කිරීම,” අලුත් ව්‍යවස්ථාවෙන් අපේක්ෂා කෙරෙන දේශපාලන වෙනස ලෙස අගමැතිවරයා ප්‍රකාශ කළේය.

පාර්ලිමේන්තුවට ඉදිරිපත් කර ඇති යෝජනාවලියේ දැක්වෙන කොන්දේසි වලට ප්‍රධාන පක්ෂ දෙක අනුමැතිය පල කරන්නේ නම් දෙමළ ජාතික සන්ධානයත් ඊට එකඟ වීමට සහතික වී තිබේ.

ඓතිහාසික අවස්ථාවක්

දහතුන්වැනි ව්‍යවස්ථා සංශෝධනයෙන් පසු බලය බෙදීම සඳහා ඉදිරිපත් කරනු ලැබූ යෝජනා කිසිවක් රටේ නීතිය බවට පත් කරනු නොලැබූ බව පෙන්වා දුන් විපක්ෂ නායකයා දෙමළ ජනතාවද හවුල් වන එජාප ශ්‍රීලනිප එකඟතාවකින් ව්‍යවස්ථාවක් සම්මත කර ගැනීමේ අවස්ථාවක් මින් පෙර කිසිදාක ශ්‍රී ලංකාවට උදාවී නැති බව අවධාරණය කළේය.

උදාවී ඇත්තේ ඓතිහාසික වශයෙන් වටිනා අවස්ථාව ගිලිහී යන්නට ඉඩ දිය නොහැකි බව විපක්ෂනායක ආර් සම්බන්ධන් කියා සිටි අතර රට නොබෙදන ව්‍යවස්ථාවක් වෙනුවෙන් පෙනී ඉන්නා බව විපක්ෂයේත්, දෙමළ ජාතික සන්ධානයේත් නායකයා පාර්ලිමේන්තුව හමුවේ සහතික විය.

“මෙය සිදු කරනු ලබන්නේ එක්සත්, නොබෙදුනු හා නොබෙදිය හැකි ශ්‍රී ලංකාවක ශක්තිමත් රාමුවක් තුලය,” යි ඔහු සඳහන් කළේය.

අගමැතිවරයා හා විපක්ෂ නායකයා හැරුනු කොට මෙහෙයුම් කමිටුවේ සෙසු සාමාජිකයන් වන්නේ නිමල් සිරිපාල ද සිල්වා, රවුෆ් හකීම්, ලක්ෂ්මන් කිරිඇල්ල, සුසිල් ප්‍රේමජයන්ත, රිෂාඩ් බදියුදීන්, පාඨලී චම්පික රණවක, ඩී.එම්. ස්වාමිනාදන්, මනෝ ගනේෂන්, මලික් සමරවික්‍රම, ඩිලාන් පෙරේරා, දිනේෂ් ගුණවර්ධන, ඩග්ලස් දේවානන්ද, අනුර දිසානායක, විජයදාස රාජපක්ෂ, බිමල් රත්නායක, එම්.ඒ. සුමන්දිරන්, ප්‍රසන්න රණතුංග, ආචාර්ය ජයම්පති වික්‍රමරත්න සහ ආචාර්ය තුසිතා විජේමාන්න මැති මැතිණියන්ය.

Facebook Comments