රාජපක්ෂ පාලන සමයේ සිදුවු දුෂණ වංචා සහ සියලු අපරාධ සම්බන්ධව සිදු කෙරෙන විමර්ශන නවතා දමන ලෙස ජනාධිපතිවරයා විසින් නියෝග කර තිබේ.
මහින්ද රාජපක්ෂ හට අගමැති ධුරය ලබා දීමෙන් පසු ජනපති මෙසේ රහස් පොලිසිය, මුල්‍ය අපරාධ ඒකකය ඇතුළු විමර්ශන ඒකක වෙත නියෝග නිකුත් කළ බව නම සඳහන් නොකරන ලෙස ඉල්ලා සිටි උසස් පොලිස් නිලධාරියකු සිලෝන් නිවුස් වෙත කියා සිටියේය.
ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අත් අඩංගුවට නොගන්නා ලෙස ද මීට දින කිහිපයකට පෙර නියෝග නිකුත් කර ඇති ජනපති මෛත්‍රීපාල සිරිසේන, රාජපක්ෂ සමයේ සිදුවු අනෙකුත් අපරාධ සම්බන්ධ පරීක්ෂණද නවතා දමන්නැයි නියෝග කර ඇත.
“මාණ්ඩලික ප්‍රධානියාව අත්අඩංගුවට නොගෙන ඉන්නේ අපේ නොහැකියාවකට නෙමෙයි. ජනාධිපතිතුමා සැර පරුෂ විදිහට කතා කරලා අපේ ඉහළ නිලධාරින්ට කියලා තියනවා අද්මිරාල් විජේගුණරත්නව මොනම හේතුවකටවත් අත්අඩංගුවට ගන්නත් එපා, සීඅයිඩියට කැඳවලා ප්‍රකාශ ගන්නත් එපාය කියලා,”
“මාධ්‍යවේදීන් මරා දාපුවා උස්සපු ඔක්කොම ඒවා නවත්තන්න කියළා ඉහළින්ම අපිට නියෝග ආවා අපිත් අසරණ වෙලා ඉන්න,” යැයි මහත් පරිශ්‍රමයක් යොදා සිලෝන් නිවුස් විසින් සම්බන්ධ කර ගන්නා ලද උසස් පොලිස් නිලධාරියා සඳහන් කළේය.
රාජපක්ෂවරුන්ට එරෙහි අපරාධ සම්බන්ධව විමර්ශන සිදු කළ තමන් ඇතුළු නිලධාරින් හට පොලිසියේ සිටින රාජපක්ෂ හිතවාදී නිලධාරීන්ගෙන් දැනටමත් අඩන්තේට්ටම් සිදුවෙමින් පවතින බව ශෝකයෙන් යුතුව කී පොලිස් නිලධාරියා “අපිට මොනව වෙයිද කියල අපි දන්නෙ නෑ.” යි වැඩි දුරටත් කියා සිටියේය.
ජනාධිපතිවරයා විසින් අගමැති ධුරයේ පිහිටුවීමත් සමගම මහින්ද රාජපක්ෂ සහ ගොඨාභය රාජපක්ෂ දෙදෙනා පොලිස්පතිවරයා කැඳවා උපදෙස් දෙන ආකාරය දැක්වෙන වීඩියෝවක් සමාජ මාධ්‍ය ඔස්සේ පල කොට තිබුනි.
Facebook Comments
