නොමිලේ අධ්‍යාපනයට හඬ නඟන “ශිෂ්‍ය මර්ධනය නවතන්නැ” යි ජේඩීඑස් රජයට බල කරයි

0
480
wedding people

නොමිලේ අධ්‍යාපන පිළිවෙතට පටහැනිව උසස් අධ්‍යාපනය පුද්ගලීකරණය සම්බන්ධයෙන් ආණ්ඩුව ගෙන යන වැඩපිළවෙලට එරෙහිව හඬ නඟන ශිෂ්‍ය ප්‍රජාවට එරෙහිව දියත් කර ඇති අමානුෂික මර්ධනය වහාම හකුලා ගන්නා ලෙසට ශ්‍රී ලංකාවේ ප්‍රජාතන්ත්‍රවාදය සඳහා වන මාධ්‍යවේදීන්ගේ සංවිධානය (JDS) ආණ්ඩුවට බල කර සිටියි.

අන්තර් විශ්ව විද්‍යාල ශිෂ්‍ය බල මණ්ඩලය විසින් සංවිධානය කරන ලදුව ඉකුත් ජූනි 21 වැනිදා පැවති විරෝධතා ව්‍යාපාරයේදී පොලිසිය විසින් අත්අඩංගුවට ගැනුණු සිසුන් අවම වශයෙන් පස් දෙනෙක්වත් මේ වනවිටත් රිමාන්ඩ් භාරයේ රඳවා සිටින බවයි එම සංවිධානය නිවේදනයක් නිකුත් කරමින් පෙන්වා දෙන්නේ.

එදින පැවති විරෝධතාවයට පොලිස් කැරළි මර්දන ඒකකය හා විශේෂ කාර්ය බලකාය කල පහර දීමෙන් විශාල සිසු – සිසුවියන් පිරිසක් තුවාල ලබා ඇති බව මෙන්ම එම පහර දීමෙන් නොනැවතුණු ආණ්ඩුව අධිකරණ නියෝගයක්ද ලබා ගනිමින් ශිෂ්‍ය ක්‍රියාකාරීන් අත්අඩංගුවේ රඳවාගෙන සිටින බවටයි ජේඩීඑස් චෝදනා කරන්නේ.

අත් අඩංගුවට ගෙන ඇත්තේ නොමිලේ අධ්‍යාපන පිළිවෙතට පටහැනිව යමින් දකුණු ආසියානු තාක්‍ෂණික සහ වෛද්‍ය ආයතනය නමින් පුද්ගලික වෛද්‍ය විද්‍යාලයක් ස්ථාපිත කිරීමට ආණ්ඩුව ගෙනයන වැඩ පිළිවෙලට එරෙහිව අඛණ්ඩව සංවිධානය කරන ලද ශිෂ්‍ය විරෝධතා ව්‍යාපාරයේ පෙරමුණ ගෙන ක්‍රියාකළ ශිෂ්‍ය ක්‍රියාකාරිකයන් බවයි ජේඩීඑස් සංවිධාන පවසන්නේ.

පොලිස් සැලසුම් ගැන බියට පත් සිසුන්

තවදුරටත් පොලිසියේ බලපෑම් මත අධිකරණය විසින් අන්තර් විශ්වවිද්‍යාල භික්ෂු බලමණ්ඩලයේ වැඩබලන කැඳවුම්කරු රත්කරව්වේ ජිනරතන හිමි, අන්තර් විශ්වවිද්‍යාල ශිෂ්‍ය බලමණ්ඩලයේ වැඩබලන කැඳවුම්කරු මංගල මද්දුමගේ ඇතුළු ශිෂ්‍ය ක්‍රියාකාරීකයන් ද අත් අඩංගුවට ගැනීමට වරෙන්තු නිකුත් කරනු ලැබ ඇති බව පවසන එම සංවිධානය එය පවත්නා “මර්දනකාරී තත්ත්වය තවදුරටත් තීව්‍ර කිරිමක්” ලෙස අවධාරණය කරයි.

රටපුරා තවත් ශිෂ්‍ය ක්‍රියාකාරීන් සියයක් පමණ අත් අඩංගුවට ගැනීමට ඇති පොලිස් සැලසුම් මාධ්‍ය මඟින් හෙළිවීමත් සමඟ පවතින මර්ධනකාරී තත්ත්වය හමුවේ බියට පත්ව ඇති ශිෂ්‍ය ක්‍රියාකාරීන් සිය ආරක්ෂාව පතා සැඟවී සිටීමට පෙළඹී ඇති බව ශ්‍රී ලංකාවේ ප්‍රජාතන්ත්‍රවාදය සඳහා වන මාධ්‍යවේදීන්ගේ සංවිධානය (JDS) සිය නිවේදනය හරහා අනාවරණය කර ඇත.

ප්‍රජාතාන්ත්‍රික අයිතිය ස්ථාපිත කරන්න

”උසාවිය සහ පොලීසිය යොදාගනිමින් විරෝධතා මැඩලීමට කටයුතු කිරීම මගින්, අධිකරණ සහ ආරක්ෂක සේවා ප්‍රතිසංස්කරණය කිරීම සම්බන්ධයෙන් මීට පෙර ජාත්‍යන්තරව‍ ලබාදුන් පොරොන්දු ඉටු කිරීමට අවශ්‍ය දේශපාලන අභිලාෂය තමන්ට නැති බව ආණ්ඩුව නිර්ලජ්ජිත ලෙස පෙන්වා දී ඇතැ”යි ජේඩීඑස් සංවිධානය චෝදනා කරයි.

බන්ධනාගාර ගතකළ ශිෂ්‍ය ක්‍රීයාකාරින් වහාම නිදහස් කරන ලෙස රජයට බලකර සිටින ශ්‍රී ලංකාවේ ප්‍රජාතන්ත්‍රවාදය සඳහා වන මාධ්‍යවේදීන්ගේ සංවිධානය විරෝධය පළ කිරීම සඳහා සිසුන්ට ඇති ප්‍රජාතාන්ත්‍රික අයිතිය ස්ථාපිත කරන මෙන් ශ්‍රී ලංකාවේ වගකිවයුතු අංශවලට බලපෑම් කරන්නැයි ජාත්‍යන්තර මානව හිමිකම් සංවිධානවලින් ද ඉල්ලා ඇති බව එම නිවේදනයේ වැඩි දුරටත් දක්වා ඇත.

Facebook Comments