ගත වු වසර දෙක හමාරක කාලය තුළ කවුරුන් කෙසේ කීව ද සම්මුතිවාදී ආණ්ඩුවේ ගමන් මඟ සාර්ථක බව ජනාධිපතිවරයා පවසයි.
ශක්තිමත් ආර්ථිකයක් ගොඩනැගීමේ අරමුණින් මීට වසර දෙක හමාරකට පෙර ප‍්‍රධාන පක්ෂ දෙක එකතුවී ගොඩනගන ලද සම්මුතිවාදී ආණ්ඩුවේ පොහොසත් රටක් හදන දැක්ම “V2025” එළිදැක්වීම 04 සඳුදා කොළඹ බණ්ඩාරනායක ජාත්‍යන්තර සම්මන්ත‍්‍රණ ශාලාවේදී ජනාධිපති මෛත්‍රීපාල සිරිසේනගේ සහ අග‍්‍රාමාත්‍ය රනිල් වික‍්‍රමසිංහගේ ප‍්‍රධානත්වයෙන් පැවැත්වුණු අතර එහිදී අදහස් දක්වමින් ජනාධිපතිවරයා මේ බව ප‍්‍රකාශ කළේය.
සම්මුතිවාදී ආණ්ඩුව ගොඩනගමින් මීට පෙර කිසිවෙකු නොදුටු අලූත් දේශපාලන අත්දැකීමක් රටට ලබාදුන්නේ රටේත්, ජනතාවගේත් අනාගතය වෙනුවෙන් බවයි ජනාධිපතිවරයා මෙහිදී කියා සිටියේ.
ආණ්ඩුවේ ගමනට කෙතරම් විවේචන, විරෝධතා සහ චෝදනා එල්ලවුව ද එම ගමන්මග අභියෝගාත්මක වුවද රටත් ජනතාවත් වෙනුවෙන් අනිවාර්යෙන් ඉටුකළ යුතු කාර්යයක් බව ජනාධිතිවරයා අවධාරණය කළේය.
වසර 60 කට වැඩි කාලයක් විරසකව සිටි රටේ ප‍්‍රධාන දේශපාලන පක්ෂ දෙක එක්කරමින් ගොඩනගන ලද සම්මුතිවාදී ආණ්ඩුවේ ප‍්‍රතිඵල ඉතා කෙටි කලකින් සියයට සීයයක් සාර්ථක කර ගත නොහැකි වුවත් විනයෙන් සහ හික්මීමෙන් යුතුව කටයුතු කරමින් එම අභියෝගාත්මක වගකීම ඉටුකිරීමට පසුගිය වසර දෙක හමාර තුළ සියලු දෙනාට හැකි වූ බවයි ජනපති මෛත්‍රීපාල සිරිසේන පෙන්වා දෙන්නේ.
ඉදිරියට ද සම්මුතිවාදී ආණ්ඩුවේ ගමන මනා අවබෝධයකින් යුතුව ශක්තිමත් ලෙස ඉදිරියට ගෙනයමින් රටත්, ජනතාවත් වෙනුවෙන් වූ වගකීම නොපිරි හෙළා ඉටු කරන බව ද ජනාධිපතිවරයා වැඩි දුරටත් අවධාරණය කළේය.
Facebook Comments
