ජනාධිපතිවරණය පැවැත්වීමට මැතිවරණ කොමිසම විසින් නිකුත් කරන ලද ගැසට් පත්‍රය බල රහිත කරන මෙන් ඉල්ලා ශ්‍රී ලංකා නිදහස් පක්ෂ ගාල්ල ආසන සංවිධායකවරයා ශ්‍රේෂ්ඨාධිකරණයට පෙත්සමක් ඉදිරිපත් කර තිබේ.
මැතිවරණ කොමිසමේ සභාපති මහින්ද දේශප්‍රිය එම කොමිසමේ සාමාජිකයන් සහ නීතිපතිවරයා නම් කර ඇති පෙත්සම ඉදිරිපත් කර ඇත්තේ ගාල්ල හිටපු නගරාධිපති මෙත්සිරි ද සිල්වා විසිනි.
ජනාධිපති මෛත්‍රීපාල සිරිසේන 2015 වසරේ ජනවාරි මස 8 වන දා පැවති ජනාධිපතිවරණයේදී ජනාධිපතිවරයා වශයෙන් තේරී පත් වූයේ වසර හයක ධුර කාලයක් සඳහා බවයි ඔහු පෙත්සමෙන් පෙන්වා දී ඇත්තේ.
එබැවින් ජනාධිපතිවරයාගේ ධුර කාලයෙන් වසර 5ක් ගෙවුණු විගස ජනාධිපතිවරණයක් කැඳවීමට මැතිවරණ කොමිසම හට බලයක් නොමැති බවයි ශ්‍රිලනිප සංවිධායක සිය පෙත්සමින් කියා සිටින්නේ.
මැතිවරණ කොමිසමේ එම තීරණය ආණ්ඩුක්‍රම ව්‍යවස්ථාවට පටහැනි බව පෙන්වා දෙන පෙත්සම්කරු ජනාධිපතිවරණයක් පැවැත්වීම සඳහා මැතිවරණ කොමිසම විසින් නිකුත් කර තිබෙන ගැසට් නිවේදනය බලරහිත කිරීමේ නියෝගයක් නිකුත් කරන මෙන් ඉල්ලා සිටී.
මීට අමතරව ජනාධිපතිවරණය සඳහා ලබන 07 වනදා නාමයෝජනා පත්‍ර භාර ගැනීම වැළැක්වීමේ අතුරු නියෝගයක් නිකුත් කරන මෙන් ද පෙත්සම්කරු ශ්‍රේෂ්ඨාධිකරණයෙන් වැඩි දුරටත් ඉල්ලීමක් කර ඇත.
Facebook Comments
