උතුරේ දියත් කළ යුද්ධයේ දී ශ්‍රී ලංකා හමුදාව ඝාතනය කරන ලද්දේ කොටි සාමාජිකයින් පමණක්ද යන්න යුද්ධය දියත් කිරීමට රාජපක්ෂ පාලනයට සහාය දුන් වත්මන් රජයේ සම කැබිනට් ප්‍රකාශකවරයා මාධ්‍යවේදීන්ගෙන් ප්‍රශ්න කළේය.
යුද්ධයක දී හමුදාව අතින් සිවිල් ජනයා ඝාතනය වන බවට සම කැබිනට් ප්‍රකාශක 16 බදාදා පැවති කැබිනට් තීරණ දැනුම් දෙන මාධ්‍ය හමුවේදී කියා සිටියේය.
“විරුවන් අතින් ඝාතනය වුනේ අපේම දරුවොනේ. ඒක අනුව තමයි සහජීවනය උඩ අපි ඒව සමරන එක නැවැත්තුවේ” යි ඇමැතිවරයා කී විට “ඇමතිතුමා විරුවන් අතින් ඝාතනය වුනේ ත්‍රස්තවාදීන්” යැයි මාධ්‍යවේදියා තරයේ කියා සිටි අතර “ත්‍රස්වාදින් විතරද ඝාතනයේ වුනේ” ඇමැති රාජිත සේනාරත්න පෙරළා ප්‍රශ්න කරණු ලැබීය.
මාධ්‍යවේදියා එයට පිළිතුරු ලබා නොදුන් අතර යුද්ධයකදී පැහැදිලිවම සිවිල් ජනයා ඝාතනය වන බවත් “දැන් 71 කැරැල්ලෙ දී ඝාතනය වුනේ ජවිපෙ ත්‍රස්තවාදීන්ද 88 කැරැල්ලෙදි ඝාතනය වුනේ ඔක්කොම ත්‍රස්තවාදීන්ද” සම කැබිනට් ප්‍රකාශවරයා විමසා සිටියේය.
කොටි සංවිධානය ජවිපෙට වඩා වෙනස් යැයි මාධ්‍යවේදීයා කියා සිටි අතර ඇමැති රාජිත සේනාරත්න පෙරළා එම සංවිධාන දෙකෙහි වෙනස පැහැදිලි කරන ලෙස ඉල්ලා සිටියේය.
ආණ්ඩුව හා යුද වැදුනු එම සංවිධාන දෙකම ත්‍රස්තවාදී ලෙසින් හැඳින්වූ දොස්තර සේනාරත්න එම සංවිධාන දෙකටම මියගිය සගයන් සැමරීමේ අයිතියක් ඇති බව ප්‍රකාශ කළේය.
උතුරේ යුද්ධයේ දී ඝාතනය වුයේ අපේම දරුවන් බව කී සම කැබිනට් ප්‍රකාශකවරයා එය රට තුල සිවිල් යුද්ධයක් බවට මාධ්‍යවේදීන් හට පෙන්වා දෙන ලදී.
“අපිට ත්‍රස්තවාදීන් වුනාට ඒ මිනිස්සුන්ගේ අම්මලා තාත්තාලා අක්කලා නංගිලා දරුවෝ පුත්තු දුවලා ඒගොල්ලන්ට” යි සම කැබිනට් ප්‍රකාශක වෛද්‍ය රාජිත සේනාරත්න අවධාරණය කර සිටියේය.
Facebook Comments
