උතුරේ පැවති යුද්ධය හේතුවෙන් කඩා වැටුණු කිලිනොච්චි දිස්ත්‍රික්කයේ පාසල්වල අධ්‍යාපන කටයුතු නගා සිටුවීම සඳහා දකුණු කොරියාවේ කොයිකා (KOICA) ආයතනයෙන් පරිත්‍යාගයක් ලබා දී තිබේ.
අමාත්‍ය අකිල විරාජ් කාරියවසම්ගේ ඉල්ලීමකට අනුව රුපියල් මිලියන 1,200කට ආසන්න මුදලක් මේ සඳහා ලැබුණ බවයි අධ්‍යාපන අමාත්‍යංශය පවසන්නේ.
අදාළ ගිවිසුමට කොයිකා ආයතනය වෙනුවෙන් එහි දේශිය නියෝජිත ලී ඩොන් කු, අධ්‍යාපන අමාත්‍යාංශය වෙනුවෙන් අධ්‍යාපන ලේකම් සුනිල් හෙට්ටිආරච්චි සහ විදේශ සම්පත් දෙපාර්තමේන්තුව වෙනුවෙන් එහි අධ්‍යක්ෂ ජනරාල් ප්‍රියන්ත රත්නායක අත්සන් තබා ඇත.
කිලිනොච්චි දිස්ත්‍රික්කයේ තෝරාගත් පාසල්වල ගොඩනැගිලි හා විශේෂ පන්ති කාමර ඉදිකිරීමට සැලසුම් කර ඇති අතර විදුහල්පතිවරුන්, ගුරු උපදේශකවරුන් සහ අධ්‍යාපන අධ්‍යක්ෂවරුන් සඳහා දේශිය හා විදේශීය පුහුණු අවස්ථා ලබාදීමට අමතරව මාපියන් සහ ජනතාව දැනුවත් කිරීමේ කටයුතු සිදු කිරීමටත් සැලසුම් කර ඇති බව අධ්‍යාපන අමාත්‍යංශය නිවේදනය කරයි.
අධ්‍යාපන අමාත්‍ය අකිල විරාජ් කාරියවසම් පසුගිය වසරේ දකුණු කොරියාවේ සිදු කරන ලද සංචාරයක දී කරනු ලැබූ ඉල්ලීමකට අනුව කොයිකා ආයතනය මෙරට අධ්‍යාපන පහසුකම් නගා සිටුවීමට ලබා දෙන මුල්‍ය පරිත්‍යාග වැඩිකිරීමට කැමැත්ත පළ කර ඇති බවයි එම අමාත්‍යංශය වැඩි දුරටත් පවසන්නේ.
Facebook Comments
