කොරෝනා වසංගතයට මුහුණ දීම සඳහා ශ්‍රී ලංකාව ගන්නා පියවර හමුදාකරණය සම්බන්ධයෙන් දේශීය හා ජාත්‍යන්තර විරෝධතා මතුවෙමින් පැවතියදී නාවික හමුදාවද පොලිසියේ රාජකාරි වල නිරතව ඉන්නා බව කොව්ඩ් – 19 පැතිරීම වැළැක්වීම භාර යුද හමුදාපතිවරයා විසින් හෙළි කොට තිබේ.
ස්වයං නිරෝධායන නීති උල්ලංඝනය කළ පිරිසක් අත් අඩංගුවට ගැනීම සඳහා නාවික හමුදාවද සහාය වූ බව රටේ ජ්‍යෙෂ්ඨතම යුද හමුදා නිලධාරියා විසින් සති අන්තයේ ප්‍රකාශයට පත් කරන ලද්දේ සෞඛ්‍ය ඇමැතිනී පවිත්‍රා වන්නිආරච්චි, සෞඛ්‍ය සේවා අධ්‍යක්‍ෂ ජෙනරාල් විශේෂඥ වෛද්‍ය අනිල් ජාසිංහ සහ නියෝජ්‍ය පොලිස්පති නීතිඥ අජිත් රෝහණ සහභාගී වූ මාධ්‍ය හමුවකදීය.
“තවද, පසුගිය දින ජාඇල ප්‍රදේශයෙන් කොවිඩි – 19 වෛරසය ආසාදිත වී හඳුනාගත් පුද්ගලයෙකු සමීපව ඇසුරු කළ පුද්ගලයින් 23 දෙනෙකු ස්වයං නිරෝධායනය සඳහා අනුගතව සිටියදී එම නිරෝධායන ක්‍රමවේදයට පටහැනිව ක්‍රියාකිරීම හේතුවෙන් ඊයේ දින නාවික හමුදා බුද්ධි අංශයේ සහයෝගය ඇතිව පොලිසිය විසින් ඔවුන් අත්අඩංගුවට ගෙන නැගෙනහිර පළාතේ පිහිටි නාවික හමුදාව විසින් පවත්වාගෙන යනු ලබන ඔලුවිල් නිරෝධායන මධ්‍යස්ථානය වෙත යොමු කරනු ලැබුවා,” යි ලුතිනන් ජෙනරාල් ශවේන්ද්‍ර සිල්වා කියා සිටියේය.
දැනට ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන 12 ක් තුළ පුද්ගලයින් 1455 දෙනෙකු තවදුරටත් නිරෝධායන ක්‍රියාවලියේ යොදවමින් සිටින බව කොව්ඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථාන ප්‍රධානියා වැඩි දුරටත් ප්‍රකාශ කොට තිබේ.
වසංගත අර්බුදය කළමනාකරණය සඳහා කිසිදු සිවිල් අධීක්ෂණයකින් තොරව හමුදා නිලධාරීන් පත් කර තිබීම සම්බන්ධයෙන් රජයේ වෛද්‍ය නිලධාරීන්ගේ සංගමය ඇතුළු දේශීය හා ජාත්‍යන්තර සංවිධානවල මෙන්ම හිටපු අගමැතිවරයාගේත් ප්‍රශ්න කිරීමට තුඩු දී තිබුණි.
Facebook Comments
