ජනාධිපතිවරයා විසින් ප්‍රකාශිත පෞද්ගලික ඉඩම් පවරා නොගැනීමේ ප්‍රතිපත්තියට පටහැනිව යමින් නාවික හමුදාව විසින් උතුරේ දෙමළ ජනයාට අයත් භූමියක් අත්පත් කරගැනීමට දැරූ තවත් උත්සාහයක් දෙමළ දේශපාලනඥයන්ගේ සහ ගම් වැසියන්ගේ විරෝධය හමුවේ අසාර්ථක වී තිබේ.
යාපනයේ, කරෙයිනගර් නීලන්කාඩු ග්‍රම සේවා වසමේ පදිංචි පවුල් 67 ට අයත් ඉඩම් අක්කර 50ක භූමියක් නාවික හමුදා කඳවුරක් ඉදිකිරීම සදහා මැන වෙන් කිරීමට පෙබරවාරි 19 සිකුරාදා මිනින්දෝරු දෙපාර්තමේන්තුවේ නිලධාරීන් පැමිණ සිටි බව උතුරේ වාර්තාකරුවෝ පවසති.
පැමිණ සිටි මිනින්දෝරු දෙපාර්තමේන්තුවේ නිලධාරීන්ට ප්‍රදේශයේ දේශපාලනඥයන්ගේ සහ ගම් වැසියන්ගේ බලවත් විරෝධය හමුවේ මැනීම් කටයුතු සිදු නොකරම ආපසු හැරී යන්නට සිදුව තිබේ.
මිනින්දෝරු දෙපාර්තමේන්තුව ඉඩම මැන මායිම් කිරීම සඳහා පැමිණි බව සැලවීමත් සමග උතුරේ දෙමළ දේශපාලන පක්ෂ කිහිපයකම නියෝජිතයන් එම ස්ථානයට පැමිණ තිබේ.
දෙමළ ජාතික සන්ධානයේ සහ දෙමළ ජාතික ජනතා පෙරමුණේ නියෝජිතයන්ද ඒ අතර වු බව පළාත් බද වාර්තාකරුවෝ වැඩි දුරටත් පවසති.
“එළියට යන්න නාවික හමුදා. එළියට යන්න අපේ ඉඩම් අපිට ඕනේ ” විරෝධතාවය දැක්වු එක් දෙමළ තරුණයෙක් සිංහල බසින් ප්‍රකාශ කළේය.
නාවික හමුදා කදවුර වෙනුවෙන් ඉඩම් මැනිමේ කටයුතු සදහා පෙබරවාරි 19 උදෑසන 9.30 ට එම ප්‍රදේශයට පැමිණෙන බව යාපනය රජයේ මිනින්දෝරු නිලධාරී ශ්‍රී ධුර්ගානන්දන් කල් වේලා ඇතිවම ප්‍රදේශවාසී ජනතාවට නිවේදනය කර තිබුනි.
දිගින් දිගටම දරන උත්සාහයන්
නාවික හමුදා කඳවුරක් වෙනුවෙන් උතුරේ දෙමළ වැසියන්ගේ ඉඩම් අත්පත්කරගැනීමට දින කීපයක් තිස්සේ දැරූ තවත් උත්සාහයක් ප්‍රදේශවාසී ජනයාගේ අඛණ්ඩ විරෝධය හමුවේ මේ වසර මුලදී වැළකී ගොස් තිබුනි.
මිනින්දෝරු දෙපාර්තමේන්තුවේ නිලධාරීන්, ප්‍රාදේශීය ලේකම් ද කැටුව නාවික හමුදා කදවුරකට වෙන් කිරීම සදහා, මන්ඩතිව් හි පෞද්ගලික ඉඩම් මැන වෙන් කිරීම 2021 ජනවාරි 18 සඳුදා නැවත වතාවක් උත්සාහ ගෙන තිබුනි.
එයට ප්‍රදේශවාසීන්ගෙන් සහ දෙමළ ජනතා නියෝජිතයන්ගෙන් මතු වූ විරෝධය හමුවේ එම නිලධාරීන්ට ආපසු හැරී යාමට සිදු විය.
යාපනයේ, වේලනෙයි ප්‍රදේශිය ලේකම් කොට්ඨාශයේ මන්ඩතීවූ J-7 ග්‍රාම සේවා වසමේ පිහිටි භූමියක් මන්ඩතීවූ නාවික හමුදා කඳවුර තවත් පුළුල් කිරීම වෙනුවෙන් ඉඩම් හිමියන්ගේ අකැමැත්ත නොතකා මැනීම සදහා 2020 වසරේ නොවැම්බර් 10 අගහරුවාදා නාවික හමුදාව, මිනින්දෝරු දෙපාර්තමේන්තුවේ නිලධාරීන් සමග පැමිණ උත්සාහ දැරුවද දේශපාලනඥයන්ගේ සහ ගම් වැසියන්ගේ විරෝධය හමුවේ අසාර්ථක වී තිබුනි.
යාපනයේ, වේලනෙයි ප්‍රදේශිය ලේකම් කොට්ඨාශයේ මන්ඩතීවූ ග්‍රාම සේවා පිහිටි පුද්ගලයන් සිව් දෙනකුට අයත් අක්කර හතරකට ආසන්න ඉඩම් ප්‍රමාණයක් මන්ඩතීවූ නාවික හමුදා කඳවුර තවත් පුළුල් කිරීම වෙනුවෙන් ඉඩම් හිමියන්ගේ අකැමැත්ත නොතකා නිල වශයෙන් පවරා ගැනීමට 2020 වසරේම අගෝස්තු 28 සිකුරාදා නාවික හමුදාව දැරූ වෑයමත් ප්‍රදේශවාසීන් සහ ගම් වැසියන් එක්ව ව්‍යාර්ථ කර තිබුනි.
ආණ්ඩුවේ ‘ප්‍රතිපත්තිය’
ජීවිකාව පවත්වාගෙන යාමට අවශ්‍ය ඉඩම්වලින් කිසිවකු ඉවත් නොකිරීම අලුත් ආණ්ඩුවේ ප්‍රතිපත්තිය බවට ජනාධිපතිවරයා පසුගිය වසරේ අගෝස්තු 20 ප්‍රකාශ කළේය.
ජනාධිපති ගෝඨාභය රාජපක්ෂ පාර්ලිමේන්තුවේ නව සැසි වාරය අමතමින් කියා සිටියේ “නිසි විකල්පයකින් තොරව පරම්පරා ගණනාවක් තිස්සේ තමන් ජීවත් වූ සහ වගා කටයුතු කළ ඉඩම්වලින් කිසිවෙක් ඉවත් කරන්නේ නැහැ,” යනුවෙනි.
Facebook Comments
