ලොහාන් රත්වත්තේ දෙමළ සිරකරුවන්ට පිස්තෝල එල්ල කළ බව ඔප්පු වෙයි

ගෝඨාභය පාලනයේ හිටපු රාජ්‍ය ඇමැති ලොහාන් රත්වත්තේ විසින් බන්ධනාගාර ගත කර සිටී දෙමළ දේශපාලන සිරකරුවන්ව වෙඩි තබා ඝාතනය කරන්නට ැත් කළ බව වසර එක හමාරකට පසු හෙළිදරව් වී තිබේ.

මේ බව තහවුරු කරන්නේ රාජ්‍ය ඇමතිවරයා වැලිකඩ හා අනුරාධපුර සිරගෙවල් වල අවේලාවේ කළ සංචාරය ගැන විමර්ශනයට පත් කළ විශ්‍රාමික මහාධිකරණ විනිසුරුවරියක විසින් මිට වසරකුත් මාස නවයකට ඉහත දී රජයට භාරදුන් වාර්තාවක් මගිනි.

විනිසුරුවරියගේ ඒක පුද්ගල විමර්ශන කමිටු වාර්තාව එවකට අධිකරණ හා බන්ධනාගාර සුබසාධන ඇමැති ඇම්. යු. ඇම්. අලි සබ්රි භාර දී ඇත්තේ 2021 නොවැම්බර් 24 දාය.

මෙතෙක් ප්‍රසිද්ධියට පත් කර හෝ එහි නිර්දේශ ක්‍රියාත්මක කර නොතිබු මෙම වාර්තාවේ පිටපතක් තොරතුරු දැනගැනීමේ අයිතිවාසිකම් පනත යටතේ සමාජීය සහ සාමයික කේන්ද්‍රය 2022 ජුනි 24 වැනිදා කළ ඉල්ලීමට අනුව වත්මන් අධිකරණ, බන්ධනාගාර හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යංශයේ ලේකම් ඇම්. ඇම්. අලිෆ් විසින් ඊට අවුරුද්දකට පසු ලබා දී තිබේ.

ත්‍රස්ත පනත යටතේ අනුරාධපුර බන්ධනාගාරයේ රඳවා සිටී දෙමළ දේශපාලන සිරකරුවන් දස දෙනකුට තර්ජනය කර දණ ගස්සවා ඉන් දෙදෙනකුගේ හිසට පිස්තෝලයක් එල්ල කර ඝාතනය කිරීමට තැත් කිරීම, ජාතීන් අතර වෛරී හා සතුරු හැඟීම්, අසමගිකම් වැඩි දියුණු කිරීම සහ සිය බලතල ඉක්මවා ලොහාන් රත්වත්තේ මන්ත්‍රීවරයා ක්‍රියා කිරීමට එරෙහිව දණ්ඩ නීති සංග්‍රහය යටතේ දඩුවම් දිය හැකි බරපතල වරදක් බවට විශ්‍රාමලත් මහාධිකරණ විනිසුරු සරෝජනී කුසලා වීරවර්ධන සිය වාර්තාව මගින් නිර්දේශ කරන්නීය.

මදිඅරසන් සුලක්ෂන් හා පුබාලසිංහම් සුරියබාලන් දෙමළ දේශපාලන සිරකරුවන් දෙදෙනා වෙඩි තබා මරා දමිම්මට තැත් කිරීම ඇතුළු ලොහාන් රත්වත්තේ මන්ත්‍රීවරයා විසින් කරනු ලැබූ සෙසු බලහත්කාරී ක්‍රියාවන් ගැන ` බී` වාර්තාවක් අනුරාධපුර මහේස්ත්‍රාත්වරයාට ඉදිරිපත් කිරීමටත්, පොලිස් පරීක්ෂණ කඩිනම් කරමින් අධි චෝදනා ගොනු කරන මෙන් මෙම වාර්තාව මගින් නිර්දේශ කර ඇත.

හිටපු ජනාධිපති ගෝඨාභය රාජපක්‍ෂ පාලන සමයේදී හිටපු රාජ්‍ය ඇමතිවරයා සිදු කළ මෙම වරදකාරී ක්‍රියාවන්ට අදාළව නිසි පියවර ගැනීමේ අභියෝගය වත්මන් ජනාධිපති රනිල් වික්‍රමසිංහ ට පැවරී තිබේ. වික්‍රමසිංහ පාලනයට වසරක ආසන්න කාලයක් ගතවී ඇතත් ලොහාන් රත්වත්තේට එරෙහිව කිසිදු පියවරක් ගෙන නොමැත. රත්වත්තේ මෙම ආණ්ඩුවේ මන්ත්‍රීවරයෙකි.

ආණ්ඩු දෙකක ආරක්ෂාව

පසුගිය ආණ්ඩුවේත් මේ ආණ්ඩුවේත් අමාත්‍ය ධුර දරන අලි සබ්රි හෝ හිටපු හා ඉන්නා ජනාධිපතිවරුන් හෝ නීතිපති දෙපාර්තමේන්තුව හෝ හිරගෙදරට කඩා වැදී දඬුවම් ලැබිය හැකි වරද සිදුකළ ආණ්ඩු දෙකේම මන්ත්‍රීට එරෙහිව කිසිදු නීතිමය පියවරක් මේතාක් ගත් බවක් දැනගන්නට නැත.

2021 දෙසැම්බරයේ දී මාධ්‍යවේදීන් කරන ලද විමසුමකට පිළිතුරු දෙමින් අලි සබ්රි අමාත්‍යවරයා පවසා තිබුනේ විමර්ශන වාර්තාව ජනාධිපති වරයාට භාරදී ඇති බවය. කැබිනට් මණ්ඩල අනුමැතියකින් තොරව එය ප්‍රසිද්ධියට පත් කළ නොහැකි බව ද අමාත්‍යවරයා පවසා තිබුණි. එය කැබිනට් මණ්ඩල අනුමැතිය සඳහා යොමු කළේදැයි පැහැදිලි නැත.

2001 වසරේ දෙසැම්බර් 05 වැනිදා පාර්ලිමේන්තු මැතිවරණ සමයේ මහනුවර උඩතලවින්නේදී මුස්ලිම් තරුණයන් දස දෙනෙකු ඝාතනය කිරීමට චුදිතයෙකු වූ, රත්වත්තේ මන්ත්‍රීවරයා ජොයෙල් ප්ර්රා නම් ෆිජි ජාතික රගර් පුහුණුකරු වෙඩි තබා මරා දැමීමට ද චෝදනා ලැබිය.

ලොහාන් රත්වත්තේ මන්ත්‍රීවරයා රාජපක්‍ෂ පවුලේ සමීපතමයෙක් වන අතර හිටපු රාජ්‍ය ආරක්ෂක රාජ්‍ය ඇමැති, ජෙනරාල් අනුරුද්ධ රත්වත්තේගේ වැඩිමහල් පුත්‍රයායි. හිටපු ජනාධිපතිනි චන්ද්‍රිකා කුමාරතුංගගේ ද සමීප ඥාතියෙකි.

රජයේ මුදල් රුපියල් කෝටි 420 ක් අවභාවිතා කිරීමේ චෝදනා ලැබූ `එන්ට්‍රස්ට් සිකියුරිටි` පුද්ගලික මුල්‍ය සමාගමේ කලමණාකාර අධ්‍යක්ෂ චානුක රත්වත්තේ මොහුගේ බාල සොහොයුරායි.