පොලිසිය අඩන්තේට්ටම් කළේ ‘ඇමැති උපදෙස් අනුවයි’ ගජෙන්ද්‍රකුමාර්

පොලිස් ඔත්තුකරුවන් පිරිසක් තමන්ට අඩන්තේට්ටම් කළේ පොලිසිය භාර අමාත්‍යවරයාගේ උපදෙස් පරිදි බව අත් අඩංගුවට ගත් දාම අධිකරණය විසින් ඇප පිට නිදහස් කරන ලද දෙමළ ජාතික ජනතා පෙරමුණේ නායකයා පාර්ලිමේන්තුවේදී චෝදනා කළේය.

පරීක්ෂණ වාර්තාවක් ලැබීමටත් පෙර මහජන ආරක්ෂක අමාත්‍යවරයා ඒ්කපාර්ශවීය තොරතුරු පමණක් පදනම් කරගනිමින් තමන්ට චෝදනා කරන බව දෙමළ ජාතික ජනතා පෙරමුණේ (TNPF) නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් කියා සිටියේ ජුනි 8 වැනිදා පාර්ලිමේන්තුවේදී ය.

“වාර්තාවක් ඉල්ලා තියෙන කෙනෙක් හැටියට ඔබ චෝදනා ඉදිරිපත් කරන්නේ ඉතාම ඇදහිය නොහැකි ආකාරයට. වාර්තාව ලැබෙන්නත් ඉස්සර ඔබ මට චෝදනා කරන්නේ මේ සිද්ධියේ පාර්ශවකරුවන් වෙලා ඉන්න පොලිස් නිලධාරීන් කියන කතාව විතරක් අහලයි. පොලිසිය වැඩකලේ ඔබේ උපදෙස් අනුව බව මට ඉතාමත් පැහැදිලියි,” යනුවෙන් පොන්නම්බලම් මන්ත්‍රීවරයා පැවසීය.

කොළඹින් පලකෙරෙන මාධ්‍ය විසින් වාර්තා කර තිබු ආකාරයට ජුනි දෙවැනිදා මරුදන්කර්නියේ දී පොලිස් භට පිරිසක් සහ මන්ත්‍රීවරයා අතර ඇතිවූ සිද්ධිය සම්බන්ධයෙන් වාර්තාවක් ජුනි 5 දා අමාත්‍යවරයාට දීමට නියමිතව තිබුණි. එහෙත්, තමන් අතට එම වාර්තාව ජුනි 8 වැනිදාත් ලැබී නොතිබුණු බව හෙලිකළ පොලිසිය භාර ටිරාන් අලස් අමාත්‍යවරයා කියා සිටියේ තම විසින් දැක තිබෙන වීඩියෝ දර්ශනවල දැක්වෙන පරිදි මන්ත්‍රීවරයා අනිසි ලෙස හැසිරුණු බවයි.

“මම වාර්තාවක් ඉල්ලුවා පළවෙනි දවසේ මේ සිද්ධිය ගැන. මං වාර්තාවක් ඉල්ලුවා විතරක් නෙමෙයි මං උසාවියටත් දාපු වීඩියෝත් ගෙනල්ලා මං බැලුවා. ඒක බැලුවාම ඉතා පැහැදිලියි මන්ත්‍රීතුමා, මන්ත්‍රීතුමෙක් හැටියට හැසිරිලා නෑ එතන.පොලිස් නිලධාරීන්ට කතා කරපු විදිහ කට වහපන්, උඹ කට වහපන් කියලා කිව්වා.එතකොට මං ඉන් එහාට ගිහිල්ලා මම සියලු විස්තර පොලීසියෙන් ලබා ගත්තා.”

ජුනි 7 වැනිදා උදෑසන කොළඹදී ජයපුරම් පොලිසිය විසින් අත් අඩංගුවට ගන්නා ලද පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ට එරෙහිව පනවා තිබු විදේශ සංචාර තහංචිය ඉවත් කර මන්ත්‍රීවරයා ඇප පිට නිදහස් කළ කිලිනොච්චි මහේස්ත්‍රාත් ජ්‍යෙෂ්ඨ පොලිස් අධිකාරිට නියම කර තිබුනේ මන්ත්‍රීවරයා අධිකරණයට ඉදිරිපත් කිරීමේදී පොලිසිය විසින් ඉදිරිපත් කරන ලද තොරතුරු හා වීඩියෝ දර්ශන අතර පරස්පරයක් පෙනී යන බැවින් ඒ සම්බන්ධයෙන් පූර්ණ පරීක්ෂණයක් පවත්වන ලෙසයි.

පොලිසිය විසින් දෙමළ ජනතා නියෝජිතයා අත් අඩංගුවට ගන්නා ලද්දේ ඉකුත් 2 දා නැගෙනහිර වඩමරාච්චි යේ ක්‍රීඩා සමාජයක පැවති රැස්වීමක් අතරතුර පොලිස් බුද්ධි අංශ සාමාජිකයකු විසින් දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ට පහරදීම, තවත් අයකු විසින් පිස්තෝලයක් එල්ල කිරීම හා අනන්‍යතාවය හෙළිදරව් නොකිරීම ආදිය පිළිබඳව විමර්ශනයක් නොමැතිවය.

පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් මහජන ආරක්ෂක අමාත්‍ය ටිරාන් අලස්ට අවධාරණය කර සිටියේ සිවිල් ඇදුමින් සිටි පොලිස් නිලධාරීන් බව කියන පිරිස එහිදී හැසිරුනේ සිවිල් ඇදුමින් පොලීසිය රාජකාරියේ නියැලිය යුතු නිසි ක්‍රමවේදය අනුගමනය නොකර බවයි.

“පොලිසිය සිවිල් ඇඳගෙන සාමාන්‍ය ජනතාව සමග කටයුතු කරන්න යනවා නම්, එයාලා මුලින්ම දැනගත යුතු දේ තමයි, ඒගොල්ලෝ තමන් පොලිස් නිලධාරීන් කියා අනන්‍යතාව හඳුන්වා දීම. මේ පොලිස් නිලධාරීන් මං ගාවට ඇවිල්ලා තමන් හඳුන්වලා දීලා කිව්වා නම්, සර්, මොකක් හරි හේතුවක් නිසා මෙතන රැස්වීමක් තියන්න බැහැයි කියලා, එහා පැත්තේ විභාගයක් තියෙනවා, මේක විභාග ශාලාවට බාධාවක් වෙන්න පුළුවන්, ඒ නිසා මෙතන රැස්වීමක් තියන්න බැහැයි කියලා කිව්වානම්, මම එක පිලිගන්න තිබුණා.”

පොලිස් රාජකාරියේ මූලික සිද්ධාන්තය නොදන්නා බවටත් ගජේන්ද්‍ර කුමාර් පොන්නම්බලම් මන්ත්‍රීවරයා මහජන ආරක්ෂක අමාත්‍ය ටිරාන් අලස්ට පාර්ලිමේන්තුවේදී චෝදනා කළේය.

“සිවිල් ඇඳගෙන ඉන්න වෙලාවක තමන්ගේ හැඳුනුම් පත පෙන්නලා තමන් පොලිස් නිලධාරීන් කියලා තහවුරු නොකලාම මම කොහොමද දන්නේ ඒගොල්ලෝ පොලිස් නිලධාරීන් කියලා? එයාල ඕගොල්ලන්ගේ SLPP මැරයෝ වෙන්න පුළුවන්. ඒ ගොල්ලෝ හැසිරුනේ ඒ විදියට. මං මොකටද ඒගොල්ලෝ පොලිස් නිලධාරින් කියලා පිළිගන්නේ?”

පොලිස් නිලධාරින් සිය හැදුනුම්පත පෙන්නු අවස්ථාවේ මන්ත්‍රීවරයා එය උදුරා ගැනීමට තැත් කළ වග පොලීසිය පවසන බව කී මහජන ආරක්ෂක අමාත්‍ය ටිරාන් අලස් එවර කියා සිටියේ
“ඉතිං අපි ඒක පැත්තකින් තියලා වීඩියෝ දර්ශන එනකල් ඉම්මු,” කියාය.

රීති ප්‍රශ්නයක් මතුකරමින් ඉලංකෙයි තමිල් අරසු කච්චි පාර්ලිමේන්තු මන්ත්‍රී එම්. ඒ. සුමන්තිරන් ඒහිදී මහජන ආරක්ෂක අමාත්‍ය ටිරාන් අලස්ගෙන් ප්‍රශ්න කර සිටියේ පාර්ලිමේන්තුවට සහභාගී වීමට කොළඹට පැමිනි මන්ත්‍රීවරයා අත්අඩංගුවට ගැනීමට හදිසි වීමේ හේතුව කුමක්ද යන්නයි.

“දැන්, පොලිසිය හොඳාකාරව දැනගෙන හිටියා එයා යාපනේ ඉඳලා කොළඹට ගමන් කළේ පාර්ලිමේන්තුවට එන්න කියලා. පාර්ලිමේන්තු බලය වරප්‍රසාද පනත යටතේ, මන්ත්‍රීවරයකු පාර්ලිමේන්තුවට සහභාගී වීමෙන් වැලැක්වීම නීති විරෝධීයි.”

මහජන ආරක්ෂක අමාත්‍ය ටිරාන් අලස් එයට පිළිතුරු දෙමින් සදහන් කළේ ගජේන්ද්‍ර කුමාර් මන්ත්‍රීවරයා හයවෙනිදා කොළඹ සිටියත් පාර්ලිමේන්තුවට නොපැමිණි බවයි.

පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් එය ප්‍රතික්ෂේප කරමින් කියා සිටියේ එදින තමන් පැමිණ පාර්ලිමේන්තු මහලේකම්වරයාද හමුවූ බවයි.

මන්ත්‍රීවරයාගේ වරප්‍රසාද කඩකර පොලිසිය ඔහු අත් අඩංගුවට ගැනීම පිළිබදව දැනුවත්ව සිටියදී එය නැවත්වීමට කිසිම පියවරක් නොගත් බවට කථානායක මහින්ද යාපා අබේවර්ධන ද TNPF මන්ත්‍රී සෙල්වරාසා ගජෙන්ද්‍රන්ගේ දෝෂ දර්ශනයට ලක්විය.

පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් විභාග මධ්‍යස්ථානයක් සමීපයේ පොලිස් නිලධාරීන්ගේ රාජකාරියට බාධා කළ බවට පාර්ලිමේන්තු නියෝජිතයන් කිහිප දෙනකුම චෝදනා එල්ල කර තිබු නමුත් දෙමළ ජාතික සන්ධානයේ පාර්ලිමේන්තු මන්ත්‍රී එම්. ඒ. සුමන්තිරන් මතු කළ රීති ප්‍රශ්නයකටම පිලිතුරු දුන් ටිරාන් අලස් අමාත්‍යවරයා එතැන විභාග මධ්‍යස්ථානයක් නොතිබුණු බව පිළිගත්තේය.