උපාලි තෙන්නකෝන්ට පහර දුන් බුද්ධි අංශ සාමාජිකයා හඳුනාගනී

0

රිවිර පුවත්පතේ හිටපු කතෘවරයෙකු වන උපාලි තෙන්නකෝන් මහතාට 2009 වසරේ ගම්පහ, ඉඹුල්ගොඩදී පහරදීමේ සිද්ධිය සම්බන්ධයෙන් චෝදනා ලැබ සිටින හමුදා බුද්ධි අංශ සාමාජිකයෙකු ගම්පහ අද (26) පැවැති හඳුනා ගැනීමේ පෙරට්ටුවේදී හඳුනා ගනු ලැබුවා.

ගම්පහ වැඩබලන මහේස්ත්‍රාත් මහේෂ් හේරත් ඉදිරියේ එම හඳුනා ගැනීමේ පෙරට්ටුව පැවැති අතර උපාලි තෙන්නකෝන් හා ඔහුගේ බිරිඳ සැකකාර බුද්ධි අංශ සාමාජිකයා හඳුනා ගැනීමට සමත්ව ඇත.

උපාලි තෙන්නකෝන් හා ඔහුගේ බිරිඳත් තවත් සාක්ෂිකාරුවෙක් ඔවුන් සමග එම පෙරට්ටුව සඳහා ඉදිරිපත්ව තිබිණ.

එකී පහරදීමේ සිද්ධියෙන් පසු තෙන්නකෝන් සිය බිරිඳ සමඟ විදේශගත විය.

2009 වසරේ සිදුවූ මෙම පහරදීමට අදාළව එකල නිසි පරීක්ෂණයක් සිදුනොකෙරුණු බවත්, කල්ගිය පසු හෝ ඒ ගැන පරීක්ෂණයක් සිදුවීම ගැන ප්‍රසාදය පළ කරන බවත්, අද පැවැති හඳුනා ගැනීමේ පෙරට්ටුවෙන් පසුව උසාවි භූමියේදී මාධ්‍යවේදීන් අමතමින් උපාලි තෙන්නකෝන් පැවසීය.

තමන්ට පහරදීමට පුද්ගලයින් සිව්දෙනෙකු පැමිණ සිටි බවත්, ඔවුන්ගෙන් ඉතිරි අය ඇතැම්විට තවමත් නිදැල්ලේ සිටිනු ඇති බවත්, මේ නිසා සියයට සියයක්ම ආරක්ෂාව ගැන සහතික විය නොහැකි බවට ඔහු සැක පළ කළහ.

එසේම තමාට පහරදුන්නේ ඇයි? ඒ කවර අවශ්‍යතාවයකටද? හා ඒ පිටුපස සිටියේ කවුදැයි යන ප්‍රශ්න තවමත් ඉතිරිව ඇති බවද ඔහු එහිදී වැඩිදුරටත් පෙන්වාදුන්නේය.

Facebook Comments

wedding people