මුතුරාජවෙල අභය භූමි ප්රදේශයේ සිදුකෙරෙන පරිසර විනාශයන් මැඩලීම සඳහා එම ප‍්‍රදේශයට පොලිස් විශේෂ කාර්ය බලකායේ ආරක්ෂාව සහ ප‍්‍රවේශ මාර්ගවලට මාර්ග බාධක යෙදවීමට ද ජනපති පොලිස්පතිවරයාට උපදෙස් දී තිබේ.
එම ප‍්‍රදේශය තුළ සිදුකෙරෙන ගොඩකිරීම් සඳහා පස් ලබාදෙන ස්ථානවලට භූ විද්‍යා පර්යේෂණ හා පතල් කාර්යාංශය මගින් බලපත‍්‍ර නිකුත්කර තිබේනම් ඒවා ද වහාම අවලංගු කිරීමට ජනාධිපති මෛත්‍රීපාල සිරිසේන නියෝග කල බව ජනපති මාධ්‍ය ඒකකය පවසයි.
මෙරට වැදගත් තෙත්බිම් පද්ධතියක් වන මුතුරාජවෙල අභය භූමිය ආශ්‍රීතව සිදුකෙරෙන පරිසර විනාශයන් පිළිබඳව මාධ්‍ය වාර්තා පළ කෙරුණු අතර ඒ පිළිබඳ අවධානය යොමු කළ ජනාධිපතිවරයා 22 බ්‍රහස්පතින්දා අළුයම එම ප්රදේශයේ කරන ලද සංචාරයකින් අනතුරුව ප්රදේශයේ මැති ඇමතිවරුන්, රාජ්‍ය නිලධාරින් මෙන්ම ආරක්ෂක අංශ ප‍්‍රධානින් සමග විශේෂ සාකච්ඡාවකට එක්වන ලදි.
ඉඩම් කොටස් ගොඩකිරීම සඳහා යම් රාජ්‍ය ආයතනයක් මගින් දැනට කුමන හෝ අවසරයක් ලබාදී ඇත්නම් ඒ සියල්ල අහෝසි කිරීමට මෙන්ම මෙවැනි පරිසර විනාශයන්ට අනුග‍්‍රහය දක්වන හෝ දැක්වූ රාජ්‍ය නිලධාරින් සිටීනම් ඔවුන්ට එරෙහිව ද විනය ක්‍රීයාමාර්ග ගැනීමට ද ජනපති උපදෙස් දී තිබේ.
පරිසර සංරක්ෂණ ප‍්‍රදේශයක් ලෙස මෙහි පවතින සියලු ඉඩම් වනජීවි සහ පරිසර සංරක්ෂණ කලාප ලෙස ගැසට් කිරීමේ හැකියාව පිළිබඳව අවධානය යොමු කර ඇති ජනපති ඒ පිළිබඳව නීති උපදෙස් ලබා ගන්නා ලෙස නිලධාරින්ට උපදෙස් දුන් බවයි ජනපති මාධ්‍ය ඒකකය සඳහන් කරන්නේ.
සින්නක්කර ඔප්පු සහිත ඉඩමක වුව ද පාරිසරික බලපෑම් ඇතිකරන්නේ නම් එහි ගොඩකිරීම් සහ ඉදිකිරීම් සඳහා ඉඩදිය නොහැකි බව අවධාරණය කළ ජනාධිපතිතුමා මෙම ක්‍රියා පිටුපස දේශපාලන බලවේග තිබේනම් ඒවාට එරෙහිව ද නොපැකිළිව කටයුතු කරන බව වැඩි දුරටත් පැවසු බවයි ජනාධිපති මාධ්‍ය අංශය නිවේදනය කරන්නේ.
Facebook Comments
