පාර්ලිමේන්තු මන්ත්‍රී නාමල් රාජපක්ෂ ගවර්ස් කෝපරේෂන් සහ එන්. ආර් කන්සල්ටන් සමාගම් සමග කළ ගනුදෙනුවක දී රුපියල් මිලියන 45 ක් රජයට පාඩු කළැයි එම සමාගම් දෙකේ අධ්‍යක්ෂවරියක වන නිත්‍යා සේනානි සමරනායක ලබන 22 දක්වා රිමාන්ඩ් කරන ලෙස ලංකා ජයරත්න මෙනවිය අද (16) නියෝග කළාය.
පොලිස් මූල්‍ය අපරාධ කොට්ඨාසය විසින් අත්අඩංගුවට ගෙන ඇය අධිකරණයට ඉදිරිපත් කිරීමෙන් පසු මහේස්ත්‍රාත්වරිය එම නි‍යෝගය ලබාදී තිබේ.
එම සමාගම් දෙකේ තවත් අධ්‍යක්ෂවරියක වන සුජානි බෝගොල්ලාගම ද අද (16) අලුත්කඩේ උසාවියට ඉදිරිපත් කිරීමට නියමිතව සිටි නමුත් ඇය අසනීප වී රෝහලේ පසුවන බව ඇගේ නීතිඥවරු උසාවියට දැන්වූහ.
එයාර් ලංකා ගුවන් සේවිකාවක් ලෙස කටයුතු කරමින් සිටියදී ඇය නාමල් රාජපක්ෂගේ කටයුතු සඳහා නිදහස් කර ඇති අතර මෙසේ නාමල් රාජපක්ෂට අයත් අදාල සමාගමේද අධ්‍යක්ෂිකාවක් ලෙස කටයුතු කර තිබේ.
මෙම චෝදනාවට අදාළව පාර්ලිමේන්තු මන්ත්‍රී නාමල් රාජපක්ෂ හා සුදර්ශන බණ්ඩාර ගනේගොඩ නැමැති අය ද ලබන 22 තෙක් රිමාන්ඩ් කිරීමට අධිකරණය ඊයේ (15) නියෝග කළේය.
Facebook Comments
