වැලිකඩ බන්ධනාගාරයේදී විසි හත් දෙනකු ඝාතනය කරන අවස්ථාවේ එම ඝාතනය ඇසින් දුටු ප්‍රධාන සාක්ෂිකරුවකුට හා ඔහු වෙනුවෙන් පෙනී සිටින නීතිඥයාට මරණිය තර්ජනයක් එල්ලවී තිබේ.
බන්ධනාගාර රැඳැවියන්ගේ අයිතිවාසිකම් සුරැකීමේ කමිටුවේ ලේකම් සුදේශ් නන්දිමාල් විසින් වැලිකඩ ඝාතන සම්බන්ධයෙන් හෙලිකිරීමෙන් වලකින ලෙසට 11 අගහරුවාදා රාත්‍රියේ දුරකථනයෙන් තමන්ට තර්ජනය කල බවට තිස්සමහාරාම පොලිසියට 12 බදාදා පැමිණිලි කර ඇත.
එදිනම රාත්‍රීයේ තමන්ටද දුරකතන ඔස්සේ මරණිය තර්ජන එල්ල කරමින් “වැලිකඩ සිද්ධියෙන් අයින් වෙයන්,රණවිරුන් පාවා දෙන වැඩ වලින් අයින් වෙයන්, අයින්වුනේ නැත්නම් ජීවිතය නැතිකරනවා” යනුවෙන් තර්ජනය කල බව බන්ධනාගාර රැඳැවියන්ගේ අයිතිවාසිකම් සුරැකීමේ කමිටුවේ නීතිඥ සේනක පෙරේරා සිලෝන් ජර්නල්ස් වෙත පැවසීය.
නීතිඥ සේනක පෙරේරා මේ සම්බන්ධයෙන් 11 අගහරුවාදා රාත්‍රියේ නිට්ටඹුව පොලිසියට පැමිණිළි කර ඇත.
මේ අතර මෙම වැලිකඩ රැඳවියන් ඝාතන සිද්ධිය සම්බන්ධව ප්‍රකාශ ලබා ගැනීම සදහා තමන්ට 14 සිකුරාදා දිනයේ අපරාධ පරීක්ෂණ දෙපාර්තමේන්තුවට පැමිණෙන ලෙස ද දැනුම් දී ඇති බව සුදේශ් නන්දිමාල් පවසයි.
මීට ඉහතදී මොරටුව ප්‍රදේශයේදී සුදේශ් නන්දීමාල් හට මහමඟ රැක සිටි පිරිසක් විසින් තර්ජනය කොට තිබුනේ වැලිකඩ ඝාතන සම්බන්ධයෙන් යුක්තිය ඉටු කරවා ගැනීමට පියවර ගැනීම අත්හිටුවන ලෙසයි.
වැලිකඩ බන්ධනාගාර රැඳැවියන් ඝාතනය වෙනුවෙන් එම සිද්ධියට සම්බන්ධයෙන් විධිමත් පරික්ෂණයක් කරන ලෙස ඉල්ලා බන්ධනාගාර රැඳැවියන්ගේ අයිතිවාසිකම් සුරැකීමේ කමිටුව විසින් අභියාචනාධිකරණයට පෙත්සමක් ගොණු කර ඇති අතර එයට බාධා කිරිමේ අරමුණින් මෙම සිදුවීමට වගකිව යුත්තන් තර්ජන එල්ල කරන බවටයි නීතිඥ සේනක පෙරේරා විශ්වාසය පල කරන්නනේ.
Facebook Comments
