ලබන මාසයේ සිට තමන් සෑම අමාත්‍යාංශයකම ප‍්‍රගති සමාලෝචන රැස්වීම් සඳහා සහභාගීවන අතර එහි පසු විපරම් කටයුතු ජනාධිපති කාර්යාලය හරහා සිදු කිරිමට සැලසුම් කර තිබෙන බව ජනාධිපතිවරයා කියා සිටි.
වංචාවක්, දූෂණයක්, අක‍්‍රමිකතාවයක් කොතනකදී හෝ සිදු නොවිය යුතු බව පෙන්වා දෙන ජනාධිපති මෛත්‍රීපාල සිරිසේන විනිවිදභාවයෙන් සහ පිරිසිදුව සිය කටයුතු කරගෙන යාමට සියලු කාර්ය මණ්ඩල කැපවිය යුතු බව අවධාරණය කර සිටියේ 12 බදාදා කොළඹ නෙළුම් පොකුණ රඟහලේ දී ජනාධිපති කාර්යාලයේ කාර්ය මණ්ඩලය අමතමිනි.
රාජ්‍ය නිලධාරින්ගේ කැපවීම, දක්ෂතාවය සහ මානුෂීය ගුණාංග මැනවින් පිළිබිඹු කළ අවස්ථාවන් ලෙස පසුගිය කාලය තුළ මුහුණදීමට සිදුවූ ස්වාභාවික ආපදා තත්ත්වයන් හමුවේ ගෙන ගිය සහන වැඩපිළිවෙළ හඳුන්වාදිය හැකි බව සඳහන් කළ ජනාධිපතිවරයා එහිදී සමස්ථ රාජ්‍ය සේවයම සිදුකළ කැපවීම වෙනුවෙන් සිය කෘතඥතාවය පිරිනැමීය.
රාජ්‍ය නිලධාරින්ට මගපෙන්වීම තිබෙන්නේ රාජ්‍යය කරන්නා වූ දේශපාලන නායකත්වයේ මෙහෙයවීම, කළමනාකරණය සහ පරිපාලනයේ සාර්ථකත්වය මත බව පැවසූ ජනාපති සිරිසේන රාජ්‍ය සේවයේ කිසිවෙකුට තමා චෝදනා නොකරන අතර යම් ගැටලුකාරී තත්ත්වයක් මතුව තිබෙන්නේ නම් ඊට වගකිවයුත්තේ දේශපාලන අධිකාරිය බව ද කියා සිටියේය.
ලක්ෂ 14 ක සමස්ත රාජ්‍ය සේවයට ආදර්ශයක් වෙමින් නව මුහුණුවරකින් සහ නව වැඩපිළිවෙළක් ඔස්සේ කාර්යක්ෂමව සහ සැලසුම් සහගත අයුරින් ජනාධිපති කාර්යාලයේ කටයුතු ඉදිරියට පවත්වාගෙන යාමේ වැදගත්කමද ජනාධිපති මෛත්‍රීපාල සිරිසේන මෙහිදි පෙන්වා දුනි.
Facebook Comments
