දශක ගණනාවක් පුරා උතුරේ මර්දනය දියත් කිරීමට නන් අයුරින් දායක වූ ශ්‍රී ලංකාවේ දකුණේ විපක්ෂය ඊට ගොදුරු වී තිබේ.
වත්මන් පාර්ලිමේන්තුවේ ප්‍රධාන විපක්ෂය වන සමගි ජන බලවේගය අද [16] දිනයේ දියත් කළ උද්ඝෝෂණය පොලිසිය යොදවා කඩාප්පල් කිරීමට ආණ්ඩුව කටයුතු කරන බවට ජාතික සමගි බලවේගය පාර්ලිමේන්තුවේත්, ඉන් පිටස්තරව මාධ්‍යවේදීන් හමුවේත් ප්‍රකාශ කළේය.
“මේ සාපය දැන් ඇති“ තේමාව යටතේ පැවැත්වූ මෙම උද්ඝෝෂණයට පැමිණෙන දිවයිනේ නන් දෙස, සමගි ජන බලවේග සාමාජිකයන් පැමිණෙන බස් රථ පරීක්‍ෂා කිරීම්, හැදුනුම් පත් අංක, නම් සහ ලිපිනයන් සහිත ලැයිස්තු ලබා ගැනීම, බස්රථ හිමියන්ගේ මාර්ග ධාවන බලපත් අහිමි කරන බවට කෙරෙන බලපෑම්, පැමිණෙන පිරිස් අතර මග යොදා ඇති පොලිස් මාර්ග බාධක වල රඳවා ගැනීම්, එම පක්ෂයේ මන්ත්‍රීවරුන්ගේ කාර්යාල හා නිවාස සෝදිසි කිරීම්, කොවිඩ් සෞඛ්‍ය නීති රෙගුලාසි යොදා ගෙන පොලිසිය විසින් මර්දනය මුදා හැර ඇති බව සමගි ජන බලවේගයේ නායකයෝ පවසති.
කෙසේ වෙතත්, දිවයිනේ දකුණු දිග විවිධ පළාත්වලින් පැමිණ ගාලු මුවදොර පිටිය ඉදිරිපිට මහා මාර්ගය අවුරා ලූ දහස් සංඛ්‍යාත ජනකායක් සමගින් රැළියක් පවත්වන්නට සජබ සමත් විය.
උද්ඝෝෂණ පැවැත්වීම වළක්වාලමින් තහනම් නියෝග ලබා ගැනීමට ගිය පොලිසියේ ඉල්ලීම අධිකරණ හයකදී ප්‍රතික්ෂේප වුනු අතර තවත් අධිකරණ හතකදී ඉල්ලීමට අනුව වාරණ නියෝග ලැබුණි.
මේ ගැන තම ට්විටර් පිටුවේ සටහනක් තබන දෙමළ ජාතික සන්ධානයේ පාර්ලිමේන්තු මන්ත්‍රී ශානක්‍යන් රාසමානික්කන් පවසන්නේ “ ලංකාවේ පොලිසිය හැම තිස්සෙම කරන්නේ අධිකරණය නොමග යවා උසාවි නියෝග ලබා ගැනීම. උතුරු නැගෙනහිරදී අපි මේවාට හැමදාම මුහුණ දෙනවා,“ යනුවෙනි.
උතුරු නැගෙනහිර ප්‍රදේශවලදී හමුදා හා පොලිසිය විසින් දෛනිකව සිදු කරන මර්දනකාරී ක්‍රියා මාර්ගවලට එරෙහිව කිසිදු ප්‍රකාශයක් කිරීමට ජාතික සමගි ජන බලවේගයේ නායකයෝ පසුගිය දශක ගණනාවකම ක්‍රියා කර නොමැත.
2009 වසරට පෙරත් ඉන් පසුත් රාජපක්ෂ ආණ්ඩුව උතුරු නැගෙනහිර ගෙන ගිය යුද්ධයටත්,මර්දනයටත් සෘජුව හා වක්‍රව සහාය දීමට සමගි ජන බලවේගයේ බොහෝ නායකකාරකා දීහු ක්‍රියා කළහ.
එම පක්ෂයේ නායකයා මෙන්ම විපක්‍ෂ නායක සජිත් ප්‍රේමදාස දකුණේ සිය සාමාජිකයන්ට එරෙහිව දියත් කෙරෙන පොලිස් බාධා කිරීම් හමුවේ කියා සිටියේ ජනතාවගේ ප්‍රජාතන්ත්‍රවාදී අයිතිය කඩ කරමින් අදහස් ප්‍රකාශ කිරීමේ නිදහසට ආණ්ඩුව උල්ලංඝණය කරන බවයි.
“ත්‍රස්තවාදය මුලින් උපුටා දමා ඇති රටක තවත් ත්‍රස්ත ක්‍රියාවක් සිදුවීමේ ඉඩකඩක් තියෙනවාද“ යැයි සජිත් ප්‍රේමදාස අද පාර්ලිමේන්තුවේදී ප්‍රශ්ණ කළේය.
“වයිරස් සමග එකතුවී ආණ්ඩුව විනාශ කරන්න හදනවා“ යැයි විපක්ෂයට චෝදනා කරන පොලිසිය බාර ඇමැති සරත් වීරසේකර කියා සිටියේ සෞඛ්‍ය රෙගුලාසි කඩ කිරීම් ගැන සොයා බල පොලීසිය කරනුයේ නීතිගරුක ක්‍රියාවක් බවයි.
Facebook Comments
