යුද පීඩිත වන්නියේ, කොක්කුතොඩුවායි සමූහ සුසානයේ මිහිදන් කර තිබෙන්නේ අතුරුදහන් තම සමීපතමයන්ගේ සිරුරු දැයි පරීක්ෂා කරන ලෙස අතුරුදහන් වුවන්ගේ පවුල් වලින් ඉල්ලීමක් ඉදිරිපත් වූවහොත් ඒ සදහා ඩී.එන්.ඒ පරීක්ෂණ සිදු කිරීමේ හැකියාවක් පවතින බව සිරුරු ගොඩගැනීම මෙහෙයවන මුලතිව් දිස්ත්‍රික් රෝහලේ අධිකරණ වෛද්‍යවරයා සඳහන් කරයි.
මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව ඒ බව සදහන් කළේ “කැණීම් කරන ලද අස්ථි කොටසෙන් දත් ගලවා ඩී.එන්.ඒ පරීක්ෂාව සඳහා ගබඩා කර තිබෙනවා.” යැයි ඔහු ජුලි 11 වැනිදා සිදු කළ ප්‍රකාශයක් සම්බන්ධයෙන් වන්නි මාධ්‍යවේදීන් වැඩි දුරටත් ජුලි 12 වැනිදා කරුණු විමසු අවස්ථාවේදිය.
තුන්වැනි අදියරේදී ගත් දත් ඩීඑන්ඒ පරීක්ෂණයට යවන බව පැවසෙන නමුත් පළමු අදියරේ සහ දෙවන අදියරේ කැණීම්වලදී ගොඩ ගත් කිසිවක් ඩී.එන්.ඒ පරීක්ෂණයට යවා නොමැතිදැයි මාධ්‍යවේදීන් ජුලි 12 වැනිදා අධිකරණ වෛද්‍ය නිලධාරීවරයාගෙන් ප්‍රශ්න කර තිබුනි.
ඒ සම්බන්ධයෙන් වැඩි දුරටත් කරුණු පැහැදිලි කරමින් වෛද්‍ය කනගසභාපති වාසුදේව තහවුරු කළේ මුලින් කළ කැනීම් නිසියාකාර සිදු නොකිරීම නිසා DNA පරීක්ෂණ සඳහා යෝග්‍ය නියැදි ලබාගැනීම වැළකී ගිය බවයි.
“කැණීමේ පළමු අදියරේදී සහ දෙවන අදියරේදී යන්ත්‍ර මගින් කැනීම් කටයුතු සිදු කළ නිසා සමහර ඇටසැකිලි පරිසරයට නිරාවරණය වී ඇති නිසා ඒවා ඩී.එන්.ඒ පරීක්ෂණයට හරි නෑ කියලා ගත්තේ නෑ. ඇටසැකිලි විශ්ලේෂණය කිරීමේදී අපි සාම්පල් ගත්ත ටික පරීක්ෂාවට ලක් කළේ නෑ. දැනට ගබඩා කරලා තියනවා. ”
සමූහ සුසානයේ මිහිදන් කර තිබෙන්නේ තම සමීපතමයන්ගේ සිරුරු දැයි සැකයෙන්, ඒවා පරීක්ෂා කරන ලෙස අතුරුදහන් වුවන්ගේ ඥාතීන්ගෙන් ඉල්ලීමක් කෙරුනොත් ඒ සදහා ඩී.එන්.ඒ පරීක්ෂණ සිදු කිරීමේ හැකියාවක් ඇති බව අධිකරණ වෛද්‍ය නිලධාරීවරයා මාධ්‍යවේදීන් හමුවේ පවසා තිබේ.
“මේ සම්බන්ධයෙන් අතුරුදන් වූවන්ගේ ඥාතීන් තමන්ගේ ඥාතීන් තමයි මේ විදිහට මිහිදන් කරලා තියෙන්නේ කියලා සැක කරනවා නම් ඔවුන්ගේ රුධිර සාම්පල ආදිය ලබාගෙන මේ ඩී.එන්.ඒ සමඟ සංසන්දනය කරනවා.”
බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සමීපතමයන් හඳුනාගැනීම සඳහා අවශ්‍ය ජෛව විද්‍යාත්මක සාම්පල විමර්ශන කණ්ඩායම විසින් තුන්වැනි අදියරේ සිට එක්රැස් කරමින් සිටින බව කැනීම් කටයුතු බාර වෝහාරික පුරාවිද්‍යාඥ රාජ් සෝමදේව ද ජුලි 11 වැනිදා මාධ්‍යවේදීන් හමුවේ කියා සිටියේය. ඒවායේ නිවැරදි කාල නිර්ණය පිණිස විද්‍යාත්මක පරීක්ෂණයක් පැවැත්විය හැකිවන්නේ අධිකරණ නියෝගයක් ලබාගැනීමෙන් අනතුරුව බවද ඔහු එහිදී පෙන්වා දී තිබුනි.
“අනිත් අතට මේ අවස්ථාවේදී ගරු මහේස්ත්‍රාත්තුමා දැනුම්දීලා තියනවා දිවුරුම් පෙත්සම් කීපයක් ඉදිරිපත් වෙලා තියනවයි කියලා අතුරුදහන් වෙච්ච අය අදුනාගැනීම සදහා. ඒ නිසා අපි මේ අවස්ථාවේදී ඉදිරියට යම් කිසි ජාන පරීක්ෂාවක් කරන්න අවශ්‍යනම් ඒ සදහා සුදුසු වන අන්දමට සාම්පල කිපයක් ලබා ගන්නත් අපි කටයුතු කරලා තිබෙනවා. ඒ කියන්නේ සෑම ඇටසැකිල්ලකින්ම. මේ තුන්වැනි අදියරේ මතු කරන සෑම ඇටසැකිල්ලකින්ම අපි සාම්පලය බැගින් ලබා ගන්න සැලසුම් කරලා තියනවා.”
ඇට සැකිලි 45 ක්
වසරකට ඉහත දී අහඹු ලෙස වන්නියෙන් මතුවූ සමූහ මිනීවලේ 2024 ජුලි 4 වැනිදා යළි කැනීම් කටයුතු ආරම්භ කිරීමෙන් පසු අටවැනි දිනටත් කැනීම් සිදුකළ ජුලි 12 වැනිදා තවත් දෙදෙනකුට අයත් ඇටසැකිලි ගොඩ ගෙන තිබේ. ඊට පෙරදින හමුවූ සිරුරු ගණන තුනකි.
ජුලි 12 වැනි සිකුරාදා කැනීම් කටයුතු නිමා කිරීමෙන් පසු සිරුරු ගොඩගැනීම මෙහෙයවන මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව සදහන් කළේ මේ දක්වා කොක්කුතොඩුවායි සමුහ සුසානයෙන් පුද්ගලයන් 45 දෙනකුට අයත් අස්ථි කොටස් ගොඩ ගෙන ඇති බවයි.
කැනීම් කටයුතු බාර ප්‍රධාන වෝහාරික පුරාවිද්‍යාඥයා පවසන පරිදි 2024 ජුලි 4 වැනිදා සිට ජුලි 12 වැනිදා දක්වා සිදු කළ කැනීම් කටයුතු වලදි මිනිස් ඇට සැකිලි වලට අමතරව උණ්ඩයක්, කම්බි කැලි දෙකක් ඇතුළු කැළෑ ඇඳුමකට සමාන ඇදුමක කොටස් ද මතු කරගෙන තිබේ.
කොක්කුතොඩුවායි, සමුහ මිනි වලේ කාල නීර්ණය සදහා කාබන් පරීක්ෂාවකට යොමු කිරීමක් සිදු කරන්නේ දැයි මාධ්‍යවේදීන් සිදු කළ විමසීම් හමුවේ මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව ජුලි 12 වැනිදා සදහන් කළේ එවැන්නක් සිදු කිරීමේ අවශ්‍යතාවයක් නොමැති බවයි.
“මෙතන තියන ඇට සැකිලි කාබන් පරීක්ෂණයට ලක් කරන්න අවශ්‍ය නැ. ඇත්තටම කාලය දැන ගන්න බැරි පුරාතන ඇට සැකිලි තමයි කාලය දැන ගැනීම සදහා කාබන් ඩේටින් කරන්නේ. මේක ලගදී සිදු වෙලා තියනවා කියලා හදුනාගෙන තියන නිසා කාබන් ඩේටින් එකට යන්න ඔන නැ කියලා මම හිතනවා.”
කොක්කුතොඩුවායි සමුහ මිනි වලේ කාල නීර්ණය සදහා කාබන් පරීක්ෂාවකට යොමු කිරීම වෙනුවෙන් අවශ්‍ය සාම්පල එකතු කරන ලෙස මේ වන තෙක් තමන්ට නියෝග ලැබී නොමැති බව කැනීම් කටයුතු බාර ප්‍රධාන වෝහාරික පුරාවිද්‍යාඥ රාජ් සෝමදේව ජුලි 11 වැනිදා මාධ්‍යවේදීන්ට දැනුම් දී තිබුනි.
මහාචාර්ය සෝමදේව විසින් මාස කිහිපයකට උඩදී මුලතිව් අධිකරණයට බාර දෙන ලද පිටු 35 ක අතුරු වාර්තාව ගොඩගන්නා ලද මෙවලම් විශ්ලේෂණයෙන් නිගමනය කර තිබුනේ කොක්කුතොඩුවායි සමූහ සුසානයෙන් ගොඩගන්නා ලද සිරුරු වල දමා ඇත්තේ චන්ද්‍රිකා බණ්ඩාරනායක කුමාරතුංග රාජ්‍ය පාලනයේ නියුතු 1994-1996 අතර කාලයේ දී බවයි.
වින්දිතයන්ගේ දිවි තොර වීමට පෙර ඔවුන්ට ගිනි අවි ගැටුමකට මුහුණ දීමට සිදුවී තිබෙන බව ද මහාචාර්ය රාජ් සෝමදේවගේ වාර්තාවේ සඳහන් ය.
සමුහ සුසානයේ කැනීම් කටයුතු නිරීක්ෂණය සඳහා එක්සත් ජනපද තානාපති කාර්යාලයේ දේශපාලන කටයුතු භාර නිලධාරි මැතිව් හිංසන සහ එක්සත් ජාතීන්ගේ සංවිධානයේ කොළඹ කාර්යාලයේ මානව හිමිකම් කටයුතු භාර නිලධාරිනී ලුදියානා ශර්ලීන් අහිලන් ද ජුලි 12 වැනිදා ගොස් තිබුණි.
Facebook Comments
