පාතාල මර්දන ක්‍රියාවලියේ නිරතව සිටින පොලිස් නිලධාරීන් ඝාතනය කරන බවට තොරතුරු පතුරවමින්, තර්ජනය කරමින් නම් ලැයිස්තු සමාජ මාධ්‍ය වෙත මුදා හරිමින් බියගැන්වීම සඳහා උත්සාහ ගත්ත ද, පාතාලයට විරුද්ධව ඉදිරියට තැබූ පියවර පසුපසට ගැනීමට පොලිසිය සුදානම් නොමැති බව පොලිස්පතිවරයා අවධාරණය කරයි.
පසුගිය යුද සමයේ ත්‍රස්තවාදී තර්ජන සඳහා නොබියව මුහුණ දී තම ජීවිතය පරිත්‍යාග කළා සේම වර්තමානයේ කුඩු සහ පාතාලය තුරන් කිරීම සඳහා තම ජීවිත පරිත්‍යාගයෙන් කටයුතු කළ හැකි පොලිස් නිලධාරීන් දහස් ගාණක් පොලිසිය සතුව සිටින බවයි පොලිස්පති දේශබන්දු තෙන්නකෝන් පෙන්වා දෙන්නේ.
පුත්තලම වනාතවිල්ලුව ප්‍රදේශයේ ඉදිකළ නව දහන උඳුන මඟින් කොකේන් කිලෝග්‍රෑම් 355 ග්‍රෑම් 881 ක් දවා විනාශ කිරීමේ අවස්ථාවට සහභාගී වෙමින් පොලිස් ප්‍රධානියා මේ බව සඳහන් කළේය.
“යුක්තියේ මෙහෙයුමේ දෙවන අදියර” මඟින් නීති විරෝධි ගිනි අවි අත්අඩංගුවට ගැනීම සඳහා වැඩි අවධානයක් යොමු කරන බව කී හෙතෙම දෙසැම්බර් මාසේ සිට මේ දක්වා කාලය තුළ ගිනි අවි 296 ක් අත්අඩංගුවට ගෙන ඇති බව ද පැවසීය.
පාතාලය ලෙසින් පෙනි සිටින සංවිධානාත්මක අපරාධ කල්ලි සහ මත්ද්‍රව්‍ය ජාවාරම යනු එකම කාසියක දෙපැත්තක් බවත්, මත්ද්‍රව්‍ය ජාවාරමෙන් උපයන අතිවිශාල ධනස්කන්ධය මඟින් මෙම අපරාධකරුවන් පෝෂණය වන බැවින් අපරාධකරුවන් අත්අඩංගුවට ගැනීම සඳහා ජනතා සහාය අවශ්‍යව යැයි ද පොලිස්පති දේශබන්දු තෙන්නකෝන් වැඩිදුරටත් කියා සිටියේය.
Facebook Comments
