ව්‍යවස්ථා ප්‍රතිසංස්කරණ පිළිබඳව පාර්ලිමේන්තු විවාදය පැවැත්වෙමින් තිබෙන අතරතුර ශ්‍රී ලංකාවට පැමිණි යුරෝපා සංගම් නියෝජිතයින් පිරිසක් ව්‍යවස්ථා ප්‍රතිසංස්කරණ සාකච්ඡා පෙරට ගෙන යන ලෙස රජයෙන් ඉල්ලා තිබේ.
හත් අවුරුද්දක් තිස්සේ පනවා තිබූ තහංචි ඉවත් කරමින් වරණීය බදු සහනය නැවත ලබා දීමෙන් පසු ශ්‍රී ලංකාව අපේක්ෂා කළ ප්‍රගතිය අත් කරගෙන නැතැයි යුරෝපා සංගමයේ දකුණු ආසියාව බාර ඉහල පෙලේ නියෝජිත මණ්ඩලයක් ශ්‍රී ලංකාවේ දෙදින නිල සංචාරය අවසානයේ ප්‍රකාශ කර සිටියේය.
“මුලින් බලාපොරොත්තු වූ තරමට වඩා අත් කරගෙන තිබෙන ප්‍රගතිය මන්දගාමී වීම ගැන මන්ත්‍රීවරුන්ගේ අවධානය යොමු වූ,” බව සංචාරය හමාරයේ නිකුත් කරන ලද නිවේදනයක සඳහන් වේ.
කෙසේ වෙතත් අනාගත ප්‍රගතිය සඳහා මානව හිමිකම්, ප්‍රජාතන්ත්‍රවාදය සහ නීතියේ ආධිපත්‍යය සහ සහතික කිරීම ඉලක්ක කරගෙන ව්‍යවස්ථා ප්‍රතිසංස්කරණ සාකච්ඡා පෙරට ගෙන යන ලෙස රජයෙන් ඉල්ලා සිටියහ.
GSp+ දිරි දීමනාවක්
ජාතික සංහිඳියාව සහ වගවීම සම්බන්ධයෙන් ප්‍රමාණවත් ප්‍රගතියක් අත්කර නොගැනීම ගැන සිය අවධානය යොමු කර ඇති යුරෝපා මන්ත්‍රී කණ්ඩායම බදු සහන සලසා දීමෙන් අනතුරුවත් ශ්‍රී ලංකාව යුද අපරාධ සම්බන්ධයෙන් වගවීම ඇතුළු මානව හිමිකම් ක්ෂේත්‍රයේ පොරොන්දු ඉටුකිරීමට අසමත් වීම පිළිබඳව නොසතුට පල කර තිබේ.
“GSp+ බදු සහන දුන්නේ ආණ්ඩුව පොරොන්දු වු ප්‍රතිසංස්කරණ වලට දිරි ගැන්වීමක් විදියට බව ආණ්ඩුවට සිහිකර දුන්නා” යි ජීන් ලැම්බර්ට් මන්ත්‍රීවරිය 02 බ්‍රහස්පතින්දා කොළඹ පැවති මාධ්‍ය හමුවේදී කියා සිටියාය.
ආරක්ෂක අංශ විසින් අත්පත් කරගෙන ඇති දෙමළ ජනතාවගේ ඉඩම් නිදහස් කිරීම අඩු වේගයකින් සිදුවන බව පෙන්වා දෙන යුරෝපා මන්ත්‍රී කණ්ඩායම නැවත බාර දුන් ඉඩම් සඳහා මෙතෙක් වන්දි නොගෙවීම දැඩිව දෝෂ දර්ශනයට ලක් කර තිබේ.
ශ්‍රී ලංකාවට GSP+ වරණීය බදු සහනය ලබා දීමේ ප්‍රධාන කොන්දේසි වූයේ මානව හිමිකම්, යහපාලනය, කම්කරු අයිතිවාසිකම් සහ පරිසරය යන ක්ෂේත්‍ර වල ජාත්‍යන්තර සම්මුති 27ක් ක්‍රියාවේ යෙදවීම යැයි රජයට පැහැදිලි කර දුන් බව යුරෝපා සංගමය නිකුත් කළ නිවේදනයේ අවධාරණය කර ඇත.
Facebook Comments
