මුස්ලිම් කාන්තාවන්ගේ ඇඳුමක් තහනම් කිරීමට ආණ්ඩුව පියවර ගැනීම ආගමික නිදහසට කෙරෙන බාධාවක් ලෙසින් එක්සත් ජාතීන්ගේ සංවිධානයේ දෝෂ දර්ශනයට ලක්වී තිබේ.
බුර්කාව “ජාතික ආරක්ෂාවට සෘජු බලපෑමක්” බව කියාපාමින් එය මෙන්ම මද්‍රාසා යනුවෙන් හැඳිවෙන ඉස්ලාමීය පාසල් දහසක් වසා දැමීම සඳහා කැබිනට් අනුමැතිය ඉල්ලා ඇති බව මහජන ආරක්ෂක අමාත්‍ය රියර් අද්මිරාල් සරත් වීරසේකර ප්‍රකාශ කර තිබුණි.
“ආගම හෝ විශ්වාසය ප්‍රකාශයට පත් කිරීමේ සහ ප්‍රකාශනයේ අයිතිය සහතික කෙරෙන ජාත්‍යන්තර නීතියට බුර්කා තහනම අනුකූල නොවේ,” යි ආගම සහ විශ්වාසයේ නිදහස පිලිබඳ විශේෂ නියෝජිත ආචාර්ය අහමඩ් ෂහීඩ් ට්විටර් මගින් ප්‍රකාශ කර ඇත.
ආගම හෝ විශ්වාසය පදනම් කොටගෙන වෙනස්කම් පෑම හෝ නොරිස්සීම මානව අභිමානයට නිග්‍රහයක් මෙන්ම එක්සත් ජාතීන්ගේ ප්‍රඥප්තියේ මූලධර්ම නොතකා හැරීමක්ද වන බව 1981 දී සම්මත කරගත් ආගම හෝ විශ්වාසය පිළිබඳ ප්‍රකාශනය මගින් එක්සත් ජාතීන්ගේ සංවිධානයේ සියලුම රටවල් පිළිගෙන තිබෙන බව ආචාර්ය ෂහීඩ් අවධාරණය කර ඇත.
ජනමත විචාරණයක් යොදාගනිමින් ස්විට්සර්ලන්තය බුර්කාව තහනම් කිරීමද විශේෂ නියෝජිතයාගේ දැඩි හෙලා දැකීමට ලක්විය.
“යටින් තිබෙන ආධානග්‍රාහී බව ප්‍රජාතන්ත්‍රවාදයේ ලෝගුවෙන් සඟවාගත නොහැකිය,” යි අහමඩ් ෂහීඩ් සමාජ මාධ්‍ය ජාල ඔස්සේ ප්‍රකාශ කර තිබුණි.
ආණ්ඩුවේ අලුත්ම වස්ත්‍ර තහංචිය ශ්‍රී ලංකාවේ මුස්ලිම් කවුන්සිලය විසින් හෙලා දැක තිබුනේ බහුතර ආගමිකයන් සනසාලීම සඳහා ජාතිවාදී න්‍යාය පත්‍රයක් ක්‍රියාත්මක කිරීමක් ලෙසිනි.
“මේක ඒගොල්ලෝ මුස්ලිම්වරුන් පිටුපස හඹා යන බව බෞද්ධයන්ට ඔප්පු කරලා පෙන්නන්න දරන උත්සාහයක්,” යයි මුස්ලිම් කවුන්සිලයේ උප සභාපති හිල්මි අහමඩ් අල් ජසීරා මාධ්‍ය ජාලයට ප්‍රකාශ කර තිබුණි.
බුර්කාව යනු කවර ඇඳුමක් දැයි හරියාකාර නොදන්නා පිරිස් අලුත් තහංචිය යුතු ලෙස යොදාගැනීමේ අවදානම ගැනද බිය පලවී තිබේ.
“මුස්ලිම්වරුන් හැරුනුකොට වෙනත් අය බුර්කා, හිජාබ් හා නිකාබ් කියන ඇඳුම් තුනේ වෙනස දන්නේ නෑ.” යි ඩේලි මිරර් නියෝජ්‍ය ප්‍රවෘත්ති කර්තෘ ජමිලා හුසේන් අල් ජසීරා සමග පවසා තිබුණි.
“හරි අවබෝධයක් නැතිකම නිසා මුස්ලිම් කාන්තාවන්ට වෙනස්කම් පෑම හෝ ඔවුන් ඉලක්ක කරගනීම සිදු වෙන්න පුළුවන්.”
කෙසේ වෙතත්, ආණ්ඩුවේ පිළිවෙත් සමච්චලයට ලක් කරන සමාජ මාධ්‍ය ක්‍රියාධාරීන් සමහරකු ආණ්ඩුවේ බුර්කා තහනම මෙන්ම ශ්‍රී ලංකාවේ ජාතික කොඩිය සහිත පාපිස්න විරෝධය දැක තිබුනේ සීනි බද්දෙන් ශ්‍රී ලංකාවට කෝටි 1600 කට ආසන්න මුදලක් අහිමි කළ බවට වාර්තා වන වංචාවක් යට ගැසීමේ උපායක් ලෙසිනි.
Facebook Comments
