දසක හතරකට ඉහත දී වන්නියේ දෙමළ ජනයා සිය ගොවිතැන් කටයුතු සහ ජීවනෝපාය සරි කර ගැනීම සදහා භාවිත කළ ඉඩම් මහවැලි සංවර්ධන අධිකාරිය හරහා දකුණේ සිංහල ජනතාවට බෙදා දෙමින් සිටින බවට දෙමළ ජනතා නියෝජිතයන් සහ ප්‍රදේශවාසීන් චෝදනා කරති.
උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පවසන්නේ මුලතිව්, කොක්කුතොඩුවායි, අක්කරවේලි ප්‍රදේශයේ මනල්කේනි, සුදියෝඩෛ ඇතුළු ගම්මාන හයක ජනයාගේ භාවිතයට තිබු ඉඩම් මේ වන විට මහවැලි සංවර්ධන අධිකාරිය හරහා දකුණේ සිංහල ව්‍යාපාරිකයන්ට බෙදා දෙමින් සිටින බවට තොරතුරු වාර්තා වී ඇති බවයි.
ප්‍රදේශවාසී ජනතාව සමග අගෝස්තු 1 වැනිදා එම ප්‍රදේශයේ නිරීක්ෂණ චාරිකාවක නිරත වු තමන්ට යන්ත්‍රෝපකරණ යොදාගනිමින් එම භුමියේ කැලෑ එළි පෙහෙලි කරමින් ඇති ආකාරය දැකගන්නට ලැබුන බව ඔහු ප්‍රදේශයේ මාධ්‍යවේදීන් සමග පවසා තිබේ.
උතුරු පළාත් සභාවේ හිටපු මන්ත්‍රීවරයා පවසන්නේ අක්කරවේලි ප්‍රදේශයේ ඉඩම් දකුණේ සිංහල ජාතිකයන් 11 දෙනකු සදහා එක් අයකුට ඉඩම් අක්කර 25 බැගින් බෙදා දීමට මහවැලි සංවර්ධන අධිකාරිය වන සංරක්ෂණ දෙපාර්තමේන්තුවෙන් ඉල්ලා ඇති බවට ලැබුන තොරතුරක් අනුව එය පරීක්ෂා කිරීමේදී එම ඉඩම් මේ වන විටත් ඔවුන්ට පවරා දී ඇති බවට දිස්ත්‍රික් ලේකම් කාර්යාලයෙන් තහවුරු කරගත් බවයි.
අක්කරවේලියේ දෙමළ ජනයා මීට ඉහත දී භාවිතයට ගත් ඉඩම් දකුණේ සිංහලයන් අතර බෙදාදීමේ මහවැලි අධිකාරියේ සැලසුම් ගැන චෝදනා කරමින් විරෝධතාවයක් දියත් කළ යාපනය විශ්ව විද්‍යාලයේ උපාධි අපේක්ෂකයන් ජුලි 31 වැනිදා ප්‍රශ්න කර තිබුනේ ශ්‍රී ලංකාව ‘ප්‍රජාතන්ත්‍රවාදී සමාජවාදී ජනරජයක් වෙන්නේ නමට විතරක්ද?’ යන්නයි.
“මුලතිව් අපිට අයිති භුමියයි, මහවැලි සංවර්ධන අධිකාරිය පිටව යනු, අක්කරවේලි අපේ නිවහනයි, අපේ භුමියේ ඔහෙලට තියන වැඩ මොනවාද” ආදී සටන් පාඨ කියමින් යාපනය සරසවියේ තරුණයන් එම විරෝධය දියත් කර තිබුනි.
උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පවසන්නේ කොක්කුතොඩුවායි, අක්කරවේලි ප්‍රදේශයේ දෙමළ ජනතාව පාරම්පරිකව ජීවත් වු බවයි. 1980 ට පෙර එම ඉඩම් වල වගා කටයුතු සදහා අයිතිය පවරා දෙමළ ජනතාවට බලපත්‍ර ලබා දී තිබු බව ඔහු තව දුරටත් පෙන්වා දෙයි.
යුද්ධය හේතුවෙන් 1984 වසරේදි පමණ අක්කරවේලි ප්‍රදේශයේ ජනයා සිය ඉඩම් වලින් ඉවත් කළ ද යුද්ධය නිමා වීමෙන් පසුව තම මුල් ගම් බිම් වල ඔවුන් යළි පදිංචි වුවත් ඒම භුමියේ සිය කෘෂිකාර්මික කටයුතු වල යෙදීමට මහවැලි සංවර්ධන අධිකාරිය වන සංරක්ෂණ හා වනජීවි දෙපාර්තමේන්තු වැනි රජයේ ආයතන මේ දක්වා ඔවුන්ට අවස්ථාව ලබා දී නැත.
මාසයකට පමණ ඉහතදී අලුතින්ම සමූහ මිනීවලක් සොයාගනු ලැබුවේද මේ ප්‍රදේශයෙනි.
ශ්‍රී ලංකා මහවැලි අධිකාරිය යොදාගනිමින් වන්නියේ අලුතින් සිංහල ජනතාව පදිංචි කරවීමේ සැලසුමක් නැවතත් දියත් වෙමින් තිබෙන බවට මේ වසරේ ගත වු මාස කිහිපය තුලදී දෙමළ ජනතා නියෝජිතයන් අවස්ථා කිහිපයකදීම තොරතුරු එලි දක්වා තිබේ.
වව්නියාව, කිලිනොච්චිය සහ මුලතිව් දිස්ත්‍රික්කවල ඇති රජයේ ඉඩම් අක්කර 30000 ක් උක් වගාව සදහා පෞද්ගලික සමාගමකට ලබා දීමට ජනාධිපති රනිල් වික්‍රමසිංහ විසින් කැබිනට් මණ්ඩලයට යෝජනා කර ඇති බවටත් පසුගිය මාසයේ ජනමාධ්‍ය වාර්තා කර තිබුණි.
ආරක්ෂක අමාත්‍යංශයට අමතරව මහවැලි අධිකාරිය, සංචාරක මණ්ඩලය, පුරාවිද්‍යා දෙපාර්තමේන්තුව, වන සංරක්ෂණ හා වනජීවි දෙපාර්තමේන්තු උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට දිගින් දිගටම චෝදනාවට ලක්ව සිටී.
Facebook Comments
