සියවස් දෙකක කාලයක සිට මෙරට ආර්ථිකයට දැවැන්ත ශක්තියක් වී සිටින මලය රටේ දෙමළ ජනතාව ශ්‍රී ලංකාවේ නිදහස් හා සමාන පුරවැසියන් ලෙස පිළිගන්නා මෙන් සිදු කරන අරගලයට රටේ සෙසු ජන වර්ග වල සහාය ලබා ගැනීමේ අපේක්ෂාවෙන් තලෙයිමන්නාරම සිට මාතලේ දක්වා ගමන් ගන්නා දින 15 ක පා ගමන සිව් වන දිනය නිමා වන විට මඩු වෙත ලඟා වී තිබේ.
ශ්‍රී ලංකාවේ අර්ථවත් පුරවැසියන් වීම සදහා රජයට ඉල්ලීම් 11 ක් ඉදිරිපත් කරමින් ජුලි 28 වැනිදා තලෙයිමන්නාරමේදී සමාරම්භක උත්සවය පැවැත්වු මලෛයහ දෙමළ ජනයා ජුලි 29 වැනිදා උදෑසන තලෙයිමන්නාරමෙන් ආරම්භ කළ පා ගමන කිලෝ මීටර 300 ට ආසන්න දුරක් ගෙවා දමමින් මාතලේට පැමිණිමෙන් අනතුරුව නිමා වීමට ඇත්තේ අගෝස්තු 12 වැනි දිනයි.
වසර 200 ට ඉහත දී සිය මුතුන් මිත්තන් ඉන්දියාවේ ධනුෂ්කොඩි සිට ශ්‍රී ලංකාවේ තලෙයිමන්නාරමට පැමිණ අනේක වු දුෂ්කරතා මධ්‍යයේ පා ගමනින්ම මාතලේට ළඟා වූ ගමන් මාර්ගයම මෙම පා ගමන සදහා තෝරා ගෙන ඇති බැවින් ඔවුන් එය නම් කර ඇත්තේ “මුලයන් සොයමින් අයිතීන් දිනාගැනීමට” මැයෙනි.
මලය කඳුරට දෙමළ ප්‍රජාවගේ ඉතිහාසය, අරගල, ජයග්‍රහණ, ඔවුන්ගේ දායකත්වය, වත්මන් සමාජ-ආර්ථික හා දේශපාලන තත්ත්වය සහ අභිලාෂයන් පිළිිබව සිංහල, ශ්‍රී ලාංකික දෙමළ, මුස්ලිම් සහ අනෙකුත් සහෝදර ජනතාව අතර මුුලික අවබෝධයක් ඇති කිරීම මෙම පා ගමනේ අරමුණ වී තිබේ.
සියවස් දෙකක කාලයක් පුරා මලෛයහ දෙමළ කාන්තාවන් හා පිරිමින් විසින් ලබාදුන් දායකත්වය පිිළිබඳව ඔබගේ ඇගයීම ප්‍රදර්ශනය කිරීම සඳහාත්, මලෛයහ දෙමළ ප්‍රජාව වෙත සහයෝගීතාව දක්වමින් හඬ එක් කිරීම සඳහාත්, මෙම පා ගමනට එක්වන ලෙස සංවිධායකයෝ ආරාධනා කරති.
මන්නාරම සිට මාතලේ දක්වා වන පාගමන සහ වැඩසටහන් ශ්‍රී ලංකා ජාතික ක්‍රිස්තියානි මණ්ඩලය සහ පුළුල් සිවිල් සමාජ සංවිධාන සමුහයක් හා මලෛයහ ප්‍රජාවට අයත් සහ/හෝ ඔවුන් සමඟ කටයුතු කරන පුද්ගලයන්ගෙන් සමන්විත ‘මාන්බූමිගු මලෛයහ මක්කල් සාමුහිකය’ විසින් සංවිධානය කරනු ලැබේ.
ශ්‍රී ලංකාවේ විශාලතම සමූහ සුසාන හමුවූ දිස්ත්‍රික්ක දෙක වන්නේද මන්නාරම හා මාතලේයි.
ඉල්ලීම් මොනවාද?
මෙරටට පැමිණ වසර 200 ක් සම්පුර්ණ වී ඇතත් ශ්‍රී ලංකාවේ අර්ථවත් පුරවැසියන් වීම සදහා මලෛයහ දෙමළ ජනතාව ඉල්ලා සිටින ඉල්ලීම් පහතින්;
01. සිය ඉතිහාසය, අරගලය සහ දායකත්වය පිළිගැනීම,
02. අනෙකුත් ප්‍රධාන ප්‍රජාවන් හා සමානව වෙනමම අනන්‍යතාව සහිත, නිදහස් ශ්‍රී ලංකාවේ ජන කොටසක් ලෙස පිළි ගැනීම,
03. ජාතික මට්ටමේ සාමාන්‍යය හා සමාන මට්ටමක් ළඟාකර ගැනීමට අධ්‍යාපනය, සෞඛ්‍යය සහ සමාජ ආරක්ෂණයන් සම්බන්ධ සාධනීය ක්‍රියාමාර්ග,
04. ජීවත්වීමට සරිලන වැටුපක්, ගෞරවනීය රැකියා, නෛතික ආරක්ෂාව සහ පිරිමි හා කාන්තා කම්කරුවන්ට සමාන වැටුප්,
05. නිවාස සහ ජීවනෝපාය සඳහා සුරක්ෂිත හිමිකමක් සහිත ඉඩම්,
06. දෙමළ භාෂාව සමාන ලෙස භාවිතය සහ ඒ සඳහා සමාන තත්වයක්,
07. රාජ්‍ය සේවා වෙත සමාන ප්‍රවේශය,
08. වැවිලි අංශයේ ජනාවාස නව ගම්මාන ලෙස සීමා නීර්ණය කිරීම,
09. ගෘහස්ථ සේවකයන් ආරක්ෂා කිරීම,
10. මලෛයහ සංස්කෘතිය සංරක්ෂණය හා ප්‍රවර්ධනය කිරීම,
11. රාජ්‍ය පාලනයේ සෑම මට්ටමකදීම අර්ථවත් පාලන කාර්යභාරයක් හිමිවන පරිදි සමානාත්මතාව සහිත සහ අන්තර්කරණය වූ මැතිවරණ ක්‍රමයක් සහ බලය බෙදීමක්.
Facebook Comments
