දශකයකටත් වැඩි කලකට ඉහතදී බලහත්කාරයෙන් අතුරුදහන් කරනු ලැබූ තම ඥාතීන්ගේ ඉරණම හෙළි කරන ලෙස රජයට බල කරමින් වසර තුනක කාලයක් අඛන්ඩ සත්‍යග්‍රහයක නිරත දෙමළ මවුපියවරුන් විශාල පිරිසක් පිළිතුරු නොලබාම මියගොස් තිබේ.
යුද සමයේත්, ඉන් පසුවත් අතුරුදහන් තම ඥාතීන් සොයමින් දින දහසද ඉක්මවා උතුරු නැගෙනහිර අරගලයේ යෙදී සිටින්නන්ගේ මුල් පෙලේ නියෝජිතවරියක් ජිනීවා නුවරදී හෙළිකළ පරිදි මේ වනවිට මියගොස් ඇති ගණන හැත්තෑවකට ආසන්නය.
“තමන්ගේ දුක්ගැනවිල්ලට විසඳුම් නොලබාම අපේ අම්මාවරුන්ගේ විරෝධතාවල යෙදී ඉන්නා 69 දෙනෙක් මේ වනවිට මියගොස් තිබෙනවා,” යි උතුරු නැගෙනහිර බලහත්කාරයෙන් අතුරුදහන් කරවනු ලැබුවන්ගේ සංගමයේ ප්‍රධාන ලේකම් ලිලාදේවී ආනන්දනඩරාජා එක්සත් ජාතීන්ගේ මානව හිමිකම් මණ්ඩලයේ 43 වැනි සැසිවාරය හමුවේ කියා සිටියාය.
තම සමීපතමයන් සොයන ඥාතීන් අතරින් මෑතදී මරුමුවට පත්වුයේ 16 දෙනකු වන වැඩිම පිරිසක් මියගොස් ඇති මුලතිව් දිස්ත්‍රික්කයේ සෙල්වම් ශිවපාක්‍යම් මාතාවයි.
ඒ, අතුරුදහන්වුවන්ගේ ඉරණම හෙලිකිරීම ඇතුළු ජාත්‍යන්තරය හමුවේ දුන් පොරොන්දු ඉටුකිරීමේ වගකීම් වලින් ඉවත්වන බව ශ්‍රී ලංකාවේ විදේශ අමාත්‍ය දිනේෂ් ගුණවර්ධන ජගත් මානව හිමිකම් සමුළුවේදී දැනුම් දුන් දාට පෙර දාය.
යුද සමයේදී සිය පුතනුවන් දෙදෙනකු අහිමි වු සෙල්වම් ශිවපාක්‍යම් මාතාව මුලතිව් සත්‍යග්‍රහ භුමියේ වාඩි ලා සිටියේ යුද්ධයේ අවසන් මොහොතේදී අතුරුදහන් වු ඇල්බට් තීනු මුණුපුරා සොයා ගැනීම වෙනුවෙනි.
අසනීපයක් හේතුවෙන් සත්‍යග්‍රහ භුමියෙන් ඉවත්ව පසුගිය මාස දෙක තුනක කාලය සිය නිවසේ ගෙවා දමමින් සිටියදී ඇය මෙලෙස මරණයට පත් ව තිබේ.
උතුරු නැගෙනහිර බලහත්කාරයෙන් අතුරුදහන් කරවනු ලැබුවන්ගේ සංගමය විසින් ප්‍රසිද්ධියට පත් කර ඇති වාර්තාවක දැක්වෙන පරිදි මියගිය පිරිස අතරින් වැඩිමහලුම විරෝධතා කාරිය කේපාපුලවූ හි ජීවත්වූ 86 හැවිරිදි වේලුපිල්ලෙයි වියාලම්මා මාතාවයි.
රංජන් නමින්ද හඳුන්වනු ලබන ඇගේ පුතා වේලුපිල්ලේ ත්‍යාගරාජා තිස් අවුරුද්දකට පෙර අතුරුදහන් වී ඇත්තේ නාවික හමුදාව විසින් මන්නාරමේ එරුක්කලම්පිඩි හිදී අත් අඩංගුවට ගත් පසුයි.
විරෝධතාවේ යෙදී සිටියදී මියගොස් ඇති ලාබාලම තැනැත්තිය වව්නියාවේ කූමන්කුලමේ රාසනායගම් දිලන්තිනීයි.
විසිහතර හැවිරිදි විශේෂ අවශ්‍යතා සහිත තරුණියක් වන ඇය වවුනියාවේ උද්ඝෝෂණ භූමියට පිවිස සිටියේ 2007 දී මීගමුවේදී පැහැරගනු ලැබූ සිය සහෝදර රාසනායගම් ජෙනිස්රාජ්ගේ ඉරණම හෙලි කර ගැනීමටය.
OMP කාර්යාලයට අවුරුදු දෙකයි
අතුරුදහන් කරනු ලැබුවන් සොයාගැනීමට අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට සමත් වී නැති අතුරුදහන් වූ තැනැත්තන් පිළිබඳ කාර්යාලයට (OMP) මේ වන විට වසර දෙකක් සම්පූර්ණ වී ඇත.
ඉකුත් ආන්ඩුව විසින් තමන්ගේ නායකත්වයෙන් 2018 පෙබරවාරි 28 දා පිහිටුවන ලද කාර්යාලය සම්බන්ධයෙන් කෝපයෙන් යුතු ඥාතීන් සිටින බව OMP ප්‍රධානියාද පිළිගෙන තිබේ.
“අතුරුදහන්වීම් සම්බන්ධයෙන් දැනට පවතින තත්ත්වය පිළිබඳව කෝපයට හා ශෝකයට පත් පවුල් වල සාමාජිකයින් දහස් ගණනක් අතුරුදහන් වූ තැනැත්තන් පිළිබඳ කාර්යාලයේ අපට මුණගැසී ඇති අතර, අතුරුදහන් වීම් සම්බන්ධයෙන් රජය විසින් අනුගමනය කරනු ලබන ක්‍රියාවලියට එරෙහිව විරෝධතාවන්ට සහභාගී වූ, රාජ්‍ය ආයතන කෙරෙහි කිසිදු විශ්වාසයක් නැති සහ මේ සම්බන්ධයෙන් ජාත්‍යනත්තර මැදිහත්වීමක් අපේක්ෂා කරන පිරිස් මේ අතර සිටිති,” යි OMP දෑවුරුදු සමරුව වෙනුවෙන් ජනාධිපති නීතිඥ සාලිය පිරිස්ගේ සභාපතිවරයා නිකුත් කළ නිවේදනයක දැක්වේ.
යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ සමීපතමයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.
මුලතිව් නගරයේ සත්‍යග්‍රහ ව්‍යාපාරය මේ වන විටත් අඛණ්ඩව ක්‍රියාත්මක වෙමින් පවතින අතර වවිනියාව හා කිලිනොච්චියේ සත්‍යග්‍රහ ව්‍යාපාර මේ වන විට පවත්වාගෙන යනු ලබන්නේ අතුරුදහන් වුවන්ගේ ඥාතීන්ගේ කාර්යාල පරිශ්‍රයේ බව උතුරේ වාර්තාකරුවෝ පවසති.
ආගිය අතක් සොයා ගැනීමට නොමැති තම සමීපතමයන්ගේ ඉරණම ඥාතීන්ට හෙළිකර දීම සඳහා ආණ්ඩුවට “නෛතික හා සදාචාරාත්මක” වගකීමක් ඇතැයි OMP ප්‍රධානියා සිය කාර්යාලයේ දෙවර්ෂ පූර්ණ සංවත්සර නිවේදනයේ සඳහන් කර තිබේ.
කෙසේ නමුත් යුද සමයේ ආරක්ෂක බලධාරියා වූ වත්මන් ජනාධිපති ගෝඨාභය රාජපක්ෂ එක්සත් ජාතීන්ගේ ශ්‍රී ලංකාවේ නේවාසික නියෝජිත හැනා සිංගර් සමග පසුගියදා ප්‍රකාශ කර තිබුනේ සිය සොහොයුරු මහින්ද රාජපක්ෂගේ පාලන සමයේ උතුරේ දියත් කළ යුද්ධයේදී අතුරුදහන් වූ පුද්ගලයන් මරණයට පත්ව ඇති බවයි.
ඉන් පසුව ඔහු පවසා තිබුනේ “අතුරුදන් බව කියන විශාල පිරිසක්” මරුමුවට පත්වූයේ යැයි එක්සත් ජාතීන්ගේ ආයතනයක් විසින් පැවසූ බවයි.
“අතුරුදන්වූවන් ගැන යුනිසෙෆ් කළ සමීක්ෂණයකදී හෙළි වූයේ ආයතනය අතුරුදන් බව කියන විශාල පිරිසක් එල්ටිටීඊ විසින් යුද්ධයට බඳවා ගනුලැබීමෙන් පසු සටනේදී මිය ගොස් ඇති බවයි,” යනුවෙන් අතුරුදහන් කරවීම් සම්බන්ධයෙන් වගකිව යුතු බවට චෝදනා ලැබ සිටින ජනාධිපති ගෝඨාභය රාජපක්ෂ මාධ්‍ය ආයතන කර්තෘවරුන්, ප්‍රවෘත්ති සංස්කාරකවරු සහ අධ්‍යක්ෂවරු ඉදිරියේ ප්‍රකාශ කළ බව ජනාධිපති මාධ්‍ය ඒකකය නිවේදනය කර තිබේ.
Facebook Comments
