උතුරේ දියත් කළ යුද්ධයේ අවසන් සමයේදී යුද හමුදාවට භාරවූ දෙමළ ඊළම් විමුක්ති කොටි සාමාජිකයන්ගේ තොරතුරු ලබා නොදීමට එරෙහිව මාධ්‍යවේදියකු කර ඇති ඉල්ලීමට එරෙහිව ලිඛිත විරෝධතා ගොනු කිරීම සදහා යුද හමුදාව අධිකරණයෙන් කල් ඉල්ලා තිබේ.
නීතිපති දෙපාර්තමේන්තුව මාර්තු 28 වැනිදා එලෙස කල් ඉල්ලා ඇත්තේ තමිල්මිරර් පුවත්පතේ මාධ්‍යවේදියකු ලෙස කටයුතු කළ බී. නිරෝෂ් කුමාර් තොරතුරු දැන ගැනීමේ අයිතිවාසිකම පිළිබඳ කොමිෂන් සභාවේ තීන්දුවකට එරෙහිව අභියාචනාධිකරණයේ ගොනු කර තිබු පෙත්සම විභාගයට ගත් අවස්ථාවේදීය.
අවසන් යුද්ධයේ දී යුද හමුදාවට භාරවූ කොටි සාමාජිකයන්ගේ තොරතුරු ලබා දීම යුද හමුදාව විසින් ප්‍රතික්ෂේප කිරීම නිසා එම තොරතුරු ලබා දීමට නියෝග කරන ලෙස මාධ්‍යවේදී බී. නිරෝෂ් කුමාර් තොරතුරු දැනගැනීමේ අයිතිවාසිකම් පනත යටතේ තොරතුරු කොමිසමට අභියාචනයක් ඉදිරිපත් කර තිබුණි.
නිරෝෂ් කුමාර් යුද හමුදාවෙන් ඉල්ලා තිබුණු තොරතුරු ප්‍රතික්ෂේප කිරීමට එරෙහි අභියාචනයක් 2022 වසරේ නොවැම්බර් 3 වැනි බ්‍රහස්පතින්දා තොරතුරු දැන ගැනීමේ අයිතිවාසිකම පිළිබඳ කොමිෂන් සභාව විසින් සලකා බලන ලද අවස්ථාවේදී ශ්‍රී ලංකා යුද හමුදාව පවසා තිබුනේ උතුරේ දියත් කළ යුද්ධයේ අවසන් සමයේදී යුද හමුදාවට භාරවූ කිසිවකු ලියාපදිංචි නොකළ බවයි.
මාධ්‍යවේදියා පවසන්නේ හමුදාවට යටත් වූ එල්.ටී.ටී.ඊ සාමාජිකයන්ගේ තොරතුරු සැපයීම ප්‍රතික්ෂේප කිරීමට හමුදාව ගත් තීරණයට පක්ෂව, තොරතුරු කොමිසම තීන්දුවක් ලබා දුන් බවයි.
තොරතුරු දැන ගැනීමේ අයිතිවාසිකම පිළිබඳ කොමිෂන් සභාව 2023 නොවැම්බර් 8 වැනි දින ලබා දුන් එම තීන්දුවට එරෙහිව මාධ්‍යවේදියා අභියාචනාධිකරණයේ ගොනු කළ පෙත්සම මාර්තු 28 වැනි දින විභාගයට ගත් අවස්ථාවේදී නඩු විභාගයේ පාර්ශවකරුවකු ලෙස පෙනී සිටීමට අදාල ලිපි ලේඛන අධිකරණයට ඉදිරිපත් කිරීම සදහා කොමිසම අධිකරණයෙන් අවස්ථාවක් ඉල්ලා තිබේ.
මාධ්‍යවේදී බී. නිරෝෂ් කුමාර් වෙනුවෙන් අධිකරණයේ පෙනී සිටි නීතිඥ ස්වස්තිකා ආරුලිංගම් තොරතුරු කොමිසමේ ඉල්ලීමට විරෝධය පළ කරමින් අධිකරණයේ තර්ක කර ඇත්තේ තොරතුරු කොමිසම මෙම නඩුවේ පාර්ශවයක් ලෙස ඇතුළත් නොකළ යුතු බවටයි.
කෙසේ වෙතත්, නඩු විභාගය සදහා තොරතුරු කොමිසම පාර්ශවකරුවෙකු ලෙස ඇතුළත් කරන ලෙස කළ ඉල්ලීමට අදාළ ලිපි ලේඛන අධිකරණයට ඉදිරිපත් කිරීමට දින නියම කළ අභියාචනාධිකරණය ඊට ලිඛිත විරෝධතා ගොනු කිරීමට හැකි බව ද මාධ්‍යවේදියාගේ නීතිඥවරියට දැනුම් දී තිබේ.
මෙම නඩුව මැයි මස 21 වැනිදා යළි කැඳවීමට අභියාචනාධිකරණය තීරණය කර ඇත.
Facebook Comments
