අලුත් කෝවිඩ් අනතුරින් ගැබිණි මව්වරුන් අවදානමේ

0

ශ්‍රී ලංකාව තුළ මේ වන විට පැතිරයමින් තිබෙන නව වෛරස් ප්‍රභේදයෙන් ගැබිනි මව්වරුන් ආරක්ෂාකර ගැනීමේ වැදගත්කම පෙන්වා දෙන ශ්‍රී ලංකා ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනය ඔවුන් එන්නත්කරණය කිරීමේ අවශ්‍යතාවය අවධාරණය කර තිබේ.

වර්තමානයේ පැතිර යමින් තිබෙන කොවිඩ් 19 වයිරසයට ගොදුරුවීමේ අවදානමක් ඇති කණ්ඩායමක් ලෙස ගැබිනි මව්වරුන්ද හදුනාගෙන ඇති බවයි එම ආයතනය පවසන්නේ.

“ගැබිනි මව්වරුන් මෙම වයිරසයට ගොදුරු වුවහොත් ඔවුන් රැකබලා ගැනීමේ ගැටලුවක් නිර්මාණය වේ. ඒ නිසා ගැබිනි මව්වරුන් මේ මොහොතේ අතිශයින් පරිස්සම් විය යුතුය. එසේ නොවුනහොත් එය අතිශයින් බේදනීය ඉරණමක් වනු හෝ අනුමානය ”

ශ්‍රී ලංකා ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනයේ සභාපති විශේෂඥ වෛද්‍ය ප්‍රදීප් ද සිල්වා ගේ අත්සනින් යුතුව අප්‍රේල් 28 බදාදා නිකුත් කර තිබෙන මාධ්‍ය නිවේදනයක් මගින් වැඩි දුරටත් පෙන්වා දී ඇත්තේ වෛරසය වැළදුන ගැබිනි මව්වරු තිදෙනෙක් මේ වන විටත් දැඩි සත්කාර ඒකකවල ප්‍රතිකාර ලබන බවයි.

විශේෂඥ වෛද්‍යවරයා තව දුරටත් පෙන්වා දෙන පරිදි රජයේ සහ පෞද්ගලික අංශයේ රැකියා කරන ගැබිනි කාන්තාවන් සදහා කොවිඩ් 19 වයිරසය දෙයාකාරයකින් අවදානම් විය හැකිය.

පළමුව පොදු සංකුලතා ඇතිකරන අතර ශාරීරික තත්වයන්, එනම් තරබාරුව, දියවැඩියාව, අධික රුධිර පීඩනයයි.

රෝගය බෝ වීමට අධික අවදානමක් ඇති දෙවැනි කරුණ ලෙස ඔහු පෙන්වා දෙන්නේ ගැබිනි කාන්තාවන් රැකියා සදහා පොදු ප්‍රවාහන භාවිත කිරිම හරහා මහජනයා සමග කෙළින්ම ගැටෙමින් රැකියා කිරීම හා සේවකයන් වැඩි සංඛ්‍යාවක් ඇති තැන්වල වැඩ කිරීමයි.

කොවිඩ් 19 වයිරසය පාලනය සදහා ලබා දෙන එන්නත් ගැබිනි කාන්තාවන්ට ලබා දීම සුදුසු බවට ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනය අවධාරණය කර තිබේ.

“අවදානම් ගැබිනි මව්වරුන්ට එන්නත ලබාදීම බ්‍රිතාන්‍ය රාජකීය ප්‍රසව වෛද්‍යවරුන්ගේ විද්‍යායතනය ද නිර්දේශ කර ඇත. ”

එබැවින් ශ්‍රී ලංකාවේ ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනයද ගැබිනි මව්වරුන්ට එන්නත ලබා දිය යුතු යැයි “අනුමාන ” කරයි.

එන්නත ලබා ගැනීමෙන් කළලයට හානියක් නොවන බවද විද්‍යාත්මකව තහවුරු කර ඇති බවයි ශ්‍රී ලංකා ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනයේ සභාපති විශේෂඥ වෛද්‍ය ප්‍රදීප් ද සිල්වා පවසන්නේ.

වයිරසය වැළදුන ගැබිනි කාන්තාවක් රෝහලකට පැමිණි පසුව පරීක්ෂා කර බැලීම සදහා වෙනත් ස්ථානයක් ලබාදීමද ඉතා වැදගත් බව පෙන්වා දෙන විශේෂඥ වෛද්‍යවරයා අවධාරණය කරනනේ නැතහොත් සාමාන්‍ය රෝගීන්ටත් වයිරසය වැළදීමේ අවදානමක් මතුවන බවයි.

Facebook Comments

wedding people