ශ්රී ලංකාව සහ ඔස්ට්‍රේලියාව අතර පවතින ද්විපාර්ශවික සබඳතා තවදුරටත් ශක්තිමත් කෙරෙන නව ගිවිසුම් කිහිපයකට ජනාධිපති මෛත්‍රීපාල සිරිසේන සහ ඔස්ට්‍රේලියා අග්‍රාමාත්‍ය මැල්කම් ටර්න්බුල් අතර අද (25) ඔස්ට්‍රේලියානු පාර්ලිමේන්තු සංකීර්ණයේදී පැවැත්වුණු නිල හමුවෙන් පසුව අත්සන් තැබුණු බව ජනාධිපති මාධ්‍ය ඒකකය පවසයි.
දෙරට අකර ඒකාබද්ධ ප්‍රකාශනයකට ද අත්සන් තැබුණු අතර ඔස්ට්‍රේලියාවේ විදේශ කටයුතු අමාත්‍ය ජුලි බිෂොප් සහ ශ්රී ලංකාවේ විදේශ කටයුතු නියෝජ්‍ය අමාත්‍ය ආචාර්ය හර්ෂ ද සිල්වා ඊට අත්සන් තබා තිබේ.
ඔස්ට්‍රේලියා න්‍යෂ්ටික විද්‍යා හා තාක්ෂණ ආයතනය සහ වකුගඩු නිවාරණ ජනාධිපති කාර්ය සාධක බළකාය අතර අවබෝධතා ගිවිසුමකට ද මෙහිදී අත්සන් තැබුණු අතර ඔස්ට්‍රේලියා න්‍යෂ්ටික විද්‍යා හා තාක්ෂණ ආයතනයේ ප්රධාන විධායක නිලධාරී ආචාර්ය එඩ්රියන් පැටර්සන් සහ ඔස්ට්‍රේලියාවේ ශ්රී ලංකා මහකොමසාරිස් සෝමසුන්දරම් ස්කන්ධකුමාර් ඊට අත්සන් තැබූහ.
අභිප්‍රාය ප්‍රකාශ කිරීමේ ලිපියට අත්සන් තබන ලද්දේ ඔස්ට්‍රේලියානු භූ විද්‍යා ආයතනයේ ප්රධාන විධායක නිලධාරී ජේම්ස් ජෝහන්සන් සහ ශ්රී ලංකා භූ විද්‍යා සමීක්ෂණ හා පතල් කාර්යාංශය වෙනුවෙන් ඔස්ට්‍රේලියාවේ ශ්රී ලංකා මහකොමසාරිස් සෝමසුන්දරම් ස්කන්ධකුමාර් විසිනි.
Facebook Comments
