ඉදිරි ජනපතිවරණ අපේක්ෂකත්වය ගැන එක්සත් ජාතික පක්ෂ නායකයා සහ නියෝජ්‍ය නායකයා අතර පැවති සාකච්ඡාව සාර්ථකව අවසන් වී තිබේ.
ඒ අනුව ජනපතිවරණයට තරඟ කරන පුද්ගලයා කෘත්‍යාධිකාරී මණ්ඩලයේ හා පාර්ලිමේන්තු කණ්ඩායමේ අනුමැතියට යටත්ව තෝරා ගැනීමට සජිත් ප්‍රේමදාස කළ ඉල්ලීමට අගමැති රනිල් වික්‍රමසිංහ එකඟත්වය පළ කර ඇත.
ඉදිරි ජනාධිපතිවරණයට දෙමල ජාතික සන්ධානය හා එක්සත් ජාතික පෙරමුණේ අනෙකුත් පක්ෂ සමග එකඟත්වයක් ඇති කරගැනීමට කමිටුවක් පත් කර ගැනීමට ද මෙහිදි තීන්දු කර තිබේ.
මලික් සමරවික්‍රම, කබීර් හෂීම්, මංගල සමරවීර, රන්ජිත් මද්දුම බණ්ඩාර, රාජිත සේනාරත්න හා අගමැතිවරයාගේ නියෝජිතයකු ගෙන් එම කමිටුව සමන්විත බවයි අරලියගහ මන්දිර ආරංචි මාර්ග පවසන්නේ.
එම පක්ෂවල අනුමැතිය ලැබුන වහාම කෘත්‍යාධිකාරී මණ්ඩලය හා පාර්ලිමේන්තු කණ්ඩායම කැඳවා අපේක්ෂකයා නම්කර ගැනීමටත් මෙම සති අන්තයේදී එක්සත් ජාතික පෙරමුණේ අපේක්ෂකයා නිවේදනය කිරීමටත් සාකච්ඡාවේදී එකඟ වී
ඇති බවයි වාර්තා වන්නේ.
කෙසේ වෙතත් ඉදිරියේදීත් මෙවැනි සාකච්ඡා පවත්වන බව මෙන්ම තමා හා අග්‍රාමාත්‍යවරයා අතර ගැටුම්කාරි තත්ත්වයක් ඇති නොවූ බවද සාකච්ඡාවෙන් අනතුරුව අරලිය ගහ මන්දිරියේ පිටත රැඳි සිිටි මාධ්‍යවේදීන් වෙත සජිත් ප්‍රේමදාස අමාත්‍යවරයා කියා සිටියේය.
එක්සත් ජාතික පක්ෂයේ කෘත්‍යාධිකාරී මණ්ඩලයේ හා පාර්ලිමේන්තු කණ්ඩායෙමේ බහුතරය සජිත් ප්‍රේමදාස අමාත්‍යවරයා ජනපතිවරණ අපේක්ෂකයා කළ යුතු බවට යෝජනවා කර ඇති බව මීට පෙර මාධ්‍ය වාර්තා කර තිබුනි.
මේ අතර සජිත් ප්‍රේමදාස අමාත්‍යවරයා හා අගමැති රනිල් වික්‍රමසිංහ අතර පැවති හමුවෙන් අනතුරුව ට්විටර් පණිවුඩයක් නිකුත් කර ඇති හරීන් ප්‍රනාන්දු ඇමැතිවරයා ඔවුන් අතර පැවති සාකච්ඡා සාර්ථකව අවසන් වු බව හා සජිත් ප්‍රේමදාස ඉදිරි ජනපතිවරණ අපේක්ෂකයා බවට නිවේදනය කර ඇත.
Facebook Comments
