බෞද්ධ සිද්ධස්ථාන නාමයෙන් උතුරේ තවත් අක්කර 400 කට බැල්ම

0

මතබේදයට ලක්වී තිබෙන පුරාවිද්‍යා ගවේෂණ නාමයෙන් උතුරු පළාතේ යුද පීඩිත දෙමළ ජනතාවටත්, වනාන්තරයටත් අයත් තවත් අක්කර සිය ගණනක් පවරා ගැනීමට දැරෙන උත්සාහයක් ගැන කරුණු හෙළිවී තිබේ.

පුරාවිද්‍යා දෙපාර්තමේන්තුවේ නව සැලසුම් අනුව මෙසේ පවරා ගන්නට යන්නේ මුලතිව් දිස්ත්‍රික්කයේ තන්නිමුරිප්පු ප්‍රාදේශයේ කුරුන්තූර් සිව දේවාලය අවට භූමියයි. ඒ අවට පිහිටි අක්කර හාරසීයක් ‘බෞද්ධ ශුද්ධ භූමියක්’ බව කොළඹ බලධාරීහු පවසති.

මුහුදුබඩපත්තු ප්‍රාදේශීය ලේකම්ට යවන ලිපියකින් පුරාවිද්‍යා දෙපාර්තමේන්තුව දැනුම් දී ඇත්තේ දෙමළ ජනතාව පාරම්පරිකව වාසය කළ එම ඉඩම් වැඩිදුර ගවේෂණ කටයුතු සඳහා භාර දෙන ලෙසයි.

1932 වර්ෂයේ සිතියමක් උපුටා දක්වමින් පුරාවිද්‍යා බලධාරීන් මුලින් පවසා ඇත්තේ අක්කර 78ක් වන්දනාස්ථාන ලෙස නම් කර ඇති බවයි. එම ප්‍රදේශයේ නැවත මැනුම් කටයුතු කිරීමට අවශ්‍ය බව එම ලිපියේ සඳහන් වෙයි. ඒ අනුව යුද හමුදාව හා එක්ව පුරාවිද්‍යා දෙපාර්තමේන්තුව ගවේෂණ කටයුතු අරඹා තිබේ.

දැන් අලුතින් එවා තිබෙන නිවේදනයකින් ඉල්ලා ඇති පරිදි, පුරාවිද්‍යා දෙපාර්තමේන්තුවට කුරුන්තූර් අවට අක්කර 400ක් පවරා දිය යුතුව ඇත.

මෙයින් අක්කර 150ක් තන්නිමුරිප්පු ගම්වාසීන්ටද, ඉතිරි කොටස නාගර්චෝලයි කැලෑවද සතු වන බව ප්‍රාදේශීය සභාවේ පැවති සාකච්ඡාවකදී හෙළිවූ බව පළාතේ මාධ්‍යවේදීහු පවසති.

මෑතදී තන්නිමුරිප්පු ප්‍රදේශවාසීන් තම ඉඩම් හෙළිපෙහෙළි කර වගා කටයුතු ආරම්භ කිරීමට යාමේදී බෞද්ධ භික්ෂුන් සමග පැමිණි පුරාවිද්‍යා නිලධාරීන් පිරිසක් එම කටයුතු බලහත්කාරයෙන් වලක්වා තිබේ.

මුහුදුබඩපත්තු ප්‍රාදේශීය ලේකම්වරයාට ලිපිය ලැබී ඇත්තේ ඉන් අනතුරුවය.

ඒ සම්බන්ධ සාකච්ඡාවක් අප්‍රේල් 1 දාට යොදාගෙන තිබේ.

පුරාවිද්‍යා ගව්ෂණයේ නාමයෙන් පවරා ගන්නට යන භූමිය පිටතින් ගෙනෙන සිංහලයන් පදිංචි කරවීමට යොදා ගනු ඇති බවට ප්‍රදේශවාසීහු බිය පල කරති.

රජය විසින් උතුරු නැගෙනහිර ඉඩම් පවරාගැනීමේ අරමුණ සම්ප්‍රදායික දෙමළ නිජභූමිය භූගෝලීය වශයෙන් කැබලි කිරීම බවට එක්සත් ජනපද බුද්ධි මණ්ඩලයක් විසින් නිකුත් කරන ලද අලුත්ම වාර්තාවකින් අනතුරු අඟවා තිබුණි.

“වාරිමාර්ග යෝජනා ක්‍රම, හමුදා කඳවුරු, පුරාවිද්‍යා රක්ෂිත, වනජීවී අභයභූමි, රක්ෂිත වනාන්තර සහ විශේෂ ආර්ථික කලාප යනාදිය මගින් උතුරේ හා නැගෙනහිරේ ඉඩම් කොල්ල කෑම අවුරුදු දෙකකට ඉහතදී ආණ්ඩුව වෙනස් වීමත් සමග නරක අතට හැරී තිබේ,” යි වාර්තාව එළිදැක්වූ ඕක්ලන්ඩ් ආයතනයේ අනුරාධා මිත්තල් පවසන්නීය.

දෙමළ දේශපාලකයන් පවසන පරිදි රජය විසින් ආපසු පවරා දිය යුතුව ඇති උතුරු නැගෙනහිර පෞද්ගලික ඉඩම් ප්‍රමාණය අක්කර 4000 ඉක්මවයි.

දහස් සංඛ්‍යාත ජන සහභාගිත්වයකින් පසුගිය පෙබරවාරියේ පවත්වන ලද P2P පොතුවිල්, පොලිකන්ඩි දෙමළ මුස්ලිම් පාද යාත්‍රාවේ ප්‍රධාන ඉල්ලීමක් වූයේ ඉඩම් අයිතියයි.

Facebook Comments

wedding people