උතුරේ දියත් කළ යුද්ධයේ පෙරමුනේ සිටි ත්‍රිවිධ හමුදාව විසින් යාපනය දිස්ත්‍රික්කයේ අත්පත් කරගත් ඉඩම් වලින් පමණක් අක්කර දෙදහස් පන්සීයකට වැඩි ප්‍රමාණයක් යුද නිමාවෙන් පහලොස් වසරක් ගත වී තිබියදීත් නිදහස් කර නොමැති බව හෙලි වී තිබේ.
නිදහස් කර නොමැති ඉඩම් වලින් වැඩිම කොටසක් දෙමළ ජනයාට අයත් පෞද්ගලික ඉඩම් වන අතර මේ වන විටත් එහි හිමිකරුවන් ජීවත් වන්නේ උන්හිටි තැන් අහිමිවුවන් ලෙසිනි.
මේ වන විටත් ත්‍රිවිධ හමුදාව වාඩිලා සිටින යාපනය දිස්ත්‍රික්කයේ ඉඩම් අක්කර 2624.29 ප්‍රමාණය වහාම නිදහස් කිරීමට අවශ්‍ය පියවර ගන්නැයි ජනාධිපතිවරයාගෙන් ඉල්ලා සිටි යාපනය දිස්ත්‍රික් ලේකම්වරයා පවසන්නේ යුද්ධය නිමාවීමෙන් පසු ත්‍රිවිධ හමුදාව විසින් අධි ආරක්ෂිත කලාප බවට පත් කර ගත් රජයේ සහ පුද්ගලික ඉඩම් ප්‍රමාණය අක්කර 23850 ක් බවයි.
යාපනය දිස්ත්‍රික් ලේකම් කාර්යාලයේ 2025 ජනවාරි 31 පැවැති දිස්ත්‍රික් සම්බන්ධිකරණ කමිටු රැස්වීමට සහභාගී වු ජනාධිපති අනුර කුමාර දිසානායකට ඒ බව දැනුම් දෙමින් යාපනය දිස්ත්‍රික් ලේකම් මර්දලිංගම් ප්‍රදීපන් වැඩි දුරටත් කියා සිටියේ එම ඉඩම් අක්කර 23850 න් අක්කර 21226 ක් දැනට නිදහස් කර ඇති බවයි.
මේ වන විටත් ත්‍රිවිධ හමුදාව රැදී සිටින ඉතිරි ඉඩම් අක්කර 2624.29 ප්‍රමාණයෙන් ඉඩම් අක්කර 951 ක් රජයට අයත් අතර ඉතිරි ඉඩම් අක්කර 1673 පුද්ගලික ඉඩම් බව ඔහු වැඩි දුරටත් ජනාධිපතිවරයාට දැනුම් දී තිබුනි.
පළාලි ගුවන් හමුදා කදවුරු පුළුල් කිරීම සදහා යැයි පවසමින් බලහත්කාරයෙන් අත්පත්කරගැනීමෙන් පසු සිවිල් ගුවන් සේවා අධිකාරියට පවරන ලද දෙමළ ජනයාට අයත් ඉඩම් අක්කර 1009.7 ප්‍රමාණය මේ වන විටත් ගුවන් හමුදාව ගුවන් ධාවන පථය සදහා පාවිච්චියට ගනිමින් සිටින බව ජනාධිපතිවරයාට දැනුම් දෙමින් යාපනය දිස්ත්‍රික් ලේකම්වරයා සදහන් කළේ එම භුමියේ දෙමළ ජාතිකයන් 643 දෙනකුට අයිති ඉඩම් තිබෙන බවයි.
ඔවුන් අතුරින් පුද්ගලයන් 538 දෙනෙක් වන්දි මුදලක් ලබා ගැනීමට කැමැත්ත පළ කර ඇති නමුත් ඉතිරි පුද්ගලයන් වන්දි ලබා ගැනීම ප්‍රතික්ෂේප කර ඇති බව ඔහු වැඩි දුරටත් සදහන් කළේය.
ජනාධිපති අනුර කුමාර දිසානායකට යාපනය දිස්ත්‍රික් ලේකම් මර්දලිංගම් ප්‍රදීපන් එහිදී තව දුරටත් දැනුම් දී තිබුනේ වන්දි මුදල් ලබා ගැනීම සදහා කැමැත්ත පළ කර ඇති පිරිසට එම වන්දි මුදල් ලබා දීම කඩිනම් කිරීම සුසුදු බවයි.
වන ජීවි දෙපාර්තමේන්තුව සතු යාපනය දිස්ත්‍රික්කයේ ඉඩම් අක්කර ප්‍රමාණය 72438 ක් වන අතර යුද්ධයෙන් අවතැන්වු දෙමළ ජනයා එම ඉඩම් වලින් අක්කර 14171 ක ප්‍රමාණයක් යුද්ධයට පෙර තමන් ජීවත් වු සහ වගා කළ ඉඩම් ලෙස හදුනාගෙන ඇති බැවින් එම ඉඩම් නිදහස් කළ යුතු බවත් දිස්ත්‍රික් ලේකම්වරයා එහිදී ජනාධිපතිවරයාට දැනුම් දී තිබේ.
යාපනය දිස්ත්‍රික් ලේකම් මර්දලිංගම් ප්‍රදීපන් ජනාධිපති අනුර කුමාර දිසානායකට තව දුරටත් දැනුම් දී තිබුනේ වන සංරක්ෂණ දෙපාර්තමේන්තුව සතු යාපනය දිස්ත්‍රික්කයේ ඉඩම් අක්කර 5397න් ඉඩම් අක්කර 397 ක් දෙමළ ජනතාව ජීවත් වු භුමි වන බැවින් ඒවාද නිදහස් කළ යුතු බවයි.
යුද අනාථයන් දහස් ගණනක්
උතුරේ දියත් කළ යුද්ධය අවසන්ව දහසය වසරකට ළඟා වෙමින් තිබියදීත්, යාපනය දිස්ත්‍රික්කයේ පමණක් පවුල් එක්දහස් පන්සීයකට වැඩි පිරිසක් උන්හිටි තැන් අහිමිව සිටින ආකාරයත් යාපනය දිස්ත්‍රික් ලේකම් මර්දලිංගම් ප්‍රදීපන් දිස්ත්‍රික් සම්බන්ධිකරණ කමිටු රැස්වීම හමුවේ හෙලි කර තිබුනි.
ජනාධිපති අනුර කුමාර දිසානායක ඉදිරියේ දිස්ත්‍රික් ලේකම්වරයා ඉදිරිපත් කළ සංඛ්‍යාලේඛන අනුව පවුල් 1502 ට අයත් පුද්ගලයන් 4533 ක් තවමත් නැවත පදිංචි කර නොමැති අතර ඔවුන්ට අයත් පෞද්ගලික ඉඩම් අක්කර 977 ක් තවමන් පවතින්නේ අධි ආරක්ෂිත කලාපය තුලයි.
යුද නිමාවෙන් පසු මේ වන තෙක් පවුල් 40043 ට අයත් පුද්ගලයන් 130124 දෙනෙක් නැවත පදිංචි කර ඇති බවයි යාපනය දිස්ත්‍රික් ලේකම් මර්දලිංගම් ප්‍රදීපන් පවසන්නේ.
යුද ගිනි දැල් මැද ජීවිත ආරක්ෂාව පතා අසල්වැසි ඉන්දියාවට පලා ගොස් යුද නිමාවෙන් පසු ආපිට මෙරටට පැමිණි පවුල් 1634 ට අයත් පුද්ගලයන් 4214 ක් නැවත පදිංචි කර ඇති බවත් ඔහු එහිදී සදහන් කළේය.
මහින්ද රාජපක්ෂ ජනාධිපතිවරයාගේ දෙවැනි ධුර සමයේ ඉදිකිරීම් ආරම්භ කළ යාපනය ජනාධිපති මන්දිර පරිශ්‍රය සදහා බලහත්කාරයෙන් අල්ලාගෙන තිබෙන දෙමළ ජනයාගේ පෞද්ගලික ඉඩම් සදහා මේ වන තෙක් කිසිදු වන්දි මුදලක් ගෙවා නොමැති බවද යාපනය දිස්ත්‍රික් ලේකම්වරයා එහිදී වත්මන් ජනාධිපතිවරයාට දැනුම් දී තිබුනි.
2010- 2015 සමයේ ඉදිකිරීම් කටයුතු ඇරඹූ කන්කසන්තුරේ පිහිටි මෙම ජනාධිපති මන්දිර පරිශ්‍රය සදහා ප්‍රදේශයේ දෙමළ පවුල් 17 ට අයත් ඉඩම් අක්කර 29 ක් බලහත්කාරයෙන් අත්පත්කරගෙන තිබේ.
Facebook Comments
