අවුරුද්දකට ආසන්න කාලයක් උසාවිය මගහැර සිටි නාවික හමුදා නිලධාරියෙකු ගෙන් රඳවා ගෙන ප්‍රශ්න කිරීමට අධිකරණ අපරාධ පරීක්ෂණ දෙපාර්තුමේන්තුවට අවසර ලබා දී තිබේ.
දස වසරකට ඉහතදී දෙමළ ජාතික සන්ධාන පාර්ලිමේන්තු මන්ත්‍රී නඩරාජා රවිරාජ් ඝාතන කිරීමේ සහ රාජපක්ෂ පාලන සමයේ පුද්ගලයන් 11 දෙනකු පැහැරගෙන ගොස්, නීතිවිරෝධී ලෙස සිරකොට තබාගෙන ඝාතනය කිරීමේ සිද්ධියක් සම්බන්ධයෙන් සැක කෙරෙන ලුතිනන් කමාන්ඩර් හෙට්ටිආරච්චි මුදියන්සේලාගේ චන්දන ප්‍රසාද් හෙට්ටිආරච්චි 13 සඳුදා අත්අඩංගුවට ගත් බව රහස් පොලිසිය අධිකරණයට දැනුම් දුන්නේය.
ආරක්ෂක මාණ්ඩලික ප්‍රධානී අද්මිරාල් රවීන්ද්‍ර විජේගුණරත්නගේ සහාය ඇතිව සැකකාර ලුතිනන් කමාන්ඩර් හෙට්ටිආරච්චි මුහුදු මගින් රටින් පලාගොස් ඇති බවට විශ්වසනීය තොරතුරු ලැබී ඇති බව අපරාධ පරීක්ෂණ දෙපාර්තමේන්තුවේ සමූහ මංකොල්ල අංශයේ පොලිස් පරීක්ෂක ඒඩ්රියන් නිශාන්ත සිල්වා මීට පෙර අධිකරණයට දැනුම් දී තිබුණ අතර ඔහු අල්ලා ගැනීමට ජාත්‍යන්තර රතු වරෙන්තු නිකුත් කර තිබුණි.
කෙසේ වෙතත් අත් අඩංගුවට ගත් නාවික නිලධාරියා 14 අඟහරුවාදා උසාවියට ඉදිරිපත් කල අවස්ථවේ අපරාධ පරික්ෂණ දෙපාර්තුමේන්තුව කරන ලද ඉල්ලීමකට අනුව ඔහුගෙන් රඳවා ගෙන ප්‍රශ්න කිරීමට කොටුව අතිරේක මහේස්ත්‍රාත් කාංචනා එස් සිල්වා අවසර ලබා දී තිබේ.
දෙහිවල, කොටහේන, ජාඇල සහ කටුනායක ඇතුළු ප්‍රදේශවලින් පැහැර ගන්නා ලද එකොලොස් දෙනකු නාවික හමුදා නිලධාරීන් විසින් පැහැර ගෙන ගොස් කොළඹ නාවුක හමුදා මුලස්ථානයේත්, ත්‍රිකුණාමල නාවුක හමුදා කඳවුරේත් නීති විරෝධී ලෙස රඳවා තබා වධ දී ඇති බවට ලුතිනන් කමාන්ඩර් හෙට්ටිආරච්චි හට චෝදනා එල්ල වී ඇත.
පාර්ලිමේන්තු මන්ත්‍රී නඩරාජා රවිරාජ් ඝාතන කිරීම සම්බන්ධයෙන් සැකපිට පවරන ලද නඩුවේද එක් සැකකරුවකු වන නාවික නිලධාරියා එම නඩුවෙහි අභියාචනය විභාගයට ගැනෙන විට උසාවියට නොපැමිණි හේතුවෙන් ද වරෙන්තු ලබා සිටි.
Facebook Comments
